ନୂଆଦିଲ୍ଲୀ,୨୮।୩: କରୋନା ସଂକ୍ରମଣ ନେଇ ସାରା ପୃଥିବୀରେ ହାହାକାର ସୃଷ୍ଟି ହୋଇଛି। ଏଥି ପାଇଁ ଔଷଧ ପ୍ରସ୍ତୁତି ପାଇଁ ପୃଥିବୀର ବିକାଶିତ ରାଷ୍ଟ୍ରର ବୈଜ୍ଞାନିକମାନେ ଦିନରାତି ପ୍ରୟାସ ଜାରି ରଖିଛନ୍ତି। ତେବେ ଏହାର ମୁକାବିଲା ପାଇଁ ଭାରତୀୟଙ୍କ ଶରୀରରେ ଏକ ପ୍ରକାର ବିରଳ ଆର୍ଏନ୍ଏ ରହିଛି ବୋଲି ଏକ ଗବେଷଣା ରିପୋର୍ଟରେ ପ୍ରକାଶ ପାଇଛି। ଭାରତୀୟଙ୍କ ଗୁଣସୂତ୍ରରେ ଥିବା ଏକ ବିରଳ ମାଇକ୍ରୋ ଆର୍ଏନ୍ଏ ନୋବେଲ କୋଭିଡ-୧୯ ଭୂତାଣୁକୁ ନଷ୍ଟ କରିବାର ଶକ୍ତି ରଖିଛି। ଏହି ଆର୍ଏନ୍ଏ କରୋନା ଭୂତାଣୁର ତୀବ୍ରତାକୁ ହ୍ରାସ କରିବାକୁ ସକ୍ଷମ। କରୋନା ଭୂତାଣୁ ମଧ୍ୟ ଆର୍ଏନ୍ଏରୁ ସୃଷ୍ଟି ବୋଲି ଦିଲ୍ଲୀର ଇଣ୍ଟରନ୍ୟାଶନାଲ ସେଣ୍ଟର ଫର୍ ଜେନେଟିକ ଇଞ୍ଜିନିୟରିଂ ଆଣ୍ଡ୍ ବାୟୋଟେକ୍ନୋଲୋଜି ପକ୍ଷରୁ ହୋଇଥିବା ଏହି ଗବେଷଣାର ନେତୃତ୍ୱ ନେଇଥିବା ପ୍ରଫେସର ଦିନେଶ୍ ଗୁପ୍ତା ସୂଚନା ଦେଇଛନ୍ତି। ଗବେଷକ ଦଳ ଚାଇନା, ଇଟାଲି, ଆମେରିକା, ନେପାଳ ଏବଂ ଭାରତରେ କରୋନା ସଂକ୍ରମିତଙ୍କ ଉପରେ ଅଧ୍ୟୟନ କରିଥିଲେ। ଜଣାପଡ଼ିଥିଲା ଭାରତୀୟଙ୍କ ଶରୀରରେ ଏଚ୍ଏସ୍ଏ-ଏମ୍ଆଇଆର୍-୨୭-ବି ଆର୍ଏନ୍ଏ ରହିଛି। ଯାହାକି କରୋନା ସଂକ୍ରମିତ ହୋଇଥିବା ଅନ୍ୟ ଦେଶର ନାଗରିକଙ୍କ ଶରୀରରେ ନାହିଁ। ଏହି ବିରଳ ଆର୍ଏନ୍ଏ ଭାରତୀୟଙ୍କୁ କରୋନା ସହିତ ଲଢ଼ିବା ପାଇଁ ଶକ୍ତି ଯୋଗାଇବ ବୋଲି ଗବେଷକ ସୂଚନା ଦେଇଛନ୍ତି। ଅନୁଧ୍ୟାନ ପାଇଁ ଅନ୍ଲାଇନ୍ରେ କରୋନା ସଂକ୍ରମିତଙ୍କ ସମ୍ପର୍କରେ ଗୁଣସୂତ୍ର ସମ୍ପର୍କିତ ତଥ୍ୟ ସଂଗ୍ରହ କରାଯାଇଥିଲା।