ମୁମ୍ବାଇ,୨୨-୯: ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଶୁକ୍ରବାର କର୍ପୋରେଟ ଟିକସ ହ୍ରାସ ଘୋଷଣା କରିଛନ୍ତି। ଏହାଦ୍ୱାରା ସରକାର ରାଜସ୍ବ ବାବଦରେ ୧.୪୫ ଲକ୍ଷ କୋଟି ଟଙ୍କା ହରାଇବେ ବୋଲି ଅନୁମାନ କରାଯାଉଛି। ଏହାର ଭରଣା କିପରି ହେବ, ନୀତି ଆୟୋଗ ଉପାଧ୍ୟକ୍ଷ ରାଜୀବ କୁମାର ଶନିବାର ଏ ସମ୍ପର୍କରେ ଉପାୟ କହିଛନ୍ତି।
ଏକ ଇଲେକ୍ଟ୍ରୋନିକ ମିଡିଆ ଇଭେଣ୍ଟରେ ଯୋଗ ଦେଇ କୁମାର କହିଛନ୍ତି ଯେ, କର୍ପୋରେଟ ଟିକସ ହ୍ରାସ ଦ୍ୱାରା ବିତ୍ତୀୟ ନିଅଣ୍ଟ ବହୁ ପରିମାଣରେ ବଢ଼ିଯିବ ସେ ସମ୍ଭାବନା ନାହିଁ। ତାଙ୍କ ମତରେ ସ୍ବଳ୍ପ ମାତ୍ରାରେ ନିଅଣ୍ଟ ପରିମାଣ ବଢ଼ିବ। ସେ କହିଛନ୍ତି ଯେ, ଚଳିତ ଆର୍ଥିକ ବର୍ଷ ଲାଗି ବିତ୍ତୀୟ ନିଅଣ୍ଟ ପରିମାଣକୁ ୩.୩% ମଧ୍ୟରେ ରଖିବା ଲାଗି ସରକାର ବଜେଟରେ ଲକ୍ଷ୍ୟଧାର୍ଯ୍ୟ କରିଛନ୍ତି। ତେବେ ଏହା ୪.୧%କୁ ବୃଦ୍ଧି ପାଇବ ବୋଲି ବହୁ ଅର୍ଥନୈତିକ ବିଶେଷଜ୍ଞ ମତପ୍ରକାଶ କରିଛନ୍ତି। କାରଣ ସରକାର ଜିଡିପିର ୦.୭ ପ୍ରତିଶତ ପର୍ଯ୍ୟନ୍ତ କର୍ପୋରେଟ ଟିକସ ଛାଡ଼ ଘୋଷଣା କରିଛନ୍ତି। ତେବେ ବିତ୍ତୀୟ ନିଅଣ୍ଟକୁ ନେଇ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଓ ଅର୍ଥ ମନ୍ତ୍ରଣାଳୟର ବରିଷ୍ଠ ଅଧିକାରୀଗଣ ଶୁକ୍ରବାର ଖବରଦାତା ସମ୍ମିଳନୀରେ କୌଣସି ପ୍ରଶ୍ନର ଉତ୍ତର ଦେଇ ନ ଥିଲେ। କୁମାର କହିଛନ୍ତି ଯେ, ସରକାର ଦୁଇ ପ୍ରକାର ସ୍ରୋତରୁ କ୍ଷତିକୁ ଭରଣା କରିପାରିବେ। ପ୍ରଥମତଃ କର୍ପୋରେଟ ଟିକସ ହ୍ରାସ ଦ୍ୱାରା କମ୍ପାନୀଙ୍କ କାରବାର ବଢ଼ିବା ସହିତ ସେମାନଙ୍କର ରାଜସ୍ବ ବଢ଼ିବ। ଫଳରେ ସରକାର ପରୋକ୍ଷରେ ଅଧିକ ଟିକସ ପାଇବେ। ସେହିପରି ଅଣ-ଟିକସ ରାଜସ୍ବ ବୃଦ୍ଧି କରିବା ସରକାରଙ୍କ ନିକଟରେ ଦ୍ୱିତୀୟ ବାଟ ରହିଛି। ସେ କହିଛନ୍ତି ଯେ,୨୪ ରାଷ୍ଟ୍ରାୟତ୍ତ କମ୍ପାନୀଙ୍କ ଠାରୁ ପୁଞ୍ଜି ପ୍ରତ୍ୟାହାର କରାଯିବ। ଏଥିପାଇଁ କ୍ୟାବିନେଟ ମଞ୍ଜୁରୀ ମିଳିସାରିଛି। ପୁଞ୍ଜି ପ୍ରତ୍ୟାହାରରୁ ଚଳିତ ବର୍ଷ ୧.୦୫ ଲକ୍ଷ କୋଟି ଟଙ୍କା ଆଦାୟ କରିବାକୁ ବଜେଟରେ ଲକ୍ଷ୍ୟ ଧାର୍ଯ୍ୟ କରାଯାଇଛି। ଏହାବ୍ୟତୀତ ରିଜର୍ଭ ବ୍ୟାଙ୍କ ଠାରୁ ଚଳିତବର୍ଷ ଅତିରିକ୍ତ ଲାଭାଂଶ ମିଳିଛି। ଏହାବ୍ୟତୀତ ପାଓ୍ବାର ଟ୍ରାନ୍ସମିଶନ ଲାଇନ, ଷ୍ଟାଡିୟମ,ରେଲଓ୍ବେ ଷ୍ଟାଡିୟମ, ରୋଡ୍ ଇନ୍ ଭଳି ସମ୍ପତ୍ତି ଲିଜ୍ ଅଥବା ଭଡ଼ା ସୂତ୍ରରେ ଦେଇ ସରକାର ନିଜର ଆୟ ବଢ଼ାଇବେ ବୋଲି କୁମାର କହିଛନ୍ତି। ନିବେଶକଙ୍କ ନକାରାମତ୍କ ମନୋଭାବ ବଦଳାଇବା ଲକ୍ଷ୍ୟରେ କର୍ପୋରେଟ ଟିକସକୁ କମାଯାଇଛି ବୋଲି ନୀତି ଆୟୋଗ ଉପାଧ୍ୟକ୍ଷ କହିଛନ୍ତି। ସୂଚନାଥାଉ କି, ଜିଏସ୍ଟି ଆଦାୟ ୧ ଲକ୍ଷ କୋଟି ଟଙ୍କା ରହୁଛି। ସେହିପରି ପ୍ରତ୍ୟକ୍ଷ ଟିକସ ଆଦାୟ ପ୍ରଥମ ତ୍ରୈମାସରେ ମାତ୍ର ୪.୭% ବୃଦ୍ଧି ପାଇଛି। ଟିକସ ହ୍ରାସ ଘୋଷଣା ପରେ କାରବାର ବଢ଼ିଲେ ଉଭୟ ପ୍ରତ୍ୟକ୍ଷ ଓ ପରୋକ୍ଷ ଟିକସ ଆଦାୟ ବଢ଼ିବ ବୋଲି ରାଜୀବ କୁମାର କହିଛନ୍ତି।