ଭଦ୍ରକ ଅଫିସ, ୪ା୨- ସୋମବାର ମଧ୍ୟାହ୍ନରୁ ୪ଜଣ କଲେଜ ଛାତ୍ରୀ ଏସ୍ପିଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ। କଲେଜରେ ବିଭିନ୍ନ ସମସ୍ୟା ରହିଥିଲେ ମଧ୍ୟ ସେମାନେ ବାରମ୍ବାର କଲେଜ କର୍ତ୍ତୃପକ୍ଷ, ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ମଧ୍ୟ ତାଙ୍କ ଦାବି ପ୍ରତି ଗୁରୁତ୍ୱ ଦିଆଯାଉ ନ ଥିବାରୁ ଛାତ୍ରୀମାନେ ଶେଷରେ ଏସ୍ପିଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ। ତିହିଡ଼ି ବ୍ଲକ ବିଏନ୍ଏମ୍ଏ ପାଳିଆବିନ୍ଧା କଲେଜରେ ନିର୍ଦ୍ଦିଷ୍ଟ ଜଣେ କର୍ମଚାରୀଙ୍କ ଏକଛତ୍ର ଶାସନରେ ଅତିଷ୍ଟ ହୋଇ ଏହି ଛାତ୍ରୀମାନେ ଧାରଣାରେ ବସିଥିବା କୁହାଯାଇଛି। କଲେଜର ଅଧ୍ୟକ୍ଷ ଏବଂ ଡିଇଓଙ୍କ ମନମୁଖୀ କାର୍ଯ୍ୟରେ ଅତିଷ୍ଟ ହୋଇ ଏମାନେ ଧାରଣାରେ ବସିଥିବା ଯୁକ୍ତ ୩ ପ୍ରଥମ ବର୍ଷର ମାନସୀ ପରିଡ଼ା, ସ୍ମୃତିରେଖା ରାଉତ, ସଙ୍ଗୀତା ବେହେରା ଓ ଯୁକ୍ତ ୨ ଦ୍ୱିତୀୟ ବର୍ଷର ରୀତା ଦାସ ପ୍ରତିକ୍ରିୟା ରଖିଛନ୍ତି। ରିପୋର୍ଟ ଲେଖା ସୁଦ୍ଧା ପୋଲିସ ବହୁ ବୁଝାଶୁଝା କରିଥିଲେ ମଧ୍ୟ ଛାତ୍ରୀମାନେ ଧାରଣାରୁ ଉଠି ନ ଥିବା ଜଣାପଡ଼ିଛି।