ଭବାନୀପାଟଣା,୧୯।୬ (ଡି.ଏନ୍.ଏ.): କଳାହାଣ୍ଡି ଜିଲାର ଡୁଲେଶ୍ୱର ତାଣ୍ଡି ଜଣେ ବିପ୍ଲବୀ ରାପ୍ ସଙ୍ଗୀତକାର। ସେ ସୋସିଆଲ ମିଡିଆରେ ବେଶ ଚର୍ଚ୍ଚିତ। ହେଲେ ତାଙ୍କ ପରିବାରର ଆର୍ଥତ୍କ ସ୍ଥିତି ଭଲ ନ ଥିବାରୁ ସେ ଅସୁବିଧାରେ ଥିବା ନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ଓଡ଼ିଶାର ଆଗ ଧାଡିର କଣ୍ଠଶିଳ୍ପୀ ହ୍ୟୁମାନ ସାଗର ତାଙ୍କୁ ସହଯୋଗର ହତ ବଢ଼ାଇଛନ୍ତି। ସେ ଜଣେ ପ୍ରତିଭାର ମନକୁ ବୁଝି ପାରିଛନ୍ତି। ବୁଧବାର ଡୁଲେଶ୍ୱରଙ୍କ ସହ ଫୋନ ଯୋଗେ ଯୋଗାଯୋଗ କରି ୩୦ ହଜାର ଟଙ୍କା ସହାୟତା ପ୍ରଦାନ କରିଥିଲେ। ଆବଶ୍ୟକ ହେଲେ ଆଗକୁ ସହାୟତା ଦିଆଯିବ ବୋଲି ପ୍ରତିଶ୍ରୁତି ଦେଇଥିଲେ। ଏହା ପରେ ଡୁଲେଶ୍ୱର ଫେସବୁକ ଆଇଡିରେ ପୋଷ୍ଟ କରି ହୁମାନ୍ ସାଗରଙ୍କୁ ଧନ୍ୟବାଦ ଜଣାଇଚନ୍ତି।
ସୂଚନା ଅନୁଯାୟୀ, ଡୁଲେଶ୍ୱର ଭବାନୀପାଟଣା ବ୍ଲକ ବୋର୍ଡା ଗାଁ ସ୍କୁଲରେ ପ୍ରାଥମିକ ଶିକ୍ଷା ପରେ ୨୦୦୮ ମସିହାରେ ଭବାନୀପାଟଣା ସ୍ବୟଂଶାସିତ ମହାବିଦ୍ୟାଳୟରେ ନାମ ଲେଖାଇଥିଲେ। ଯୁକ୍ତ ତିନି ସାରିବା ପରେ ମା’ଙ୍କ ଦେହ ଖରାପ ହେବା ଯୋଗୁ ଅର୍ଥ ଯୋଗାଡ କରିବା ପାଇଁ ସୁଦୂର ରାୟପୁରକୁ ଚାଲି ଯାଇଥିଲେ। ରାୟପୁରରେ କିଛି ଦିନ କାମ କଲାପରେ ହଠାତ୍ ବାପା ନୀଳାଞ୍ଚଳ ତାଣ୍ଡିଙ୍କ ପକ୍ଷାଘାତନ୍ରେ ୨୦୧୬ରେ ମୃତ୍ୟୁ ଘଟିଥିଲା। ବାପାଙ୍କ ମୃତ୍ୟୁ ମୃତ୍ୟୁପରେ ସେ ଓ ତାଙ୍କ ମା’ ଅଭାବ ଅସୁବିଧାରେ ରହୁଥିଲେ। ହେଲେ ସେ ବର୍ତ୍ତମାନ ନିଜ ପ୍ରତିଭାର ନୂଆ ପରିଚୟ ସୃଷ୍ଟି କରିପାରିଛନ୍ତି। ଏବେ ସେ ରାପର ଡୁଲେ ରୋକର୍ ଭାବେ ସବୁଆଡେ ପରିଚିତ। ନିଜର ଅଭାବୀ ସମସ୍ୟାକୁ ନେଇ ନିନନ୍ ଷ୍ଟପ୍ ରାପ୍ ସଙ୍ଗ ଉପସ୍ଥାପନା କରୁଛନ୍ତି। ସମାଜର ସାମ୍ପ୍ରତିକ ପରିସ୍ଥିତିର ବାସ୍ତବଚିତ୍ର ଉପସ୍ଥାପନା କରିବାରେ ସଫଳ ହୋଇପାରିଛନ୍ତି। ସେ ଦେଶର ବ୍ୟବସ୍ଥା, ଗରିବୀ ଓ ସାମାଜିକ ଅବ୍ୟବସ୍ଥା ଆଦିକୁ ନେଇ ନିଜ ରାପ୍ ସଙ୍ଗ ମାଧ୍ୟମରେ ବିପ୍ଲବ ଆରମ୍ଭ କରିଛନ୍ତି। ବିଭିନ୍ନ ଗଣ ମାଧ୍ୟମରେ ଖବର ପ୍ରସାରିତ ହୋଇ ସେ ଲୋକଲୋଚନକୁ ଆସିବା ପରେ ଓଡ଼ିଶାର ଲୋକପ୍ରିୟ କଣ୍ଠଶିଳ୍ପୀ ଗାୟକ ହୁମାନ୍ ସାଗର ତାଙ୍କୁ ସହଯୋଗର ହାତ ବଢ଼ାଇଛନ୍ତି।
