ଦିଗପହଣ୍ଡି,୯ା୧୦(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ବଡ଼ଡୁମୁଳା ଗ୍ରାମର ଚାଷଜମିକୁ ଜଳ ଯୋଗାଣ ପାଇଁ କହ୍ନେଇ ନାଳ ଜଳସେଚନ ପ୍ରକଳ୍ପର ଶାଖା କେନାଲ ଦୀର୍ଘବର୍ଷ ହେଲା ଅଳିଆ ଆବର୍ଜନାରେ ପୋତି ହୋଇଥିଲା। ଗ୍ରାମର ମା’ ବାଙ୍କେଶ୍ୱରୀ ମନ୍ଦିରଠାରୁ ହାଇସ୍କୁଲ ପର୍ଯ୍ୟନ୍ତ ପ୍ରାୟ ୮ ଶହ ଫୁଟ ଲମ୍ବ କେନାଲଟି ସମ୍ପୂର୍ଣ୍ଣ ପୋତି ହୋଇଯାଇଥିବାରୁ ସାନଡୁମୁଳା, ବୀରପଦ୍ମନାଭ ପୁର ଏବଂ ବଡ଼ଡୁମୁଳା ଅଧିନସ୍ଥ ପ୍ରାୟ ୧ ହାଜର ଏକରରୁ ଊର୍ଦ୍ଧ୍ୱ ଚାଷଜମିକୁ କେନାଲ ପାଣି ମାଡ଼ି ପାରୁ ନ ଥିଲା। ଫଳରେ ଗ୍ରାମ ସଂଲଗ୍ନ ଚାଷଜମି ଜଳସେଚନରୁ ବଞ୍ଚିତ ହୋଇଆସୁଥିଲା। ସମସ୍ୟାର ସମାଧାନ ପାଇଁ ସ୍ଥାନୀୟ ସାମାଜିକ କର୍ମୀ ଡ. ପ୍ରଫୁଲ୍ଲ ପଧାନଙ୍କ ନେତୃତ୍ୱରେ ଗ୍ରାମର ବହୁ ସଂଖ୍ୟକ ଚାଷୀ ଦିଗପହଣ୍ଡିସ୍ଥିତ କ୍ଷୁଦ୍ର ଜଳସେଚନ ଉପଖଣ୍ଡ କାର୍ଯ୍ୟାଳୟର ସହକାରୀ ଯନ୍ତ୍ରୀ ଏବଂ କନିଷ୍ଠଯନ୍ତ୍ରୀମାନଙ୍କୁ ଅବଗତ କରାଇଥିଲେ ସୁଦ୍ଧା କୌଣସି ସୁଫଳ ମିଳି ନ ଥିଲା। ଶେଷରେ ଚାଷୀମାନେ ମିଳିତ ହୋଇ ପ୍ରାୟ ୮ ଶହ ଫୁଟ ଲମ୍ବ କେନାଲର ପୁନରୁଦ୍ଧାର କରିଛନ୍ତି। ଚାଷୀଙ୍କ ଏପରି କାମକୁ ସାଧାରଣରେ ପ୍ରଶଂସା କରାଯାଉଛି।