ନୂଆଦିଲ୍ଳୀ,୧୩।୮(ପି.ଟି.): କେତୋଟି କୋଭିଡ୍-୧୯ ମାମଲା ସତ୍ତ୍ୱେ ଅଗଷ୍ଟ ୧୯ ତାରିଖରୁ ଭାରତୀୟ ଜାତୀୟ ହକି ଦଳ ପାଇଁ ଟ୍ରେନିଂ କ୍ୟାମ୍ପ ଆରମ୍ଭ ହେବ। ଅଧିନାୟକ ମନପ୍ରୀତ୍ ସିଂଙ୍କ ସମେତ ଭାରତୀୟ ଦଳର ଅଧ ଡଜନ ଖେଳାଳି କୋଭିଡ୍-୧୯ ଟେଷ୍ଟରେ ପଜିଟିଭ୍ ବୋଲି ଜଣାପଡିଥିଲା। ତେବେ ଏହା ଟ୍ରେନିଂ କ୍ୟାମ୍ପକୁ ପ୍ରଭାବିତ କରିବନି। ବେଙ୍ଗାଲୁରୁସ୍ଥିତ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ସେଣ୍ଟରରେ ଉଭୟ ପୁରୁଷ ଓ ମହିଳା ଦଳଗୁଡିକର ଟ୍ରେନିଂ କ୍ୟାମ୍ପ ଆରମ୍ଭ ହେବ। ଖେଳାଳିମାନେ ୧୪ ଦିନିଆ କ୍ୱାରାଣ୍ଟାଇନ୍ ଶେଷ କରିବା ପରେ କ୍ୟାମ୍ପ ଆରମ୍ଭ ହେବ ବୋଲି ସାଇ ତରଫରୁ ବୁଧବାର କୁହାଯାଇଛି। ହକି ଇଣ୍ଡିଆ ଅଧିକାରୀ ଓ ଉଭୟ ଦଳର ମୁଖ୍ୟ କୋଚ୍ ସହ ଆଲୋଚନା କରିବା ପରେ ଏହି ନିଷ୍ପତ୍ତି ନିଆଯାଇଛି ବୋଲି କୁହାଯାଇଛି।
ଆଥଲେଟମାନଙ୍କ ସ୍ବାସ୍ଥ୍ୟଗତ ସୁରକ୍ଷା ଓ ନିରାପତ୍ତାକୁ ପ୍ରଧାନ୍ୟ ଦିଆଯିବା ପରେ କ୍ରୀଡ଼ା କାର୍ଯ୍ୟକଳାପକୁ ଆରମ୍ଭ କରିବା ପାଇଁ ନିଷ୍ପତ୍ତି ନିଆଯାଇଛି। ତେଣୁ ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ବେଙ୍ଗାଲୁରୁର ସାଇ ନ୍ୟାଶନାଲ ସେଣ୍ଟର ଅଫ୍ ଏକ୍ସିଲେନ୍ସରେ କ୍ୟାମ୍ପ ଆରମ୍ଭ ହେବ ବୋଲି ସାଇ ତରଫରୁ କୁହାଯାଇଛି। ୬ଜଣ ପୁରୁଷ ହକି ଖେଳାଳି ଟେଷ୍ଟରେ ପଜିଟିଭ୍ ବୋଲି ଜଣାପଡିବା ପରେ ପୁରୁଷ କ୍ୟାମ୍ପ ଆୟୋଜନ ନେଇ ଅନିଶ୍ଚିତତା ସୃଷ୍ଟି ହୋଇଥିଲା। ତେବେ ମହିଳା ଖେଳାଳିମାନେ ପରୀକ୍ଷାରେ ନେଗେଟିଭ୍ ବୋଲି ଜଣାପଡିଥିଲା। ଫଳରେ ମହିଳା କ୍ୟାମ୍ପ ଆୟୋଜନ ନେଇ କୌଣସି ଆଶଙ୍କା ନ ଥିଲା।
ଅଧିନାୟକ ମନପ୍ରୀତ, ଷ୍ଟ୍ରାଇକର ମନଦୀପ ସିଂ, ଡିଫେଣ୍ଡର୍ସ ସୁରେନ୍ଦର କୁମାର, ଜଶକରନ ସିଂ, ଡ୍ରାଗ୍ ଫ୍ଲିକର ବରୁଣ କୁମାର ଓ ଗୋଲ କିପର କ୍ରିଷନ ବାହାଦୁର ପାଠକ ସଂକ୍ରମିତ ହେବା ପରେ ହସ୍ପିଟାଲରେ ଭର୍ତ୍ତି ହୋଇଥିଲେ। କ୍ୟାମ୍ପ ପାଇଁ ଏବେ ୩୩ ପୁରୁଷ ଓ ୨୪ଜଣ ମହିଳା ଖେଳାଳି ବେଙ୍ଗାଲୁରୁରେ ଅଛନ୍ତି। ଏହି କ୍ୟାମ୍ପ ସେପ୍ଟେମ୍ବର ୩୦ ତାରିଖ ପର୍ଯ୍ୟନ୍ତ ଚାଲିବ। ପୁରୁଷ ହକି ଦଳ ମୁଖ୍ୟ କୋଚ୍ ଗ୍ରାହମ ରେଡ୍ ଓ ମହିଳା କୋଚ୍ ଜୋଏର୍ଡ ମାରିଜନେ କ୍ୟାମ୍ପର ସଫଳତା ନେଇ ଆଶାବାଦୀ ଅଛନ୍ତି। ଜୈବ ସୁରକ୍ଷିତ ପରିବେଶରେ କ୍ୟାମ୍ପରେ ମୁଖ୍ୟତଃ ଟିମ୍ ଫିଟ୍ନେସ ନେଇ କାର୍ଯ୍ୟ କରାଯିବ ବୋଲି ମାରିଜନେ କହିଛନ୍ତି। କ୍ୟାମ୍ପ ଆରମ୍ଭ ହେବା ନେଇ ଖେଳାଳିଙ୍କଠାରୁ ସକାରାତ୍ମକ ମନୋଭାବ ଦେଖିବାକୁ ମିଳିଛି ବୋଲି ରେଡ୍ କହିଛନ୍ତି।