କର୍ଲାମୁଣ୍ଡା,୯।୮(ଡି.ଏନ.ଏ.)-କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକରେ ମଙ୍ଗଳବାର ରାତିରୁ ଗୁରୁବାର ସକାଳ ପର୍ଯ୍ୟନ୍ତ ଲଗାଣ ବର୍ଷା ହୋଇଛି। ଏଥିଯୋଗୁ ବ୍ୟାପକ କ୍ଷୟକ୍ଷତି ହୋଇଥିବା ଜଣାପଡ଼ିଛି । ବୁଧବାର ୮୭ ମି.ମି. ବର୍ଷା ରେକର୍ଡ ହୋଇଥିବା ବେଳେ ଗୁରୁବାର ସକାଳ ସୁଦ୍ଧା ୩୦୯.୨ ମି.ମି. ବର୍ଷା ହୋଇଥିବା ବ୍ଲକ ସୂତ୍ରରୁ ଜଣାପଡିଛି । ଲଗାଣ ବର୍ଷା ଯୋଗୁ ରିଞ୍ଜା ସରବରା ଯୋର ବ୍ରିଜ ଗୋଟିଏ ପଟେ ଛାତ ଭୁଶୁଡି ପଡିଛି। ସେହିପରି କର୍ଲାମୁଣ୍ଡା ପିଡବ୍ଲ୍ୟୁଡି ରାସ୍ତାରେ ମଧ୍ୟ ଘାଇ ସୃଷ୍ଟି ହୋଇଛି । ଅନ୍ୟପଟେ ବ୍ଲକର ସ-ମାଲପଡାର ମାଲପଡା ଗାଁର ଅମରେନ୍ଦ୍ର ସାହୁଙ୍କ ଘର ଭୁଶୁଡି ପଡ଼ିଛି। ପୁଟିଗାଁର ବୀର କୁମାର, କ୍ଷୁର ସାଗର ଦଣ୍ଡସେନା, ରିଞ୍ଜା ଗ୍ରାମର କଳାକାହାନୁ ସାହୁ ଓ ପୁଟିଗାଁର ଭୈରବ ଦଣ୍ଡସେନାଙ୍କ ଘର ଭାଙ୍ଗିଥିବା ଜଣାପଡିଛି । ଗତ ରାତିରେ ରିଞ୍ଜା, ରେଙ୍ଗାଲି, ଦେଓଗାଁ, ଏକାତରା ବାହ୍ୟ ଜଗତରୁ ବିଚ୍ଛିନ୍ନ ହୋଇଥିବା ବେଳେ ବର୍ତ୍ତମାନ ପରିସ୍ଥିତି ସ୍ବଭାବିକ ଥିବା ଜଣାପଡିଛି ।