ନୂଆଦିଲ୍ଲୀ,୨୫ା୪: ସେପ୍ସିସ୍ ରୋଗର ଚିକିତ୍ସା ପାଇଁ ବ୍ୟବହୃତ ଔଷଧକୁ ଗୁରୁତର କୋଭିଡ୍-୧୯ ରୋଗୀଙ୍କଠାରେ ପରୀକ୍ଷାମୂଳକ ଭାବେ ପ୍ରୟୋଗ କରିବା ଲାଗି ନିଷ୍ପତ୍ତି ହୋଇଛି। ଦେଶର ତିନୋଟି ପ୍ରମୁଖ ହସ୍ପିଟାଲ ଦିଲ୍ଲୀ ଏମ୍ସ, ଭୋପାଳ ଏମ୍ସ ଏବଂ ଚଣ୍ଡିଗଡ଼ର ପିଜିଆଇଏମ୍ଇଆର୍ରେ ଏହି ଔଷଧର ପରୀକ୍ଷା କରାଯିବ। ଉପରୋକ୍ତ ୩ ହସ୍ପିଟାଲରେ ୫୦ ଜଣ ଗୁରୁତର କରୋନା ରୋଗୀ ଇଣ୍ଟେନ୍ସିଭ୍ କେୟାର ୟୁନିଟ୍ରେ ରହିଛନ୍ତି। ସେମାନଙ୍କୁ ସେପ୍ସିଭାକ୍ର ସାମାନ୍ୟ ଡୋଜ୍ (୦.୩ ଏମ୍ଏଲ୍) ଇଣ୍ଟର-ଡର୍ମାଲ ଇଞ୍ଜେକ୍ଶନ ଭାବେ ଦିଆଯିବ। ଏହା ଗୁରୁତର କରୋନା ରୋଗୀଙ୍କ ମୃତ୍ୟୁହାର କମାଇବା ସହ ସେମାନଙ୍କୁ ତୁରନ୍ତ ଭଲ କରିପାରିବ ବୋଲି ଆଶା କରାଯାଉଛି। ସେଥିପାଇଁ ସ୍ବାସ୍ଥ୍ୟସେବା ମହାନିର୍ଦ୍ଦେଶାଳୟ ଏବଂ କେନ୍ଦ୍ରୀୟ ଔଷଧ ମାନ ନିୟନ୍ତ୍ରଣ ସଂସ୍ଥା ଉପରୋକ୍ତ ହସ୍ପିଟାଲକୁ ଔଷଧର କ୍ଲିନିକାଲ ପରୀକ୍ଷା ପାଇଁ ବାଛିଛନ୍ତି। ୨୦୦୭ରେ କାଉନ୍ସିଲ ଅଫ୍ ସାଇଣ୍ଟିଫିକ୍ ଆଣ୍ଡ ଇଣ୍ଡଷ୍ଟ୍ରିଆଲ ରିସର୍ଚ୍ଚ (ସିଏସ୍ଆଇଆର୍) ଏବଂ ଅହମଦାବାଦର ଔଷଧ କମ୍ପାନୀ କାଡିଲା ଫାର୍ମାସ୍ୟୁଟିକାଲ୍ସ ଲିଃ ମିଳିତ ଭାବେ ସେପ୍ସିଭାକ୍ ପ୍ରସ୍ତୁତ କରିଥିଲେ। ରକ୍ତ ସଂକ୍ରମଣ ଜନିତ ରୋଗ ସେପ୍ସିସ୍ ଚିକିତ୍ସା କ୍ଷେତ୍ରରେ ଏହା ଗେମ୍ ଚେଞ୍ଜର ସାବ୍ୟସ୍ତ ହୋଇଥିଲା।