ଓଡ଼ାପଡ଼ା, ୧୦।୪(ଡି.ଏନ.ଏ.): ସମଗ୍ର ବିଶ୍ୱ କୋଭିଡ୍-୧୯ ଭୂତାଣୁ ସହ ଲଢୁଥିବାବେଳେ ଟାଟାଷ୍ଟିଲ ବିଏସ୍ଏଲ୍ ସହାୟତାରେ ଆଖପାଖ ଗଁାର ମହିଳା ସଦସ୍ୟମାନେ କରୋନା ମୁକାବିଲା ପାଇଁ ଅଣ୍ଟା ଭିଡ଼ିଛନ୍ତି। କମ୍ପାନୀ ସହଯୋଗରେ ଗୃହଲକ୍ଷ୍ମୀ କୋଅପରେଟିଭ୍ ଏଚ୍ଏଚ୍ଜି ତରଫରୁ ହିନ୍ଦୋଳ ବ୍ଲକ ନୂଆଗାଁ, କୁରୁଣ୍ଟି, ଅସନବଣି ଗ୍ରାମରେ ୨୦ରୁ ଊର୍ଦ୍ଧ୍ୱ ମହିଳା ମାସ୍କ ତିଆରି କାମରେ ଲାଗି ପଡ଼ିଛନ୍ତି। ଟାଟାଷ୍ଟିଲ ବିଏସ୍ଏଲ୍ ପକ୍ଷରୁ ମହିଳାଙ୍କୁ କପଡ଼ା ଯୋଗାଇ ଦିଆଯାଇଛି। ପ୍ରଥମ ପର୍ଯ୍ୟାୟରେ ୨୦ହଜାର ମାସ୍କ ତିଆରି କରିବା ଯୋଜନା ଥିବାବେଳେ ବର୍ତ୍ତମାନସୁଦ୍ଧା ୧୩ ହଜାର ମାସ୍କ ତିଆରି ସରିଲାଣି। ମହିଳାମାନେ ହାତ ତିଆରି ମାସ୍କକୁ ଅଞ୍ଚଳବାସୀଙ୍କୁ ଯୋଗାଇ ଦେଉଛନ୍ତି। କେବଳ ଏତିକି ନୁହେଁ, କମ୍ପାନୀ ପକ୍ଷରୁ କୁସୁପଙ୍ଗା, ନୂଆଗଁା, ଶିବପୁର, ମଙ୍ଗଳପୁର, ପାଇକ ପୁରୁଣାକୋଟ ପଞ୍ଚାୟତ, ଅନୁଗୋଳ ଜିଲା ନୂଆହାଟ ପଞ୍ଚାୟତର ଅଙ୍ଗନଓ୍ବାଡି କର୍ମୀ, ସ୍ବାସ୍ଥ୍ୟକର୍ମୀ, ପୋଲିସ କର୍ମଚାରୀ, ସଫେଇ କାମରେ ନିୟୋଜିତ କର୍ମଚାରୀଙ୍କୁ ମାସ୍କ ବଣ୍ଟନ କରାଯାଇଛି। କମ୍ପାନୀର ଓମେନ ଏମ୍ପାଓ୍ବାରମେଣ୍ଟ ଆଣ୍ଡ୍ ଏଣ୍ଟ୍ରେପ୍ରିନିୟରଶିପ୍ କାର୍ଯ୍ୟକ୍ରମ ଅଧୀନରେ କାରଖାନା ପାର୍ଶ୍ୱବର୍ତ୍ତୀ ଗ୍ରାମର ମହିଳାଙ୍କୁ ସଶକ୍ତ କରିବା ଦିଗରେ ଏପରି ବହୁବିଧି ପଦକ୍ଷେପ ଗ୍ରହଣ କରାଯାଉଛି।