ଭୁବନେଶ୍ୱର,୧୧ା୪(ବ୍ୟୁରୋ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲକ୍ଡାଉନ୍ ପାଇଁ ପ୍ରତ୍ୟେକ ଉଠାଦୋକାନୀଙ୍କୁ ୩ ହଜାର ଟଙ୍କା ଲେଖାଏଁ କରୋନା ସହାୟତା ଦେବା ପାଇଁ ଘୋଷଣା କରିଛନ୍ତି। ଏବେ ସୁଦ୍ଧା ରାଜଧାନୀ ଭୁବନେଶ୍ୱରର ୧୧ ହଜାରରୁ ଉର୍ଦ୍ଧ୍ୱ ଉଠାଦୋକାନୀଙ୍କୁ ସହାୟତା ବଣ୍ଟନ ହୋଇଥିବା ବେଳେ ଆହୁରି ୧୧ ହଜାର ଉଠାଦୋକାନୀ ଏଥିରୁ ବଞ୍ଚିତ ହୋଇଥିବାର ଅଭିଯୋଗ ହୋଇଛି। ଭୁବନେଶ୍ୱର ଉଠାଦୋକାନୀ ବ୍ୟବସାୟୀ ସଂଘର ସଭାପତି ସୁର ଜେନା ଶନିବାର ଏକ ପ୍ରେସ୍ ବିବୃତ୍ତିରେ ଏହି ଅଭିଯୋଗ ଆଣିଛନ୍ତି।
ସଭାପତି ଜେନା କହିଛନ୍ତି, ଭୁବନେଶ୍ୱର ମହାନଗର ନିଗମ (ବିଏମ୍ସି) ୨୦୧୫ ମସିହାରେ ଏକ ସର୍ଭେ କରି ରାଜଧାନୀ ଭୁବନେଶ୍ୱରରେ ୨୨ ହଜାର ୮ ଶହ ଉଠାଦୋକାନୀଙ୍କୁ ଚିହ୍ନଟ କରିଥିଲେ। ମାତ୍ର ବର୍ତ୍ତମାନ ସେମାନଙ୍କ ମଧ୍ୟରୁ ୫୦ ପ୍ରତିଶତ ଅର୍ଥାତ୍ ୧୧ ହଜାର ଉଠାଦୋକାନୀଙ୍କୁ କରୋନା ସହାୟତା ପ୍ରଦାନ କରାଯାଇଛି। କିନ୍ତୁ ଏମାନଙ୍କ ବ୍ୟତୀତ ଚିହ୍ନଟ ହୋଇଥିବା ଆହୁରି ୧୧ ହଜାର ଉଠାଦୋକାନୀ ଏହି ସାହାଯ୍ୟରୁ ବଞ୍ଚିତ ହୋଇଛନ୍ତି ବୋଲି ଜେନା କହିଛନ୍ତି।
ପ୍ରକାଶଥାଉ କି, ପ୍ରଳୟଙ୍କାରୀ ବାତ୍ୟା ‘ଫନୀ’ ସମୟରେ ମଧ୍ୟ ବିଏମ୍ସି ସହାୟତା ପ୍ରଦାନ କଲା ବେଳେ ଏହି ୧୧ ହଜାର ଉଠଦୋକାନୀଙ୍କୁ ସହାୟତାରୁ ବଞ୍ଚିତ କରାଯାଇଥିଲା। ଏହି ପକ୍ଷପାତିତା ଓ ବାଛବିଚାର ବର୍ତ୍ତମାନ ସମୟରେ ଘୋର ଅନ୍ୟାୟ ବୋଲି ଜେନା ମତବ୍ୟକ୍ତ କରିବା ସଙ୍ଗେ ସଙ୍ଗେ ଚିହ୍ନଟ ହୋଇ ବାଦ୍ ପଡ଼ିଥିବା ୧୧ ହଜାର ଉଠାଦୋକାନୀଙ୍କୁ ତୁରନ୍ତ କରୋନା ସାହାଯ୍ୟ ଯୋଗାଇ ଦେବା ପାଇଁ ରାଜ୍ୟ ସରକାର ଏବଂ ବିଏମ୍ସି ନିକଟରେ ଦାବି ଜଣାଇଛନ୍ତି।