ଭବାନୀପାଟଣା,୩୦।୭(ଡି.ଏନ.ଏ.): କଳାହାଣ୍ଡି ଜିଲାର ବିଭିନ୍ନ ଥାନା ଅଞ୍ଚଳରୁ ନିଖୋଜ ହୋଇଯାଇଥିବା ନାବାଳିକା ନାବାଳକ ଏବଂ ବିଭିନ୍ନ ଦୋକାନ ବଜାର, କାମ କରୁଥିବା ନାବାଳିକାନାବାଳକଙ୍କୁ ଉଦ୍ଧାର କରିବା ସହିତ ସେମାନଙ୍କ ଉପଯୁକ୍ତ ରକ୍ଷଣା ବେକ୍ଷଣ ଓ ଥଇଥାନ ବ୍ୟବସ୍ଥା କରାଯିବ। ଏଥିପାଇଁ ମଙ୍ଗଳବାର କଳାହାଣ୍ଡି ଜିଲା ପୋଲିସ ପକ୍ଷରୁ ‘ପରୀ-୩’ କାର୍ଯ୍ୟକ୍ରମ ଆରମ୍ଭ ହୋଇଯାଇଛି। ଏହି କାର୍ଯ୍ୟକ୍ରମ ଏକ ସପ୍ତାହ ଧରି ଚାଲିବ। ଏଥିରେ ବିଭିନ୍ନ ଥାନା ଅଞ୍ଚଳରେ ଥିବା ଏନ୍ଜିଓମାନେ ସହଯୋଗ କରିବା ସହିତ ସେମାନଙ୍କ ଥଇଥାନ ପାଇଁ ଜିଲା ଶିଶୁ ସୁରକ୍ଷା କମିଟି କାର୍ଯ୍ୟ କରିବେ ବୋଲି ମଙ୍ଗଳବାର ଜିଲା ପୋଲିସ କାର୍ଯ୍ୟାଳୟରେ ଏକ ଖବରଦାତା ସମ୍ମିଳନୀରେ କଳାହାଣ୍ଡି ଏସପି ବାତୁଲା ଗଙ୍ଗାଧର ସୂଚନା ଦେଇଛନ୍ତି। ସେ ପ୍ରକାଶ କରିଛନ୍ତି ଯେ, ଏହି ‘ପରୀ-୩’ କାର୍ଯ୍ୟକ୍ରମ ଏକ ମହତ ଉଦ୍ଦେଶ୍ୟ ନେଇ ସରକାର ଆରମ୍ଭ କରିଛନ୍ତି। ପୂର୍ବରୁ ‘ପରୀ-୧’ ଓ ‘ପରୀ-୨’ ଜିଲାରେ ସଫଳତା ସହିତ କାର୍ଯ୍ୟ କରିଛି। ଏହି କାର୍ଯ୍ୟକ୍ରମରେ କଳାହାଣ୍ଡି ଜିଲାର ୧୬ଟି ଥାନାରେ ୧୧୭ ଜଣ ନିଖୋଜ ହୋଇଥିବା ନାବାଳିକାନାବାଳକମାନଙ୍କୁ ଉଦ୍ଧାର କରିବା ସହିତ ବିଭିନ୍ନ ଜିଲା ଓ ରାଜ୍ୟ ବାହାରୁ ଯେଉଁ ଶିଶୁମାନେ ଘରୁ ପଳାଇ ଆସି ବିଭିନ୍ନ ଚା ଦୋକାନ, ଜଳଖିଆ ଦୋକାନ, ଗ୍ୟାରେଜ ଏବଂ ଅନ୍ୟାନ୍ୟ ସ୍ଥାନରେ କାମ କରୁଛନ୍ତି ସେମାନଙ୍କୁ ଉଦ୍ଧାର କରାଯାଇ ସେମାନଙ୍କ ଉପଯୁକ୍ତ ରକ୍ଷଣା ବେକ୍ଷଣ ଓ ଥଇଥାନ ବ୍ୟବସ୍ଥା କରାଯିବ। ଖବରଦାତା ସମ୍ମିଳନୀରେ ଅତିରିକ୍ତ ଏସପି ଗୋପୀନାଥ ମଣିପାତ୍ର, ଅତିରିକ୍ତ ଏସପି ପି.କେ. ମହନ୍ତ, ସିଡବ୍ଲ୍ୟୁସି ଅଧ୍ୟକ୍ଷ ରାଜେଶ ନାୟକ, ଡିସିପିଓ ଶୈଳେନ୍ଦୁ ଶେଖର ମାହାପାତ୍ରଙ୍କ ସମେତ ବିଭିନ୍ନ ଥାନାର ଆଇଆଇସି ଓ ଅଧିକାରୀମାନେ ଯୋଗଦେଇଥିଲେ।