ଭୋପାଳ,୨୩।୪: କରୋନା ଭାଇରସ ସାରା ଦେଶର ଚିନ୍ତାକୁ ବଢାଇ ଚାଲିଥିବା ବେଳେ ଏବେ ଏହାସହ ସିଧାସଳଖ ଲଢୁଥିବା ଲୋକଙ୍କୁ ଆମେ କରୋନା ଯୋଦ୍ଧା ବୋଲି କହୁଛୁ। ହେଲେ ଏହି କରୋନା ଯୋଦ୍ଧା କେତେ ସୁରକ୍ଷିତ ତାହା ବେଳେ ବେଳେ ପ୍ରଶ୍ନବାଚୀ ସୃଷ୍ଟି କରୁଛି। ମଧ୍ୟପ୍ରଦେଶର ଭୋପାଳରେ ଦେଖିବାକୁ ମିଳିଛି ଏମିତି କିଛି ଚିତ୍ର ଯାହା କରୋନା ଯୋଦ୍ଧାଙ୍କ ସୁରକ୍ଷାକୁ ନେଇ ପ୍ରଶ୍ନ ଉଠାଇଛି। ସଫେଇ କର୍ମଚାରୀମାନେ କରୋନା ଯୋଦ୍ଧାର ମାନ୍ୟତା ପାଇଛନ୍ତି ସତ କିନ୍ତୁ ନା ସେମାନଙ୍କ ପାଖରେ ଅଛି ସାନିଟାଇଜର ନା ଅଛି ହ୍ୟାଣ୍ଡ ଗ୍ଲୋଭ୍ସ। ପୂର୍ବପରି ଏମାନେ ଘରର ଆବର୍ଜ୍ଜନା ଉଠାଇବା ସହ ହସ୍ପିଟାଲର ଆବର୍ଜନା ମଧ୍ୟ ଖାଲି ହାତରେ ଉଠାଉଥିବା ଦେଖାଯାଇଛି। ତାହାପୁଣି ଦିନକୁ ମାତ୍ର ୧୮୬ ଟଙ୍କା ପାରିଶ୍ରମିକରେ। ଏମାନଙ୍କର ମାସିକ ଦରମା ୫,୬୦୦ରହିଛି। ସବୁଠାରୁ ବଡକଥା ହେଲା ପାରିଶ୍ରମିକ ପୂର୍ବ ନିର୍ଦ୍ଧାରିତ ଥିବା ବେଳେ ଏମାନଙ୍କ ପାଇଁ କୌଣସି ସୁରକ୍ଷା ବ୍ୟବସ୍ଥା ନାହିଁ। ପ୍ରଥମେ ଆମକୁ କରୋନା ଭୟ ଥିଲା କିନ୍ତୁ ଏବେ ଆଉ ଡର ଲାଗୁନି ବୋଲି କୁହନ୍ତି କେତେଜଣ ସଫେଇ କର୍ମଚାରୀ। ତେବେ ଘର ଚଳାଇବା ପାଇଁ କାମ କରିବା ଆବଶ୍ୟକ ବୋଲି ସେମାନେ ପୂର୍ବପରି ସକାଳୁ ଆସି କାମରେ ଲାଗି ଯାଆନ୍ତି ବୋଲି କୁହନ୍ତି। ଏବେ କରୋନାକୁ ନେଇ ଦେଶରେ ଲକ୍ଡାଉନ ଚାଲିଥିବାରୁ ସବୁ ଦୋକାନ ବଜାର ବନ୍ଦ। ତେଣୁ କାମ କରିବା ସମୟରେ ଏମାନେ ପାଣି ଟିକେ ମଧ୍ୟ କାହାକୁ ମାଗି ପାରୁ ନାହାନ୍ତି ବୋଲି କୁହନ୍ତି। ପୋଲିସ ଓ ସ୍ବାସ୍ଥ୍ୟକର୍ମୀମାନଙ୍କ ଭଳି ଏମାନେ ମଧ୍ୟ କରୋନା ଯୁଦ୍ଧରେ ଲଢୁଥିବା ପ୍ରକାଶ କରିଛନ୍ତି।