ନୂଆଦିଲ୍ଲୀ,୧୪ା୪(ପି.ଟି.): କରୋନା ବିରୋଧୀ ଲଢ଼େଇରେ ଶସ୍ତା ପୋର୍ଟେବଲ୍ ଭେଣ୍ଟିଲେଟରଠାରୁ ଆରମ୍ଭ କରି ଡ୍ରୋନ୍, ରୋବୋ ଏବଂ ସ୍ବତନ୍ତ୍ର ଷ୍ଟେଥୋସ୍କୋପ୍ ବ୍ୟବହାର କରାଯାଉଛି। ସାନିଟାଇଜେଶନରେ ଡ୍ରୋନ୍କୁ ବ୍ୟବହାର କରାଯାଇଥିବାବେଳେ ଖାଦ୍ୟ ଓ ଔଷଧ ଯୋଗାଣରେ ରୋବୋ ଏବଂ ଦୂରତା ରକ୍ଷା କରି ରୋଗୀଙ୍କୁ ଯାଞ୍ଚ କରିବାରେ ସ୍ବତନ୍ତ୍ର ଷ୍ଟେଥୋସ୍କୋପ୍ର ସହାୟତା ନିଆଯାଉଛି। କୋଭିଡ୍-୧୯ ବିରୋଧୀ ଲଢ଼େଇକୁ ଅଧିକ ଶକ୍ତିଶାଳୀ କରିବା ଲାଗି ବିଭିନ୍ନ ଅନୁଷ୍ଠାନ ଓ ଷ୍ଟାର୍ଟଅପ୍ମାନେ ଭିନ୍ନ ଭିନ୍ନ ଇନୋଭେଶନ ସହିତ ଆଗେଇ ଆସିଛନ୍ତି। ସେଗୁଡ଼ିକ ମଧ୍ୟରେ ରହିଛି ହସ୍ପିଟାଲରେ ବ୍ୟବହାର ପାଇଁ ସ୍ବତନ୍ତ୍ର ସଂକ୍ରମଣ ନିରୋଧୀ କପଡ଼ା, ଶସ୍ତା କରୋନା ପରୀକ୍ଷା ଉପକରଣ, ସଂକ୍ରମିତଙ୍କ ପାଇଁ ଆଇସୋଲେଶନ ପଡ୍, ପାରମ୍ପରିକ ଅକ୍ସିଜେନ୍ ମାସ୍କ ବଦଳରେ ବବଲ୍ ହେଲମେଟ୍ ଏବଂ ସାମାଜିକ ଦୂରତ୍ୱର ଉଲ୍ଲଂଘନ ହେଲେ ସତର୍କ କରିବା ଲାଗି ପେଣ୍ଡାଣ୍ଟ। ସେହିପରି ସଂକ୍ରମିତଙ୍କ ସଂସ୍ପର୍ଶରେ କେଉଁମାନେ ଆସିଛନ୍ତି ଖୋଜି ବାହାର କରିବା, ସେମାନଙ୍କ ପ୍ରତି ସଂକ୍ରମଣର କେତେ ବିପଦ ରହିଛି, ତାହା ଆକଳନ କରିବା ଲାଗି ‘ଗୋ କରୋନା ଗୋ’ଠାରୁ ଆରମ୍ଭ କରି ‘ସମ୍ପର୍କ-ଓ-ମିଟର’ ମୋବାଇଲ ଆପ୍ଲିକେଶନ୍ର ବିକାଶ କରାଯାଇଛି। ଦେଶର କେତେକ ଆଇଆଇଟି ଏବଂ ବେଙ୍ଗାଲୁରୁସ୍ଥିତ ଇଣ୍ଡିଆନ ଇନ୍ଷ୍ଟିଚ୍ୟୁଟ ଅଫ୍ ସାଇନ୍ସ ଏହି ଆପ୍ଲିକେଶନ ପ୍ରସ୍ତୁତ କରିଛନ୍ତି।
କରୋନା ପ୍ରତିଷେଧକ ଟିକା ପ୍ରସ୍ତୁତିରେ ୨୦ରୁ ଅଧିକ ବୈଷୟିକ ଓ ବିଜ୍ଞାନ ଅନୁଷ୍ଠାନ ନିୟୋଜିତ ହୋଇଛନ୍ତି। ପ୍ରମୁଖ ଆଇଆଇଟିଗୁଡ଼ିକ ସ୍ବତନ୍ତ୍ର କୋଭିଡ୍-୧୯ ଗବେଷଣା କେନ୍ଦ୍ର ସ୍ଥାପନ କରିଛନ୍ତି। କରୋନା ବିରୋଧୀ ଲଢ଼େଇରେ ବ୍ୟବହାର ପାଇଁ ଆଇଆଇଟି ଗୁଆହାଟୀ ପକ୍ଷରୁ ବିଭିନ୍ନ ପ୍ରକାର ଡ୍ରୋନ୍ର ବିକାଶ କରାଯାଇଛି। ଗୋଟିଏ ପ୍ରକାର ଡ୍ରୋନରେ ବ୍ୟାପକ ଅଞ୍ଚଳକୁ ବିଶୋଧନ କରାଯାଇପାରୁଥିବାବେଳେ ଅନ୍ୟ ଡ୍ରୋନ୍ରେ ଇନ୍ଫ୍ରାରେଡ୍ କ୍ୟାମେରା ଲାଗିଛି। ଏହା ଏକସଙ୍ଗେ ଏକାଧିକ ଲୋକଙ୍କର ଥର୍ମାଲ ସ୍କ୍ରିନିଂ କରି କରୋନା ସନ୍ଦିଗ୍ଧଙ୍କୁ ଚିହ୍ନଟ କରିପାରିବ। ଏହି ଶିକ୍ଷାନୁଷ୍ଠାନର ଅନ୍ୟ ଏକ ଟିମ୍ ଦୁଇଟି ରୋବୋ ପ୍ରସ୍ତୁତ କରିଛନ୍ତି।