ବେଜିଂ,୨୫।୪: ସାରା ପୃଥିବୀରେ କରୋନା ସଂକ୍ରମଣ କରାଇଥିବା ଚାଇନା ଏବେ ସାଇବର ଯୁଦ୍ଧ ପାଇଁ ପ୍ରସ୍ତୁତି ଆରମ୍ଭ କରିଛି। କରୋନା ଯୋଗୁ ବହୁ ଦେଶର ଆର୍ଥିକ ମେରୁଦଣ୍ଡ ଦୋହଲି ଯାଇଥିବାବେଳେ ଚାଇନା ନିଜର ବିସ୍ତାରବାଦୀ ନୀତିକୁ ପ୍ରୋତ୍ସାହନ ଦେବାରେ ଲାଗିଛି। କରୋନା ଯୋଗୁ ଖରାପ ଆର୍ଥିକ ସ୍ଥିତିରେ ପହଞ୍ଚିଥିବା କମ୍ପାନୀଗୁଡ଼ିକୁ ଚାଇନା ହାତେଇବା ଲାଗି ଉଦ୍ୟମ ଆରମ୍ଭ କରିଛି। ଏହା ସହିତ ପାକିସ୍ତାନ ଭଳି ଦେଶକୁ ଚାଇନା ଟାଗେର୍ଟ କରିଛି। ଏସବୁ ଦେଶରେ ନିଜର କାରବାର ଯୋଜନାକୁ ବୃଦ୍ଧି କରାଇବା ଲାଗି ଉଦ୍ୟମ ଅବ୍ୟାହତ ରହିଛି। ଚାଇନା ରାଷ୍ଟ୍ରପତି ଜି ଜିନ୍ପିଙ୍ଗ୍ ଦେଶର ମହାକାଶ ଦିବସ ଅବସରରେ ମଙ୍ଗଳ ମିଶନ ଉପରେ ଗୁରୁତ୍ୱାରୋପ କରିଛନ୍ତି। ଏହି ମିଶନର ନାମକରଣ ତିୟାନବେନ୍-୧ ଭାବେ କରାଯାଇଛି। ଏହା ସହିତ ସର୍ବବୃହତ୍ ସ୍ପେସ୍ ଟେଲିସ୍କୋପ୍, ଓଜନିଆ ରକେଟ ଓ ସ୍ପେସ୍ ଷ୍ଟେଶନ ନିର୍ମାଣ ପାଇଁ ଚାଇନା ଯୋଜନା କରୁଛି। ଆସନ୍ତା ୫ ବର୍ଷ ମଧ୍ୟରେ କିଭଳି ସୁପର ପାଓ୍ବାର ହୋଇ ପାରିବ ସେ ନେଇ ଚାଇନା ଉଦ୍ୟମ ଆରମ୍ଭ କରିଛି।
