ଲଣ୍ଡନ,୧୬ା୫: ବ୍ରିଟେନ୍ରେ କରୋନା ଭାଇରସ୍ ଜନିତ ମୃତ୍ୟୁ ତଥ୍ୟକୁ ଅନୁଧ୍ୟାନ କଲେ ୬୫ ବର୍ଷରୁ କମ୍ ବୟସ୍କଙ୍କ ଜୀବନହାନି ଆଶଙ୍କା ୩୪ଗୁଣ କମ୍ ବୋଲି ଜଣାପଡ଼ିଛି। ବ୍ରିଟେନରେ ଏପର୍ଯ୍ୟନ୍ତ ପ୍ରାୟ ୩୪,୦୦୦ ଲୋକଙ୍କ ଏହି ମହାମାରୀ ଭୂତାଣୁରେ ମୃତ୍ୟୁ ଘଟିଛି। ହେଲେ ଏହି ସଂଖ୍ୟା ଦେଶର ହସ୍ପିଟାଲଗୁଡ଼ିକରେ ଘଟୁଥିବା ମୃତ୍ୟୁକୁ ନେଇ ଆଧାରିତ। ବାସ୍ତବରେ ମୃତ୍ୟୁସଂଖ୍ୟା ଆହୁରି ଅଧିକ ହେବ ବୋଲି ଅନୁମାନ କରାଯାଉଛି।
ହସ୍ତଗତ ମୃତ୍ୟୁସଂଖ୍ୟା ଅନୁଯାୟୀ, ବ୍ରିଟେନରେ ୬୫ ବର୍ଷରୁ କମ୍ ବୟସର ୪,୦୬୬ ଜଣଙ୍କ ଜୀବନହାନି ଘଟିଛି, ଯାହାକି ପ୍ରାୟ ୧୨%। ହେଲେ ବର୍ତ୍ତମାନ ଯାଏ କାର୍ଯ୍ୟରତ ଥିବା ୬୫ ବର୍ଷରୁ କମ୍ ବୟସ୍କଙ୍କ କଥା ଦେଖିଲେ, ପ୍ରତି ୧ ଲକ୍ଷ ଲୋକଙ୍କ ମଧ୍ୟରେ ୮.୪ଜଣଙ୍କ ମୃତ୍ୟୁ ଘଟିଛି। ଏହା ତୁଳନାରେ ୬୫ ବର୍ଷରୁ ଊର୍ଦ୍ଧ୍ୱ ପ୍ରତି ୧ ଲକ୍ଷ ଲୋକଙ୍କ ମଧ୍ୟରୁ ୨୮୬ଜଣଙ୍କ ମୃତ୍ୟୁ ଘଟିଛି। ଏହାର ଅର୍ଥ ହେଉଛି କମ୍ ବୟସ୍କଙ୍କ ଅପେକ୍ଷା ପେନ୍ସନ ଭୋଗୀମାନଙ୍କ ପ୍ରତି କରୋନା ମୃତ୍ୟୁ ବିପଦ ୩୪ ଗୁଣ ଅଧିକ। ସେହିପରି ୪୫ବର୍ଷରୁ କମ୍ ୪୦୧ଜଣଙ୍କ ମୃତ୍ୟୁ ଘଟିଛି, ଯାହାକି ଏହି ବର୍ଗର ୧ ଲକ୍ଷ ଲୋକଙ୍କ ମଧ୍ୟରେ ଜଣଙ୍କର ମୃତ୍ୟୁ ଘଟିଛି। ଜାତୀୟ ପରିସଂଖ୍ୟାନ କାର୍ଯ୍ୟାଳୟ(ଓଏନ୍ଏସ୍) ଅନୁଯାୟୀ, କରୋନା ସଂକ୍ରମିତଙ୍କ ମଧ୍ୟରୁ ଅଧିକାଂଶ ହେଉଛନ୍ତି ୬୫ ବର୍ଷରୁ ଊର୍ଦ୍ଧ୍ୱ ବର୍ଗର, ଯେଉଁଥିରେ ୩୦,୯୭୮ ଜଣଙ୍କ ମୃତ୍ୟୁ ଘଟିଛି।
ପୂର୍ବର ଏକ ଅନୁସନ୍ଧାନରୁ ଜଣାପଡିଥିଲା ଯେ, ବିଟ୍ରେନର କୃଷ୍ଣକାୟ, ଏସୀୟ ଓ ସଂଖ୍ୟାଲଘୁ ସମ୍ପ୍ରଦାୟର ଲୋକମାନେ କରୋନାରେ ଆକ୍ରାନ୍ତ ହେବାର ଅଧିକ ଆଶଙ୍କା ରହିଛି। ଆଉ ଏକ ଅନୁସନ୍ଧାନରୁ ଜଣାପଡ଼ିଛି ଯେ, କରୋନାରେ ମହିଳାଙ୍କ ଅପେକ୍ଷା ପୁରୁଷମାନଙ୍କ ମୃତ୍ୟୁ ଆଶଙ୍କା ଅଧିକ। ନାଗରିକଙ୍କୁ ସୁରକ୍ଷା ଦେବା କ୍ଷେତ୍ରରେ ବୟସ ହେଉଛି ସରକାରଙ୍କ ପାଇଁ ଗୁରୁତ୍ୱପୂର୍ଣ୍ଣ। ଏହାକୁ ଆଧାର କରି ସରକାର ୭୦ ବର୍ଷରୁ ଊର୍ଦ୍ଧ୍ୱ ବୟସ୍କଙ୍କୁ ଘରେ ରହିବାକୁ ପରାମର୍ଶ ଦେଉଛନ୍ତି। ଲିଙ୍ଗ ଅନୁଯାୟୀ ମୃତ୍ୟୁହାର ଦେଖିଲେ, ପ୍ରତି ୧ ଲକ୍ଷ ମହିଳାଙ୍କ ମଧ୍ୟରୁ ୫.୨ଜଣଙ୍କ କରୋନାରେ ମୃତ୍ୟୁ ଘଟିଥିବାବେଳେ ପ୍ରତି ୧ ଲକ୍ଷ ପୁରୁଷଙ୍କ ମଧ୍ୟରୁ ୯.୯ଜଣ ପ୍ରାଣ ହରାଉଛନ୍ତି।
ଅନୁସନ୍ଧାନରୁ ଏହା ମଧ୍ୟ ଜଣାପଡିଛି ଯେ, ମୃତ୍ୟୁହାର ଲୋକଙ୍କ ବୃତ୍ତି ଦ୍ୱାରା ପ୍ରଭାବିତ। ବିଶେଷକରି ସ୍ବାସ୍ଥ୍ୟସେବା ଓ ପରିବହନ କ୍ଷେତ୍ରରେ କାର୍ଯ୍ୟରତ କର୍ମଚାରୀ, ଶ୍ରମିକମାନେ କରୋନା ଭୂତାଣୁ ସଂସ୍ପର୍ଶରେ ଅଧିକ ଆସିଥାନ୍ତି। ଉଲ୍ଲେଖଥାଉ କି ଓଏନ୍ଏସ୍ର ପୂର୍ବ ତଥ୍ୟ ଦର୍ଶାଇଥିଲା ଯେ, ଶାରୀରିକ କାମରେ ନିୟୋଜିତ ସ୍ବଳ୍ପ ବେତନଭୋଗୀମାନଙ୍କ ପ୍ରତି ବିପଦ ଅଧିକ। ଲଣ୍ଡନ ସ୍କୁଲ୍ ଅଫ୍ ହାଇଜିନ ଏବଂ ଟ୍ରପିକାଲ ମେଡିସିନ୍ର ପ୍ରଫେସର ତଥା ମହାମାରୀ ବିଜ୍ଞାନ ବିଶେଷଜ୍ଞ ନେଲ୍ ପର୍ସଙ୍କ କହିବାନୁଯାୟୀ, ପ୍ରାୟତଃ ଧନୀ ଲୋକଙ୍କ ଅପେକ୍ଷା ଶ୍ରମିକ ଶ୍ରେଣୀର ପୁରୁଷ ଓ ମହିଳାଙ୍କ ସ୍ବାସ୍ଥ୍ୟ ଅଧିକ ଖରାପ ରହିଥାଏ। କିନ୍ତୁ ଦେଖିବାକୁ ମିଳୁଛି ଯେ, ଶ୍ରମିକ ଶ୍ରେଣୀର ଚାକିରିରେ ଥିବା ଲୋକମାନେ ଜନସାଧାରଣଙ୍କ ସହ ବିଶେଷ ଭାବେ ଯୋଗାଯୋଗରେ ରହିଥାନ୍ତି। ଉଦାହରଣ ସ୍ବରୂପ, ଟ୍ୟାକ୍ସି ଏବଂ ବସ୍ ଚାଳକମାନଙ୍କ କରୋନା ମୃତ୍ୟୁହାର ବହୁତ ଅଧିକ ଥିବାବେଳେ ସେହି ତୁଳନାରେ ଭାରି ଟ୍ରକ୍ ଡ୍ରାଇଭରମାନଙ୍କ ପ୍ରତି ସେଭଳି ବିପଦ ନାହିଁ।