ବେଙ୍ଗାଲୁରୁ,୨୩।୭: କର୍ନାଟକରେ କଂଗ୍ରେସ-ଜେଡିଏସ୍ ମେଣ୍ଟ ସରକାରର ପତନ ଘଟିଛି। ମଙ୍ଗଳବାର ମୁଖ୍ୟମନ୍ତ୍ରୀ ଏଚ୍.ଡି କୁମାରସ୍ବାମୀ ଆଣିଥିବା ଆସ୍ଥାଭୋଟ ଜିତିବାରେ ବିଫଳ ହେବା ପରେ ଆସ୍ଥାଭୋଟ ନାଟକରେ ଯବନିକା ପଡ଼ିଛି। ପ୍ରଥମେ ୧୬ଜଣ ବିଧାୟକ ଇସ୍ତଫା ଦେବା ପରେ ଏବେ ଆସ୍ଥା ଭୋଟରେ ହାରିବା ଯୋଗୁ ଭାଙ୍ଗିଛି ମେଣ୍ଟ ସରକାର। ତେବେ ଭାଜପା ପକ୍ଷକୁ ୧୦୫ଟି ଭୋଟ ଆସିଥିବା ବେଳେ କଂଗ୍ରେସ-ଜେଡିଏସ୍ ସପକ୍ଷରେ ଆସିଛି ମାତ୍ର ୯୯ଟି ଭୋଟ। ଏହାପରେ ବହୁମତ ସହ ଭାଜପା ବିଧାନସଭାରେ ସରକାର ଗଢ଼ିବା ନେଇ ପ୍ରସ୍ତାବ ରଖିପାରେ।
ପ୍ରକାଶଯୋଗ୍ୟ, କର୍ନାଟକ ବିଧାନସଭାରେ ଆସ୍ଥାଭୋଟ ନେଇ ଆଲୋଚନା ଜାରି ରହିଥିଲା। ମଙ୍ଗଳବାର ସନ୍ଧ୍ୟା ସୁଦ୍ଧା ଏହି ପ୍ରକ୍ରିୟାକୁ ଶେଷ କରିବା ଲାଗି ବାଚସ୍ପତି ନିର୍ଦ୍ଦେଶ ଦେଇଥିଲେ। ଏହି ଭୋଟିଂ ପ୍ରକ୍ରିୟାରେ ୨୦୪ ଜଣ ସଦସ୍ୟ ଭାଗ ନେଇଥିଲେ।