ଜାମଟିକ୍ରା, ୨୨।୮ (ଡି.ଏନ.ଏ): ବରଗଡ଼ ଜିଲା ଅତାବିରା ଏନ୍ଏସି ଓ୍ବାର୍ଡ ନମ୍ବର ୧ର ବାସିନ୍ଦା ରୂପ ବଗର୍ତ୍ତି(୬୪)। ବଛ୍ରେ ଉପରେ ହେଲା ସେ କର୍କଟ ରୋଗ୍ରେ ପୀଡ଼ିତ ଅଛନ୍। ସେ ବୁର୍ଲାରେ ଚିକିଛା କରେଇ ଉଷୋକଷା ଖାଉଥିଲେ। ହେଲେ ଏହେଦେ ଟଁକା ପଏସା ଅଭାବୁ ଘରେ ପଡ଼ି ରହିଛନ୍।
ସୂଚନା ଅନ୍ସାରେ ଅତାବିରା ଏନ୍ଏସି ଓ୍ବାର୍ଡ ନମ୍ବର ୧ର ରୂପ ବଗର୍ତ୍ତିକଁର ପରିବାର କହେଲେ ଝି’ ଉର୍ମିଲା ଆର ପୁଓ ଜୟକୃଷ୍ଣକୁଁ ନେଇ ତାକର ସଁସାର। ଆପ୍ନେ ପରମେ ବଗର୍ତ୍ତି କିଡ଼୍ନୀ ରୋଗ୍ରେ ପୀଡ଼ିତ ହେଇ ଚିକିଛା ଅଭାବୁ ଆଏଜ୍କେ ୭ ବଛର ତଲେ ଆରପାରକେ ଚାଲିଯାଇଛନ୍। ଇଆଡ଼େ ପରିବାରଟା ନିହାତି ଗରିବ୍ ହେଇଥିଲାବେଲେ ଜମିବାଡ଼ି ବଲି କିଛି ନାଇଁ। ଜାଗାବାଡ଼ି ଅଭାବୁ ପରିବାରଟା ପରହର ଘରେ ଆଶ୍ରେ ନେଇଛନ୍। ଝି’ ଉର୍ମିଲା ପରହର ଘରେ ବାସନକୁସନ ମାଜୁଥିଲାବେଲେ ଭାଇ ଜୟକୃଷ୍ଣ କୁଲି ମଜୁରି କରି ପରିବାର ଚଲଉଛନ୍। ଏନ୍ତାଥି ଫେବୃୟାରୀ ୨୦୧୮ରେ ରୂପର ଦିହିପା ଖରାପ ହେଇଥିଲା। ପରିବାର ଲୋକ୍ ତାହାକୁ ବୁର୍ଲା ବଡ଼ ଡାକ୍ତରଖାନାରେ ନେଇ ଦେଖେଇଥିଲେ। ସେଠାନେ ପରୀକ୍ଷା ନିରୀକ୍ଷା ଉତାରୁ ଜନାପଡ଼ଲା ଯେ, ରୂପ ତଁଟିରେ କର୍କଟ ରୋଗ୍ ହେଇଛେ। ଝି’ପୁଓ ପେଟ୍ କାଟି ରଖିଥିବାର ଟଁକା ଖରଚ୍ କରି ମା’ର ଚିକିଛା, ଉଷୋକଷା କରି ନିରାଶ ହେଲେ। ଏହେଦେ ସେମାନେ ବି ଉପେ ଶୂଇନ୍। ଟଁକା ପଏସା ଅଭାବୁ ମା’ର ଉଚ୍ ଚିକିଛା କରବାକେ ସେମାନେ ଅକ୍ଷମ। ଇଆଡ଼େ ତଁଟିରେ କ୍ୟାନସର ହେଇଥିବାର ଲାଗି ରୂପ ଠିକ୍ରେ ଖାଇପିଇ ନାଇଁ ପାରବାର। ଚିକିଛା, ଉଷୋକଷା ଅଭାବୁ ଦିନୁଦିନ୍କେ ରୂପର ଦିହିପା ବିଗିଡ଼ବାରେ ଲାଗିଛେ। ଉଷୋକଷାର ପଏସା ବାହାର କରବାର ଲାଗି ରୂପ ପରହର ଖୁରିଗିନା ମାଜୁଛନ୍। ଇଆଡ଼େ ସରକାରୀ ସାହାଯ୍ କହେଲେ ରାଶନ କାର୍ଡରେ ପରିବାରକେ ମିଲୁଥିବାର ମାସିକ ୧୫ କେ.ଜି. ଚାଉଲ ଆର ରୂପ ପାଉଥିବାର ୫ଶହ ଟଁକା ବିଧବା ଭତା। ନିଜର ଜାଗାବାଡ଼ି ନାଇଁଥିବାର ଲାଗି ପରିବାରଟା ନିହାତି ଗରିବ୍ ହେଇଥିଲେ ବି ଆବାସ ଯୋଜନାରୁ ବଁଚିତ୍ ହେଇ ରହିଛନ୍। ଇଆଡ଼େ ଝି’ପୁଓ ଟଁକା ପଏସା ଅଭାବୁ ମା’ର ଚିକିଛା କରେଇ ନାଇଁପାରି ଭଗବାନ ଭରସାରେ ରହିଛନ୍। ଏନ୍ତାଥି ଝି’ ଉର୍ମିଲା ଉପେ ଶୂଇନ୍ ହେଇ ଗଣମାଧ୍ୟମ ଜରିଆରେ ଜିଲା ଆର ଥାନୀୟ ପରଶାସନକେ ମା’ର ଚିକିଛା ସାହାଯ୍ ଲାଗି ଗୁହାରି କରିଛନ୍।