ନୂଆଦିଲ୍ଲୀ, ୨୮-୨: କରୋନା ଯୋଗୁ ବିଶ୍ୱ ବଜାରର ନକାରାତ୍ମକ ପ୍ରଭାବ ପଡିପାରେ। ଏହାକୁ ନେଇ ଶିଳ୍ପ ଜଗତ ଆଶଙ୍କା ପ୍ରକଟ କରିଛି। କରୋନା ପ୍ରଭାବରେ ବିଶ୍ୱ ଅଭିବୃଦ୍ଧି ୩୦ ବେସିସ୍ ପଏଣ୍ଟ କ୍ଷତିଗ୍ରସ୍ତ ହେବାର ଆଶଙ୍କା ରହିଛି। ଫଳରେ ସାରା ବିଶ୍ୱକୁ ୨୫୦ ବିଲିୟନ ଡଲାରର ଝଟକା ଲାଗିପାରେ ବୋଲି ଶିଳ୍ପସଂଘ ପିଏଚ୍ଡିସିସିଆଇ ଗୁରୁବାର କହିଛି। ପିଏଚ୍ଡିସିସିଆଇ ସଭାପତି ଡି.କେ. ଅଗ୍ରଓ୍ବାଲ କହିଛନ୍ତି ଯେ, କରୋନା ଯୋଗୁ ଚାଇନାର ଯୋଗାଣ ଚେନ୍ କେବଳ ପ୍ରଭାବିତ ହୋଇନାହିଁ। ଅନ୍ୟ ଦେଶଗୁଡିକ ଉପରେ ଏହାର ପ୍ରଭାବ ପରିଲକ୍ଷିତ ହୋଇଛି। ଆମଦାନୀ କରୁଥିବା ଦେଶଗୁଡିକର ରପ୍ତାନି ମଧ୍ୟ ପ୍ରଭାବିତ ହୋଇଛନ୍ତି। ଚାଇନାକୁ ଯେଉଁ ଦେଶଗୁଡିକ କଞ୍ଚାମାଲ ଆମଦାନୀ କରିବା ସହ ସାମଗ୍ରୀ ଅନ୍ୟ ଦେଶକୁ ରପ୍ତାନି କରୁଥିଲେ ସେମାନେ ଏଭଳି ସମସ୍ୟା ଦ୍ୱାରା ବିଶେଷ ଭାବେ କ୍ଷତିଗ୍ରସ୍ତ ହୋଇଛନ୍ତି।
ଏଭଳି ସ୍ଥିତିରେ ଦେଶ ମଧ୍ୟରେ ଚାହିଦା ବଢାଇବାର ଆବଶ୍ୟକତା ରହିଛି ବୋଲି ସେ ମତବ୍ୟକ୍ତ କରିଛନ୍ତି। ଫାର୍ମା, ସୋଲାର, ଲୁହା, ଇସ୍ପାତ ଭଳି କ୍ଷେତ୍ର ବର୍ତ୍ତମାନ ପ୍ରଭାବିତ ସ୍ଥିତିରେ ରହିଛି। ବିଶ୍ୱ ବାଣିଜ୍ୟ କ୍ଷେତ୍ରରେ ଚାଇନା ଏକ ପ୍ରମୁଖ ଅଂଶୀଦାର ରହି ଆସିଛି। ସାରା ବିଶ୍ୱର ମର୍ଚ୍ଚାଣ୍ଡାଇଜ ରପ୍ତାନିର ୧୩% ଅଂଶ ଏହା ହାସଲ କରିଛି। ଆମେରିକା, ହଂକଂ, ଜାପାନ, କୋରିଆ, ଭିଏତନାମ, ଜର୍ମାନୀ, ଭାରତ, ନେଦରଲାଣ୍ଡ ଭଳି ଅନ୍ୟ ଦେଶଗୁଡିକୁ ଏହା ରପ୍ତାନି କରୁଛି। ବିଶ୍ୱ ସ୍ତରରେ ବାଣିଜ୍ୟ କାରବାର ପ୍ରଭାବିତ ହେଲେ ଏହା ବିଶ୍ୱର ଅଭିବୃଦ୍ଧିକୁ ମଧ୍ୟ କ୍ଷତି ପହଞ୍ଚାଇବ ବୋଲି ଅଗ୍ରଓ୍ବାଲ ମତ ଦେଇଛନ୍ତି। କରୋନାର ପ୍ରଭାବ କେତେ ସମୟ ଯାଏ ରହିବ ତାହା ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ। ବଜାର ଅଂଶକୁ ପୁନଃ ହାସଲ କରିବା ଲାଗି ଭାରତ ଏହାର ଯୋଗାଣ ଚେନ୍କୁ ବଢାଇବାର ଆବଶ୍ୟକତା ରହିଛି। ଏହାବାଦ ଇଜ୍ ଅଫ୍ ଡୁଇଁ ବିଜନେସ, ବାଣିଜ୍ୟ ପ୍ରତିଦ୍ୱନ୍ଦ୍ୱିତା ଏବଂ ସୁବିଧା ଯୋଗାଣ ଭଳି ପ୍ରସଙ୍ଗକୁ ଦେଖିବାକୁ ହେବ ବୋଲି ସେ ମତ ବ୍ୟକ୍ତ କରିଛନ୍ତି।