କୋଏମ୍ବାଟୁର,୭।୩ : କର୍କଟ ପୀଡ଼ିତଙ୍କ ପାଇଁ କେତେକ ଆର୍ଥିକ ସହାୟତା ପ୍ରଦାନ କରିଥାନ୍ତି। ତେବେ ଆର୍ଥିକ ସହାୟତା ଯୋଗାଇ ଦେବାକୁ ଅସମର୍ଥ ଥିବା ତାମିଲନାଡୁର କୋଏମ୍ବାଟୁରର ଏକ ଘରୋଇ କଲେଜର ୮୦ ଜଣ ଛାତ୍ରୀ ନିଜ କେଶ ଦାନ କରିଛନ୍ତି। କେମୋଥେରାପି ପରେ କର୍କଟ ପୀଡ଼ିତଙ୍କ କେଶ ଉପୁଡ଼ି ଯାଇଥାଏ। ତେଣୁ ଦାନ କରାଯାଇଥିବା କେଶରୁ ଓ୍ବିଗ୍ ତିଆରି କରି କର୍କଟ ପୀଡ଼ିତଙ୍କୁ ପ୍ରଦାନ କଲେ ସେମାନେ ଖୁସି ହେବେ ବୋଲି ଛାତ୍ରୀମାନେ କହିଛନ୍ତି। କର୍କଟ ପୀଡ଼ିତଙ୍କ ମୁହଁରେ ହସ ଫୁଟାଇବା ଲାଗି ଛାତ୍ରୀମାନେ ଏଭଳି ନିଆରା ପଦକ୍ଷେପ ଆପଣେଇଛନ୍ତି। ଛାତ୍ରୀମାନେ ୮ଇଞ୍ଚ ଲମ୍ବର କେଶ ଦାନ କରିଛନ୍ତି। ଏହି ଅଭିଯାନରେ ୨୦୦ ଛାତ୍ରୀ ସେମାନଙ୍କ କେଶ ଦାନ କରିବେ ବୋଲି ଯୋଜନା ରହିଛି।