ଚୌଦ୍ୱାର,୨୬ା୫(ଡି.ଏନ୍.ଏ.): କରୋନା ଯୋଗୁ ସମଗ୍ର ରାଜ୍ୟରେ ଲକ୍ଡାଉନ ଜାରି ରହିଥିବା ବେଳେ କିଛି ଦିନ ସଟ୍ଡାଉନ ମଧ୍ୟ ଥିଲା। ଏହି ସମୟରେ କଟକ ଜିଲା ଚୌଦ୍ୱାର ସହରବାସୀଙ୍କୁ ସ୍ବାସ୍ଥ୍ୟ ସେବା ଯୋଗାଇ ଆସୁଥିବା ଡା. ରବିନ୍ଦ୍ର କୁମାର ମହାପାତ୍ରଙ୍କୁ ଓଡ଼ିଶା ବାପ୍ଟିଷ୍ଟ ଚର୍ଚ୍ଚ ତରଫରୁ କରୋନା ଯୋଦ୍ଧା ଭାବେ ମଙ୍ଗଳବାର ସମ୍ବର୍ଦ୍ଧିତ କରାଯାଇଛି।
ଲକ୍ଡାଉନ ସମୟରେ ଚୌଦ୍ୱାର ସହରର ସମସ୍ତ ଘରୋଇ ନର୍ସିଂହୋମ ବନ୍ଦ ରହିଥିଲା। ଏହି ସମୟରେ ରୋଗୀମାନେ ନାହଁି ନଥିବା ଅସୁବିଧାର ସମ୍ମୁଖୀନ ହେଉଥିଲେ। ଏହି ସମୟରେ ସହରାଞ୍ଚଳ ସ୍ବାସ୍ଥ୍ୟକେନ୍ଦ୍ର ଚୌଦ୍ୱାର ଶାଖାରେ କର୍ତ୍ତବ୍ୟରତ ଡା.ମହାପାତ୍ର ଦିନକୁ ୨ବେଳା ୧୫୦ରୁ ଊର୍ଦ୍ଧ୍ୱ ରୋଗୀଙ୍କ ଚିକିତ୍ସା କରିବା ସହିତ ସ୍ବାସ୍ଥ୍ୟକେନ୍ଦ୍ର ତରଫରୁ ମାଗଣାରେ ଓଷଧ ପ୍ରଦାନ କରୁଥିଲେ। ଆଜିର ଏହି ସମ୍ବର୍ଦ୍ଧନା କାର୍ଯ୍ୟକ୍ରମରେ ଚର୍ଚ୍ଚର ସାମସନ୍ ରାଉତ, ଅରୁଣ କୁମାର ପାଢୀ, ଆଲୋକ କୁମାର ସାହୁ, ପରମ ସୁରଞ୍ଜନ ଦାସ୍, ଯୋନାଥନ୍ ସାହୁ, ନରେନ ଦାସ ପ୍ରମୁଖ ଉପସ୍ଥିତ ଥିଲେ।