ବନ୍ତ,୧୬ା୪(ଡି.ଏନ୍.ଏ.) : ମହାମାରୀ କରୋନା ଲକ୍ଡାଉନ୍ ସମୟରେ ରାତିରେ ଲୋକେ ଘରୁ ବାହାରକୁ ବାହାରିବା ପାଇଁ ଭୟ କରୁଥିବା ବେଳେ ଭଦ୍ରକ ଜିଲା ବନ୍ତ ବ୍ଲକର ୨ ମହିଳା ଅଧିକାରୀ ଲୋକମାନଙ୍କ ସୁରକ୍ଷା ପାଇଁ ରାତିରେ ଘୂରି ବୁଲୁଛନ୍ତି। ଏହି ଦୁଇ ମହିଳା ଅଧିକାରୀଙ୍କ କର୍ତ୍ତବ୍ୟନିଷ୍ଠା ପାଇଁ ଜିଲା ପ୍ରଶାସନ ଧନ୍ୟବାଦ ଦେଇଛି।
ସୂଚନାଯୋଗ୍ୟ, କେନ୍ଦ୍ର ଓ ରାଜ୍ୟ ସରକାର କରୋନା ମହାମାରୀକୁ ରୋକିବା ନେଇ ଲକ୍ଡାଉନ୍ ଭଳି ଏକମାତ୍ର ପନ୍ଥା ଅବଲମ୍ବନ କରିଛନ୍ତି। ଏହି ଆଇନକୁ କଡ଼ାକଡ଼ି ପାଳନ କରିବା ନେଇ ସମସ୍ତ ଜିଲା ପ୍ରଶାସନକୁ ନିର୍ଦ୍ଦେଶ ହୋଇଛି। ଏହି ପରିପ୍ରେକ୍ଷୀରେ ବନ୍ତ ତହସିଲଦାର ଇନ୍ଦିରା ସାହୁ, ଥାନାଧିକାରୀ ମୀନା ବିନ୍ଧାଣୀ ଲକ୍ଡାଉନ୍ ଆଇନକୁ କଡ଼ାକଡ଼ି ପାଳନ କରୁଥିବା ଦେଖାଯାଇଛି।ବନ୍ତ ସଦର ମହକୁମା ସମେତ ବିଭିନ୍ନ ମୁଖ୍ୟ ଛକ, ପ୍ରବେଶ ପଥରେ ନିଜେ ଉପସ୍ଥିତ ରହି ଆଇନ ଉଲ୍ଲଂଘନକାରୀଙ୍କୁ ସାବାଡ୍ କରୁଛନ୍ତି। ବୁଧବାର ରାତିରେ ୨ ମହିଳା ଅଧିକାରୀ ପୋଲିସ କର୍ମଚାରୀଙ୍କ ସହିତ ବାଇକ୍ ଧରି ବନ୍ତରୁ ବାହାରି ବିଭିନ୍ନ ଗ୍ରାମରେ ପାଟ୍ରୋଲିଂ କରିଥିଲେ। ସେହିପରି ଲକ୍ଡାଉନ୍ ସମୟରେ ବିଡିଓ ରେବେକା ବିଲୁଙ୍ଗ, ଅତିରିକ୍ତ ତହସିଲଦାର ବନିତାରାଣୀ କିସ୍କୁ, ଆଗରପଡ଼ା ଥାନାଧିକାରୀ ସୁକାନ୍ତି କେରେଇଙ୍କର ଉଲ୍ଲେଖନୀୟ ଭୂମିକା ରହିଛି ବୋଲି ସାଧାରଣରେ ମତ ପ୍ରକାଶ ପାଇଛି।