ନୂଆଦିଲ୍ଲୀ: କରୋନା ଭାଇରସ୍ ରୋକିବା ପାଇଁ ଦେଶର ସବୁ ସଚେତନ ନାଗରିକମାନେ ପ୍ରୟାସ ଜାରି ରଖିଛନ୍ତି। ସମସ୍ତେ ନିଜ ନିଜ ଉଦ୍ୟମରେ ସଚେତନତା କାର୍ଯ୍ୟକ୍ରମ କରୁଛନ୍ତି। ଏହି ଲକ୍ଷ୍ୟରେ ଥାଇଲାଣ୍ଡର ଜଣେ ଷ୍ଟ୍ରିଟ୍ ଆର୍ଟିଷ୍ଟଙ୍କ ଉଦ୍ୟମ ପ୍ରଶଂସନୀୟ। ଏହି ଚିତ୍ରକର ଜଣକ କରୋନା ଭାଇରସ୍କୁ ନେଇ ଲୋକଙ୍କୁ ସଚେତନ କରିବା ଉଦ୍ଦେଶ୍ୟରେ ରାସ୍ତାକଡ଼ରେ ସୁନ୍ଦର ତଥା ପ୍ରଭାବଶାଳୀ ଚିତ୍ର ଆଙ୍କିବାରେ ଲାଗିଛନ୍ତି। କରୋନା ଭାଇରସ୍ ରୋଗୀଙ୍କ ଚିକିତ୍ସା କରୁଥିବା ସ୍ବାସ୍ଥ୍ୟକର୍ମୀଙ୍କୁ ସମ୍ମାନ ଜଣାଇବା ପାଇଁ ସେ ସ୍ବତନ୍ତ୍ରଭାବେ ଚିତ୍ର ଆଙ୍କିଛନ୍ତି। ଚିତ୍ରରେ ସ୍ବାସ୍ଥ୍ୟକର୍ମୀମାନେ କରୋନା ଭାଇରସ୍କୁ ବହୁ ଦୂରକୁ ନେଇ ଯାଉଛନ୍ତି। ଏଭଳି ବିଭିନ୍ନ ଥିମ୍ ନେଇ ସେ ରାସ୍ତାକଡ଼ରେ ଚିତ୍ର ଆଙ୍କୁଛନ୍ତି। ଏହି କଳାକାରଙ୍କ ନାଁ ହେଉଛି ମୁଏ ବୋନ୍ ଏବଂ ତାଙ୍କର ବୟସ ୩୭ ବର୍ଷ। କରୋନା ଭାଇରସ୍ ସଂକ୍ରମଣ ହେବା ପରେ ସେ ବିଭିନ୍ନ ସମୟରେ ଏ ସମ୍ପର୍କିତ ଚିତ୍ର ଆଙ୍କି ଲୋକଙ୍କୁ ସଚେତନ କରାଇ ଚାଲିଛନ୍ତି। ତାଙ୍କ ମତରେ ଲୋକେ କରୋନା ଭାଇରସ୍ ନେଇ ସବୁକିଛି ଜାଣିବା ଦରକାର। କରୋନା ଭାଇରସ୍ ସଂକ୍ରମଣ କିପରି ହୁଏ, କିପରି ଭାବରେ ଏଥିରୁ ଦୂରେଇ ରହିବାକୁ ହେବ ଇତ୍ୟାଦି ବିଷୟରେ ଲୋକେ ଜାଣିଲେ ହିଁ ସତର୍କ ହୋଇପାରିବେ ବୋଲି ସେ କହନ୍ତି। ଚିତ୍ରକର ମୁଏ ବୋନ୍ ଆଗରୁ ବି ରାସ୍ତାର କାନ୍ଥମାନଙ୍କରେ ବିଭିନ୍ନ ସଚେତନତା ବାର୍ତ୍ତାଥିବା ଚିତ୍ର ଆଙ୍କି ଲୋକପ୍ରିୟତା ହାସଲ କରିଛନ୍ତି। ଏବେ କରୋନାକୁ ନେଇ ତାଙ୍କର ପେଣ୍ଟିଂଗୁଡ଼ିକ ବି ବେଶ୍ ପ୍ରଭାବ ପକାଇ ପାରିଛି।