କାଳିଆପାଣି,୧୧।୪(ଡିଏନଏ): ଲକ୍ଡାଉନ ସମୟରେ କୌଣସି କର୍ମଚାରୀଙ୍କୁ କମ୍ପାନିପକ୍ଷରୁ ଛଟେଇ କରାଯାଇ ପାରିବ ନାହିଁ କିମ୍ବା ଦରମା କାଟିପାରିବେ ନାହିଁ ବୋଲି ସରକାରଙ୍କ ପକ୍ଷରୁ ନିର୍ଦ୍ଦେଶ ରହିଛି। ମାତ୍ର ସରକାରଙ୍କ ଏହି ନିର୍ଦ୍ଦେଶନାମାକୁ ଏଡ଼ାଇ ଯାଇ ମିଶ୍ରିଲାଲ କମ୍ପାନୀ ପ୍ରାଥମିକ ପର୍ଯ୍ୟାୟରେ ୧୦ଜଣ ନିୟମିତ କର୍ମଚାରୀଙ୍କୁ ଛଟେଇ କରିଥିବା ଜଣାପଡ଼ିଛି। ଏହି ଛଟେଇ ନୋଟିସ କାର୍ଯ୍ୟାଳୟର ନୋଟିସ ବୋର୍ଡରେ ମାରିବା ସହ ତୁରନ୍ତ ଦସ୍ତଖତ କରିବାକୁ କର୍ମଚାରୀଙ୍କୁ ନିର୍ଦ୍ଦେଶ ଜାରି କରିଛି। ସୂଚନା ଥାଉକି, କ୍ରୋମାଇଟ ଖଣି ଅଞ୍ଚଳରେ କାର୍ଯ୍ୟ କରୁଥିବା ମିଶ୍ରିଲାଲ ମାଇନ୍ସ କମ୍ପାନୀ କଅଁସ ପଞ୍ଚାୟତର ସାରୁଆବିଲରେ ଖଣି ଲିଜ ପାଇ ଦୀର୍ଘ ୫୦ ବର୍ଷରୁ ଊର୍ଦ୍ଧ୍ୱ ହେବ କାର୍ଯ୍ୟ କରିଆସୁଛି। ମାତ୍ର ୨୦୨୦ ମାର୍ଚ୍ଚ ୩୧ରେ କମ୍ପାନୀର ଲିଜ ଅବଧି ଶେଷ ହୋଇଯାଇଛି। ପୁନଃ ଖଣି ଲିଜ ଡକାଯାଇଥିବାବେଳେ ଅନ୍ୟ କମ୍ପାନୀ ହାତକୁ ଲିଜ ଚାଲିଯାଇଥିଲା। ଫଳରେ କମ୍ପାନୀ ତା’ର କର୍ମଚାରୀଙ୍କୁ କମ୍ପାନୀ ଛଟେଇ ପ୍ରକ୍ରିୟା ଆରମ୍ଭ କରିଛି। ଏନେଇ ଅସନ୍ତୋଷ ଦେଖାଦେଇଛି। କମ୍ପାନୀ ନିର୍ଦ୍ଦେଶ ଅନୁଯାୟୀ କାର୍ଯ୍ୟ ବନ୍ଦ ହେଉଥିବାରୁ କମ୍ପାନୀରୁ ସମ୍ପୂର୍ଣ୍ଣ ଛଟେଇ କରାଯିବା ନେଇ ନୋଟିସ ଲଗାଯାଇଛି। ଲକଡାଉନ ଅବଧି ୩୦ ଏପ୍ରିଲକୁ ବୃଦ୍ଧି ପାଇଥିବାବେଳେ ଛଟେଇ କରାଗଲେ କିପରି କର୍ମଚାରୀମାନେ ଚଳିବେ ବୋଲି କର୍ମଚାରୀମାନେ ପ୍ରଶ୍ନ ଉଠାଇଛନ୍ତି। ଏପରି ନିଷ୍ପତି ବିରୋଧରେ ଶ୍ରମବିଭାଗ ମୁଖ୍ୟଙ୍କ ନିକଟକୁ କର୍ମଚାରୀମାନେ ଚିଠି ଲେଖିଥିବା ଛଟେଇ କର୍ମଚାରୀ ପ୍ରତାପ ଚନ୍ଦ୍ର ପଣ୍ଡା, ବିକାଶ ବାରିକ, ସୂର୍ଯ୍ୟକାନ୍ତ ବେହେରା ପ୍ରମୁଖ ପ୍ରକାଶ କରିଛନ୍ତି। ଏ ସମ୍ପର୍କରେ କମ୍ପାନୀ ନିର୍ଦ୍ଦେଶକ ସିଦ୍ଧାର୍ଥ ଜୈନଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ ନ ଉଠାଇବାରୁ ତାଙ୍କ ମତାମତ ମିଳିପାରି ନାହିଁ।