ରୋମ,୨୩।୩: କରୋନା ଭାଇରସ। ଏତିକି ଶୁଣିଲେ ସମସ୍ତଙ୍କ ମନରେ ଉଙ୍କି ମାରୁଛି ଭୟ। କାରଣ ଏବେ କରୋନା ବିଶ୍ୱ ପାଇଁ ଚିନ୍ତାର କାରଣ ପାଲଟି ଯାଇଛି। ଚାଇନାରୁ ଆରମ୍ଭ ହୋଇଥିବା ଏହି କରୋନା ଏବେ ସାରା ବିଶ୍ୱରେ ୧୪ ହଜାରରୁ ଅଧିକ ଲୋକଙ୍କ ଜୀବନ ନେଇ ସାରିଲାଣି। ଏତିକିରେ ବି ଥମି ନାହିଁ କରୋନା। ଏହାର କୌଣସି ସଠିକ୍ ଔଷଧ ନ ଥିବାରୁ ଚିକିତ୍ସକଙ୍କ ପାଇଁ ଏବେ ଏହା ଚ୍ୟାଲେଞ୍ଜ ହୋଇଯାଇଛି। ଚାଇନାରେ କରୋନାରେ ୩ ହଜାରରୁ ଉର୍ଦ୍ଧ୍ୱ ଲୋକଙ୍କର ମୃତ୍ୟୁ ହୋଇଥିବା ବେଳେ ଏବେ ଏହାର ରେକର୍ଡ ଭାଙ୍ଗିଛି ଇଟାଲି। ଇଟାଲିରେ ଏବେସୁଦ୍ଧା ୫ ହଜାରରୁ ଉର୍ଦ୍ଧ୍ୱ ଲୋକଙ୍କର କରୋନା ଯୋଗୁ ମୃତ୍ୟୁ ହୋଇଥିବା ଜଣାପଡିଛି। ଯାହା ଏବେ ଇଟାଲି ସରକାରଙ୍କୁ ଚିନ୍ତାରେ ପକାଇଛି। ଅନ୍ୟପଟେ ଏହି ମୃତକଙ୍କର ଶେଷ ସଂସ୍କାର ବି ଇଟାଲି ସରକାରଙ୍କ ପାଇଁ ଆଉ ଏକ ସମସ୍ୟା ହୋଇ ଠିଆ ହୋଇଛି। ସେନାର ସହାୟତାରେ ମୃତକଙ୍କର ସଂସ୍କାର କରାଯାଉଛି। ଆୟାରଲ୍ୟାଣ୍ଡରେ କରୋନା ମୃତକଙ୍କ ସଂସ୍କାର ପାଇଁ ଗାଇଡ୍ ଲାଇନ୍ ଜାରି କରାଯାଇଥିବା ଜଣାପଡିଛି। ସେଠାରେ ମୃତକଙ୍କ ଶରୀରକୁ ଛୁଇଁବା, ଆଲିଙ୍ଗନ କରିବା, ଚୁମ୍ବନ ଦେବା ଏମିତିକି ବିନା ବଡି ବ୍ୟାଗରେ ଦେଖିବାକୁ ବାରଣ କରାଯାଇଛି। ଏହାକୁ ଦେଖି କରୋନା ମୃତକଙ୍କ ପରିବାର ସେମାନଙ୍କ ପ୍ରିୟଜନଙ୍କ ଅନ୍ତିମ ସଂସ୍କାରରେ ଯୋଗ ଦେବାକୁ ଭୟ କରୁଛନ୍ତି ବୋଲି କୁହାଯାଉଛି। ସେହିପରି ଇଟାଲିରେ ବ୍ୟବଚ୍ଛେଦ ଗୃହରେ ପଡିରହିଥିବା ମୃତଦେହ ଗୁଡିକର ଏକ ତାଲିକା ପ୍ରସ୍ତୁତ କରାଯାଇ ସଂସ୍କାର କରାଯିବା ପରେ ତାଙ୍କ ପରିବାର ଲୋକଙ୍କୁ ଏ ସମ୍ପର୍କରେ ଜଣାଇ ଦିଆଯାଉଛି। ଏସବୁ ସଂସ୍କାର ନିର୍ଦ୍ଦିଷ୍ଟ କିଛି ସଂସ୍ଥା ଦ୍ୱାରା କରାଯାଉଥିବା କୁହାଯାଏ। ମାର୍ଚ୍ଚ ୮ରୁ ଇଟାଲିରେ ଲକ୍ଡାଉନ୍ ଘୋଷଣା କରାଯାଇଥିବାରୁ କରୋନାରେ ଯେଉଁମାନଙ୍କ ମୃତ୍ୟୁ ହେଉଛି ସେମାନଙ୍କୁ ତୁରନ୍ତ ବଡି ବ୍ୟାଗରେ ଭର୍ତ୍ତି କରାଯାଇ ହସ୍ପିଟାଲରୁ ତୁରନ୍ତ ସଂସ୍କାର ସ୍ଥଳକୁ ପଠାଇ ଦିଆଯାଉଛି ବୋଲି କୁହାଯାଉଛି। ସେହିପରି ଏଲ୍ ଜଜିରାରେ ଆସିଥିବା ଏକ ରିପୋର୍ଟ ଅନୁଯାୟୀ ଅଧିକାଂଶ ସ୍ଥାନରେ ଲୋକେ ମୃତକଙ୍କ ସଂସ୍କାର ପାଇଁ ଭୟ କରୁଥିବାରୁ ଯେଉଁ ସଂସ୍ଥା ସଂସ୍କାର କରୁଛି ସେ ଭିଡିଓ କଲ୍ ମାଧ୍ୟମରେ ମୃତକଙ୍କ ପରିବାରକୁ ଶେଷ ଦର୍ଶନ କରାଇ ସଂସ୍କାର କାମ ଶେଷ କରୁଛି ବୋଲି ଜଣାପଡିଛି।