ବେଙ୍ଗାଲୁରୁ, ୧୦।୭: କର୍ନାଟକ କ୍ଷମତା ରାଜନୀତି ଦିନକୁଦିନ ଉଗ୍ର ରୂପ ଧାରଣ କରିଛି। ପ୍ରଥମେ କଂଗ୍ରେସ-ଜେଡିଏସ ମେଣ୍ଟର ୧୩ ଜଣ ବିଧାୟକଙ୍କ ଇସ୍ତଫାପତ୍ର ଦେବା ପରେ ବାଚସ୍ପତି ରମେଶ କୁମାରଙ୍କ ନିଷ୍ପତ୍ତି ଏଥିରେ ନୂଆ ମୋଡ ଆଣିଛି। ଇସ୍ତଫା ପତ୍ର ଗ୍ରହଣ କରୁ ନ ଥିବାରୁ ବାଚସ୍ପତିଙ୍କ ବିରୋଧରେ ସୁପ୍ରିମକୋର୍ଟ ଯାଇଛନ୍ତି ୧୦ ବିଧାୟକ। ବାଚସ୍ପତି ନିଜ ଦାୟିତ୍ୱ ପାଳନ କରୁନାହାନ୍ତି। ଜାଣିଶୁଣି ଇସ୍ତଫା ପତ୍ର ଗ୍ରହଣ କରିବାରେ ବିଳମ୍ବ କରୁଛନ୍ତି ବୋଲି ସେମାନେ ଅଭିଯୋଗ କରିଛନ୍ତି। ଏହାର ଶୁଣାଣି ଗୁରୁବାର ହେବ ବୋଲି ସୂଚନା ମିଳିଛି। ସେପଟେ ବାଚସ୍ପତି ରମେଶ କୁମାର କହିଛନ୍ତି, ବିଧାୟକଙ୍କ ଇସ୍ତଫାପତ୍ର ଗୁଡିକ ଠିକ ଅର୍ଡରରେ ନାହିଁ। ମୋର କିଛି ନିୟମ ଅଛି। ମୁଁ ସେହି ଅନୁସାରେ କାମ କରିବି। ତା’ପରେ ଯାଇ ଯାହା ନିଷ୍ପତ୍ତି ନେବି ବୋଲି ସେ କହିଛନ୍ତି। ୧୩ ଜଣ ବିଧାୟକଙ୍କ ମଧ୍ୟରୁ ୫ ଜଣଙ୍କର ଇସ୍ତଫା ପତ୍ର ଠିକ ଅଛି, ସେମାନେ ବ୍ୟକ୍ତିଗତ ଭାବେ ଆସି ତାଙ୍କୁ ଦେଖା କରିବାକୁ ବାଚସ୍ପତି କହିଛନ୍ତି। ସେ କହିଛନ୍ତି ବାକି ୮ ଜଣ ପୁଣି ଥରେ ଠିକ ଫର୍ମାଟରେ ଇସ୍ତଫାପତ୍ର ଦାଖଲ କରିବେ।