ଭୋପାଳ,୨୪।୭: କର୍ନାଟକରେ ଭାଜପାର ଅପରେଶନ୍ ଲୋଟସ୍ ଶେଷ ହୋଇଛି। ଏଠାରେ କଂଗ୍ରେସ-ଜେଡିଏସ୍ ମେଣ୍ଟ ସରକାରର ପତନ ଘଟିଛି। ଏହାପରେ ଏବେ ଭାଜପା ମଧ୍ୟପ୍ରଦେଶ କଂଗ୍ରେସ ମେଣ୍ଟ ସରକାର ଉପରେ ନଜର ପକାଇବାର ସମ୍ଭାବନା ଥିବା ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ଏନେଇ ମଧ୍ୟପ୍ରଦେଶର ଭାଜପା ନେତା ଗୋପାଳ ଭାର୍ଗବ କହିଛନ୍ତି ଯେ, ଖୁବ୍ ଶୀଘ୍ର ମଧ୍ୟପ୍ରଦେଶ କଂଗ୍ରେସ ମେଣ୍ଟ ସରକାର ପିଣ୍ଡଦାନ କରିବ। ଏଥିରେ କଂଗ୍ରେସ ସଦସ୍ୟ ହିଁ ସରକାର ପତନର ମୁଖ୍ୟ କାରଣ ସାଜିବେ ବୋଲି ସେ କହିଛନ୍ତି। ତେବେ ଏହାର ଉତ୍ତରରେ କଂଗ୍ରେସର ଜିତୁ ପଟଓ୍ବାରି କହିଛନ୍ତି ଯେ, କର୍ନାଟକରେ ଏଚ୍.ଡି. କୁମାରସ୍ବାମୀ ସରକାର ଭାଜପା ଷଡ଼ଯନ୍ତ୍ର ବୁଝିପାରିଲେ ନାହିଁ। ତାଙ୍କ ଅନୁପସ୍ଥିତିରେ ଏପରି ଯୋଜନା କାର୍ଯ୍ୟକାରୀ କରିବାରେ ଭାଜପା ମୁଖ୍ୟ ଭୂମିକ ଗ୍ରହଣ କରିଥିଲା। ମାତ୍ର ମଧ୍ୟପ୍ରଦେଶରେ କମଳନାଥ ସରକାର ରହିଛନ୍ତି। ଏଠାରେ ଭାଜପାର ଷଡ଼ଯନ୍ତ୍ର କାମ କରିବ ନାହିଁ ବୋଲି ସେ କହିଛନ୍ତି। ସୂଚନାଯୋଗ୍ୟ, ମଧ୍ୟପ୍ରଦେଶରେ ୨୩୦ ବିଧାନସଭା ଆସନ ମଧ୍ୟରୁ କଂଗ୍ରେସ ପାଖରେ ୧୧୪ ଏବଂ ଭାଜପା ନିକଟରେ ୧୦୯ ଆସନ ରହିଛି। କଂଗ୍ରେସ ମେଣ୍ଟ ସରକାରଙ୍କୁ ବିଏସ୍ପି ୨, ଏସ୍ପିର ଜଣେ ଏବଂ ୪ ନିର୍ଦ୍ଦଳୀୟ ବିଧାୟକ ସମର୍ଥନ କରୁଛନ୍ତି।