ଢେଙ୍କାନାଳ ଅଫିସ,୧ା୭- କର୍ତ୍ତବ୍ୟରେ ଅବହେଳା ଅଭିଯୋଗରେ ସୋମବାର ନିଲମ୍ବିତ ହୋଇଛନ୍ତି ଢେଙ୍କାନାଳ ଜିଲା ପରଜଙ୍ଗ ବ୍ଲକ ଭେଜିଆ ସେବାଶ୍ରମ ସ୍କୁଲ ପ୍ରଧାନ ଶିକ୍ଷକ ବାଙ୍କ ବିହାରୀ ଜେନା। ଏ ନେଇ ଜିଲା ମଙ୍ଗଳ ଅଧିକାରୀ ମାନସ ରଞ୍ଜନ ମିଶ୍ର କୁହନ୍ତି, ନିଲମ୍ବିତ ପ୍ରଧାନ ଶିକ୍ଷକ ପୂର୍ବରୁ ଢେଙ୍କାନାଳ ପୌରାଞ୍ଚଳର କାଠଗଡା ଆବାସିକ ସେବାଶ୍ରମ ବିଦ୍ୟାଳୟରେ ପ୍ରଧାନ ଶିକ୍ଷକ ଭାବେ କାର୍ଯ୍ୟ କରୁଥିଲେ। ଆର୍ଥିକ ଅନିୟମିତତା, ଛାତ୍ରୀଛାତ୍ରଙ୍କ ପ୍ରତି ଦୃଷ୍ଟି ପ୍ରଦାନ ନ କରିବା, ଉଚ୍ଚ ଅଧିକାରୀଙ୍କ ନିର୍ଦ୍ଦେଶକୁ ବେଖାତିର କରିବା ଆଦି ଅଭିଯୋଗରେ ତାଙ୍କୁ ପରଜଙ୍ଗ ବ୍ଲକର ଭେଜିଆ ସେବାଶ୍ରମ ବିଦ୍ୟାଳୟକୁ ଗତ ୨୦ା୬ା୧୮ରେ ବଦଳି କରାଯାଇଥିଲା। କିନ୍ତୁ ସେ କାର୍ଯ୍ୟରେ ଯୋଗ ନ ଦେଇ ଅସୁସ୍ଥତା ଦର୍ଶାଇ ଛୁଟିରେ ରହିଥିଲେ। ଏ ସମ୍ପର୍କରେ ତାଙ୍କୁ ବହୁବାର କାରଣ ଦର୍ଶାଅ ନୋଟିସ୍ ସାଙ୍ଗକୁ ଅସୁସ୍ଥତା ସମ୍ପର୍କିତ ମେଡିକାଲ ରିପୋର୍ଟ ମଧ୍ୟ ମଗାଯାଇଥିଲା। ସନ୍ତୋଷଜନକ ଉତ୍ତର ନ ମିଳିବାରୁ ତାଙ୍କୁ ଜିଲାପାଳ ନିଖିଲ ପଓ୍ବନ କଲ୍ୟାଣ ନିଲମ୍ବିତ କରିଥିବା ଜିଲା ମଙ୍ଗଳ ଅଧିକାରୀ ସୂଚନା ଦେଇଛନ୍ତି। ନିଲମ୍ବନ ନିର୍ଦ୍ଦେଶନାମାକୁ ସେ ଗ୍ରହଣ ନ କରିବାରୁ ତାଙ୍କ ଘରକୁ ଏହାକୁ ପଠାଇ ଦିଆଯାଇଥିଲା। ସେଠାରେ ମଧ୍ୟ ତାଙ୍କର ପରିବାର ଏହାକୁ ଗ୍ରହଣ ନ କରିବାରୁ ଘରେ ନିର୍ଦ୍ଦେଶନାମାକୁ ଲଗାଇ ଦିଆଯାଇଥିବା ମଙ୍ଗଳ ବିଭାଗ କାର୍ଯ୍ୟାଳୟ ସୂତ୍ରରୁ ପ୍ରକାଶ।