ମାର୍ଶାଘାଇ, ୨୯।୪ (ଡି.ଏନ୍.ଏ.)-ଲକ୍ଡାଉନ୍ ଯୋଗୁ ବିଭିନ୍ନ କାର୍ଯ୍ୟ ବନ୍ଦ ରହିଥିବା ବେଳେ ଅନେକ ଲୋକ ଆର୍ଥିକ ସଙ୍କଟ ଦେଇ ଗତି କରୁଛନ୍ତି। ଏହି ସମୟରେ ଦୁଗ୍ଧ ଓ ଦୁଗ୍ଧ ଜାତୀୟ ସାମଗ୍ରୀର ବିକ୍ରି ହ୍ରାସ ପାଇଥିବାରୁ ଦୁଗ୍ଧଚାଷୀମାନେ ଦୁର୍ଦ୍ଦିନରେ କାଳ କାଟୁଛନ୍ତି। ମାର୍ଶାଘାଇ ବ୍ଲକ ଅଞ୍ଚଳରେ କ୍ଷୀର ବିକ୍ରି ହୋଇ ପାରୁ ନ ଥିବାରୁ ଚାଷୀମାନେ ଗୋରୁଙ୍କୁ ଖାଦ୍ୟ ଯୋଗାଇବା ମଧ୍ୟ କଷ୍ଟକର ହୋଇପଡୁଛି। ଗ୍ରାମାଞ୍ଚଳ ଚାଷୀଙ୍କଠାରୁ ସମବାୟ ସମିତିଗୁଡ଼ିକ ଦୁଗ୍ଧ ସଂଗ୍ରହ କରୁ ନ ଥିବାରୁ ଚାଷୀମାନଙ୍କ ଚିନ୍ତା ବଢ଼ିଯାଇଛି। ବ୍ଲକ ଅଞ୍ଚଳର ବିଭିନ୍ନ ସ୍ଥାନରେ କ୍ଷୀର ବିକ୍ରି ହୋଇ ନ ପାରିବାରୁ ଚାଷୀମାନେ ବାଧ୍ୟ ହୋଇ ଏହାକୁ ନଷ୍ଟ କରିଦେଉଛନ୍ତି। ତେବେ ଗୋରୁଙ୍କ ପାଇଁ ସରକାର ମାଗଣାରେ ଖାଦ୍ୟ ଯୋଗାଇ ଦେବା ସହ ଉତ୍ପାଦିତ ଦୁଗ୍ଧ ବିକ୍ରି କରିବା ପାଇଁ ବ୍ୟବସ୍ଥା କରିବାକୁ ଚାଷୀମାନେ ଦାବି କରିଛନ୍ତି।