ଭୋପାଳ,୯।୪: ମଧ୍ୟପ୍ରଦେଶର ଭୋପାଳରେ ଏବେ କରୋନା ସଂକ୍ରମିତଙ୍କ ସଂଖ୍ୟା ୯୩ରେ ପହଞ୍ଚିଛି। ଏମାନଙ୍କ ମଧ୍ୟରୁ ୫୦ ଜଣ ସ୍ବାସ୍ଥ୍ୟ କର୍ମଚାରୀ ଥିବା ବେଳେ ୧୨ ପୋଲିସ ଥିବା ସୂଚନା ମିଳିଛି। ଏହି କରୋନା ଯୋଦ୍ଧାମାନେ ଏବେ ଏଭଳି ମହାମାରୀ କବଳରୁ ମୁକ୍ତ ହେବାକୁ କରୁଛନ୍ତି ସଂଘର୍ଷ। ଅବଶିଷ୍ଟ ୨୦ ଜଣଙ୍କର ନିଜାମୁଦ୍ଦିନରେ ଆୟୋଜିତ ତବଲିଘି ଜମାତ୍ ସହ ସମ୍ପର୍କ ଥିବାବେଳେ ଅନ୍ୟ ୮ ସାଧାରଣ ଲୋକ ବୋଲି ଜଣାପଡିଛି। ଭୋପାଳ ଜିଲାପାଳ ତରୁଣ ପିଥୋଡେ ଏହି ସୂଚନା ଦେଇଛନ୍ତି। ତେବେ ଡାକ୍ତର, ନର୍ସ ଓ ପୋଲିସ କରୋନାରେ ଏତେ ମାତ୍ରାରେ ସଂକ୍ରମିତ ହେବା ଭୋପାଳ ଲୋକଙ୍କୁ ଚିନ୍ତାରେ ପକାଇ ଦେଇଛି। ଭୋପାଳରେ ଏବେ ସୁଦ୍ଧା ୨ ଜଣ ସୁସ୍ଥ ହୋଇ ଫେରିଥିବା ବେଳେ ଜଣଙ୍କର କରୋନା ସଂକ୍ରମଣରେ ମୃତ୍ୟୁ ହୋଇଛି। ଏହାସହ ୧୨ ଜଣ ସେମାନଙ୍କ ଘରେ କ୍ୱାରାଣ୍ଟାଇନରେ ରହିଛନ୍ତି। ସୂଚନାଯୋଗ୍ୟ, ମଧ୍ୟପ୍ରଦେଶରେ ଏବେ କରୋନା ସଂକ୍ରମିତଙ୍କ ସଂଖ୍ୟା ୨୨୯ରେ ପହଞ୍ଚିଥିବା ବେଳେ ୧୩ ଜଣଙ୍କ ମୃତ୍ୟୁ ହୋଇଛି।