ଧାମନଗର,୧୧।୧୨(ଡି.ଏନ.ଏ.)- ସାହସ ଓ ମନୋବଳ ରଖି କାର୍ଯ୍ୟ କଲେ କାହାରି ପେଟ ଅପୋଷା ରହିବ ନାହିଁ ା କୃଷି ବ୍ୟତୀତ ଆନୁଷଙ୍ଗିକ କୃଷି କିମ୍ବା ପ୍ରାଣୀଧନ ପାଳନ ଚାଷୀଙ୍କୁ ମଧ୍ୟ ସ୍ବାବଲମ୍ବୀ କରିପାରିବ। ଏକଦା ରିକ୍ସା ଟାଣି ପେଟ ପୋଷୁଥିବା ଭଦ୍ରକ ଜିଲା ଧାମନଗର ବ୍ଲକ ହସନାବାଦ ପଞ୍ଚାୟତ ବନବାଗ ଗାଁର ଭୀମସେନ ଦାସ (୪୮) ଏବେ ନିଜ ଅଞ୍ଚଳରେ ଜଣେ ସଫଳ ଛେଳି ଚାଷୀଙ୍କ ପରିଚୟ ପାଇ ପାରିଛନ୍ତି। ନିଜ ଚେଷ୍ଟାରେ ଆଧୁନିକ କୌଶଳ ଶିକ୍ଷା କରି ଉନ୍ନତ ପ୍ରଜାତିର ଛେଳି ପାଳନ କରି ଏବେ ନିଜ ଭାଗ୍ୟ ନିଜେ ଗଢି ପାରିଛନ୍ତି। ଆର୍ଥିକ ଦୃଷ୍ଟିରୁ ସ୍ବାବଲମ୍ବୀ ହୋଇ ସେ ପରିବାର ପ୍ରତିପୋଷଣ ସହ ନିଜ ପିଲାଙ୍କୁ ପାଠ ପଢ଼ାଇ ପାରୁଛନ୍ତି। ତାଙ୍କ ଜୀବନ ସଂଘର୍ଷର କାହାଣୀ ଅନ୍ୟମାନଙ୍କୁ ପ୍ରେରଣା ଦେଇଛି, ତା’ ନୁହେଁ ସେ ଆଗ୍ରହୀ ଚାଷୀଙ୍କୁ ମଧ୍ୟ ଛେଳି ପାଳନ ସମ୍ପର୍କରେ କୌଶଳ ଶିଖାଉଛନ୍ତି।
ଭୀମସେନ କହନ୍ତି, ସେ ଗରିବ । ଅନ୍ୟ କିଛି ସମ୍ବଳ ନ ଥିବାରୁ ଯୁବାବସ୍ଥାରେ ପେଟ ପୋଷିବା ଲାଗି ରିକ୍ସା ଟାଣିବା ଆରମ୍ଭ କରିଥିଲେ। ଦୀର୍ଘ ୨୦ ବର୍ଷ ଧରି ରିକ୍ସା ଚଳାଇଛନ୍ତି। ଧୁଷୁରି ବଜାରରେ ରିକ୍ସା ଟାଣି ନଦୀଗଁା ଓ ହସନାବାଦ ଆଦି ବଜାରକୁ ଲୋକଙ୍କୁ ନେବାଆଣିବା କରୁଥିଲେ। ପରେ ଗାଡିମୋଟର ଚାଲିବାରୁ ସମସ୍ତଙ୍କ ଲାଗି ରିକ୍ସା ଅଲୋଡା ହୋଇଗଲା। ଏହାପରେ ସେ ଭିନ୍ନ ପନ୍ଥା ଆପଣାଇବାକୁ ଉଦ୍ୟମ କରିଥିଲେ। ମନରେ ସାହସ ଜୁଟାଇ ଉନ୍ନତ ପ୍ରଣାଳୀରେ ଛେଳି ଚାଷ କରିବାକୁ ପ୍ରଥମେ ଚିନ୍ତା କରି ୪ ,୫ ଟି ଛେଳି ପାଳିଥିଲେ। ଉନ୍ନତ ପ୍ରଣାଳୀରେ ଚାଷ କରି ବତ୍ତର୍ର୍ମାନ ସେ ଶତାଧିକ ଛେଳିର ମାଲିକ । ଥରେ ଧୂଷୁରୀ ଭିଏଏସ ଟିକାକରଣ ପାଇଁ ଗଁାକୁ ଆସିଥିଲେ। ତାଙ୍କ ନଜର ଭୀମସେନଙ୍କ ଛେଳି ଉପରେ ପଡିଥିଲା । ସେ ଭୀମସେନଙ୍କୁ ଡାକି ଉନ୍ନତ ଛେଳିି ପାଳନ କଥା କହିଥିଲେ । ପରେ ସରକାରଙ୍କ ଏନଏମପିଏସ ଯୋଜନାର ସହାୟତା ନେଇ ସବ୍ସିଡି ଅର୍ଥରେ ଭୀମସେନ ୨୫ ରୁ ୧୫ ଫୁଟରେ ଏକ ପକ୍କା ଗୁହାଳ ତିଆରି କରିଥିଲେ। ଭଲ ପରିବେଶରେ ସେଠାରେ ଛେଳି ରଖି ଯତ୍ନ ସହକାରେ ପାଳନ କଲେ। ଏପରିକି ରୋଗ ନ ହେବା ଲାଗି ସେ ଟିକାକରଣ କରିବା ସାଙ୍ଗକୁ ଛେଳିଙ୍କୁ କୃମି ନାଶକ, ଗର୍ଭଧାରଣ ଏବଂ ରୋଗ ନିରାକରଣ ଔଷଧ ଦେଲେ। ଏହି କାମରେ ତାଙ୍କର ସହଧର୍ମିଣୀ ମୀନାକ୍ଷୀ ସହଯୋଗ କରିଥିଲେ। ସେ ନିଜେ ଏବେ ଛେଳିଙ୍କୁ ଚିକିତ୍ସା କରିବା ସହିତ ଇଞ୍ଜେକ୍ସନ ଦେଇ ପାରୁଛନ୍ତି । ଏହାମଧ୍ୟରେ ଭୀମସେନଙ୍କ ପୂର୍ବ ଅବସ୍ଥା ବଦଳି ଯାଇଛି । ବାର୍ଷିକ ଦେଢ଼ରୁ ଦୁଇ ଲକ୍ଷ ଟଙ୍କା ସେ ରୋଜଗାର କରି ପାରୁଛନ୍ତି। ଏଥିରେ ସେ ତାଙ୍କ ବଡ଼ପୁଅକୁ ବିଏସସି ଏବଂ ସାନପୁଅକୁ ମାଟ୍ରିକ ପଢ଼ାଉଛନ୍ତି । ବଡ଼ ଝିଅକୁ ବିବାହ ଦେବା ଲକ୍ଷ୍ୟରେ ରହିଛନ୍ତି। ଦିନସାରା ଭୀମସେନ ବଣ ଜଙ୍ଗଲକୁ ଯାଇ ଛେଳି ଚରାଇ ଘରକୁ ଫେରିଥାନ୍ତି। ଛେଳିଙ୍କ ଯତ୍ନ ନେବାରେ ପରିବାରର ସମସ୍ତେ ତାଙ୍କୁ ସହଯୋଗ କରନ୍ତି । ଜଣେ ସଫଳ ଛେଳି ଚାଷୀ ଭାବେ ଜିଲାରେ ପ୍ରଥମ ସ୍ଥାନ ହାସଲ କରି ୨୦୧୬ରେ ରାଜ୍ୟସ୍ତରୀୟ କୃଷି ମହୋତ୍ସବରେ ପୁରସ୍କୃତ ହୋଇଥିଲେ। ଏହାପରେ ବିଭାଗ ତରଫରୁ ତାଙ୍କୁ ଅଧିକ ପ୍ରୋତ୍ସାହନ ମିଳିଥିଲା। ଧୂଷୁରୀ ଅଞ୍ଚଳରେ ପରିବେଶରେ ବ୍ଲାକ ବେଙ୍ଗଲ ପ୍ରଜାତିର ଛେଳି ଭଲ ବଢ଼ି ପାରୁଛନ୍ତି। ଏହି ଛେଳି ଚାଷ କରିବା ପାଇଁ ଚାଷୀଙ୍କୁ ଉତ୍ସାହିତ କରାଯାଉଛି ବୋଲ ଧୂଷୁରୀ ପ୍ରାଣୀଧନ ଚିକିତ୍ସକ ଡା. ନିରାକାର ଜେନା କହିଛନ୍ତି। ଆଧୁନିକ ପ୍ରଣାଳୀରେ ଛେଳି ଚାଷ କରି ସଫଳତା ପାଇବା ପରେ ଭୀମସେନଙ୍କୁ ଅନୁସରଣ କରି ଶଇଲୋ, ହସନାବାଦ, କୋଠାର, ଶ୍ରୀଗଙ୍ଗାରେ ଅନେକ ଚାଷୀ ଏବେ ଛେଳିଚାଷ କରିବା ଆରମ୍ଭ କରିଛନ୍ତି।