ବନ୍ତ,୧୬।୧୦(ସ୍ବ.ପ୍ର.)- କଳା ଓ ସଙ୍ଗୀତର ଯାଦୁକରୀ ପ୍ରଭାବ ରହିଛି। ଏହା ମାଧ୍ୟମରେ ସାମାଜିକ ପରିବର୍ତ୍ତନ ଆଣିବା ସମ୍ଭବ। ଏଥିଲାଗି ଗ୍ରାମାଞ୍ଚଳର କଳା ଓ ସଂସ୍କୃତିକୁ ଉଜ୍ଜୀବିତ ରଖିବା ଓ ଏହାର ପ୍ରଚାର ପ୍ରସାର ଲାଗି ସେ ଛାତ୍ରୀଛାତ୍ରଙ୍କୁ ସଙ୍ଗୀତ ଶିକ୍ଷା ଦେଉଛନ୍ତି ବୋଲି ସଙ୍ଗୀତ ଜଗତରେ ବହୁମୁଖୀ ପ୍ରତିଭାର ଅଧିକାରୀ ସୁପରିଚିତ କଳାକାର ନୃସିଂହ କର ମତବ୍ୟକ୍ତ କରିଛନ୍ତି।
ଭଦ୍ରକ ଜିଲା ଆଗରପଡା ଥାନା ଅଧୀନ ଚକ୍ରାପାଢୀ ଗ୍ରାମରେ ନୃସିଂହଙ୍କ ଘର । ପିଲାଦିନୁ ସଙ୍ଗୀତ କଳା ପ୍ରତି ଆକୃଷ୍ଟ ହୋଇଥିଲେ। ଅଷ୍ଟମ ଶ୍ରେଣୀରେ ପାଠ ପଢୁଥିବା ବେଳେ ସେ ଯନ୍ତ୍ର ସଙ୍ଗୀତ ଶିକ୍ଷା ଆରମ୍ଭ କରିଥିଲେ। ପରେ ଉକତ୍ଳ କେଶରୀ ଡ. ହରେକୃଷ୍ଣ ମହତାବଙ୍କ ସହାୟତାରେ ଆଗରପଡାସ୍ଥିତ ଶ୍ରୀ ରଘୁନାଥଜୀଉଙ୍କ ସେବାରେ ନିଯୁକ୍ତି ପାଇବା ସହିତ ଉଚ୍ଚଶିକ୍ଷା ଲାଭ କରିଥିଲେ। ସଙ୍ଗୀତ ବାଦ୍ୟଯନ୍ତ୍ରରେ ଚଣ୍ଡିଗଡ ବିଶ୍ୱ ବିଦ୍ୟାଳୟରୁ ବିଶାରଦ, ଡିପ୍ଲୋମା ଓ ଡିଗ୍ରୀ ହାସଲ କରିଥିଲେ। ଓଡିଶାର ସମସ୍ତ ଆଗଧାଡିର ସଙ୍ଗୀତକାରଙ୍କ ସହ ସଙ୍ଗୀତ ପରିବେଷଣର ସୁଯୋଗ ପାଇବା ସହ ହାରମୋନିୟମ, ତବଲା, ବେହେଲା, ଗୀଟାର, ଇଲେକ୍ଟ୍ରୋନିକ୍ସ କେସିଓ ଆଦି ବାଦ୍ୟ ଯନ୍ତ୍ରରେ ସେ ନିଜ ପ୍ରତିଭା ଫୁଟାଇ ପାରିଛନ୍ତି। ସଙ୍ଗୀତ ମଧ୍ୟମରେ ସାମାଜିକ ସଚେତନା ସୃଷ୍ଟି ଲାଗି ସେ ଗଢିଛନ୍ତି ‘ଲୋକଶକ୍ତି’ ଅନୁଷ୍ଠାନ । ଭାରତ ସରକାରଙ୍କ ସଙ୍ଗୀତ ନାଟକ ବିଭାଗ ଦ୍ୱାରା ମନୋନୀତ ହୋଇ ଓଡିଶାର ବିଭିନ୍ନ ପ୍ରାନ୍ତରେ ସଙ୍ଗୀତ ଓ ପଥପ୍ରାନ୍ତ ନାଟକ ପରିବେଷଣ କରି ପରିବେଶ, ସ୍ବାସ୍ଥ୍ୟ, ନାରୀଶିକ୍ଷା, ଶିଶୁ ଶ୍ରମିକ ଉଚ୍ଛେଦ, ବୃକ୍ଷରୋପଣ ଆଦି ସମ୍ପର୍କରେ ସଚେତନତା ସୃଷ୍ଟି କରି ଆସିଛନ୍ତି। ଏବେ ବିଶ୍ୱ ସ୍ବାସ୍ଥ୍ୟ ସେବା ସଂଘରେ ଯୋଗ ଦେଇ ଯୋଗ ମାଧ୍ୟମରେ ସୁସ୍ଥ ଶରୀର ଗଠନ ଲାଗି ଲୋକଙ୍କୁ ବୁଝାଇଛନ୍ତି।
ନୃସିଂହ କହନ୍ତି, କଳା ଓ ସଙ୍ଗୀତ ମୋ ଜୀବନ। ମନରେ ଯେତେ ଦୁଃଖ ଥିଲେ ମଧ୍ୟ ସଙ୍ଗୀତର ତାଳେ ତାଳେ ତାହା ସ୍ବତଃ ଅପସରି ଯାଇଥାଏ। ସମ୍ବଳ ଅଭାବରୁ ଆଗକୁ ବଢିବା ତାଙ୍କ ପାଇଁ କଷ୍ଟସାଧ୍ୟ ହୋଇ ଥିଲେ ବି ସେ ସଂଘର୍ଷ ଜାରି ରଖିଛନ୍ତି। ପିଲାଙ୍କୁ ସଙ୍ଗୀତ ଶିକ୍ଷା ଦେଇ ସେମାନଙ୍କୁ ସଫଳ କଳାକାର ଭାବେ ଗଢିପାରିଲେ ତାଙ୍କ ଜୀବନ ସାର୍ଥକ ହେବ ବୋଲି କହିଛନ୍ତି ।
ସଙ୍ଗୀତ ସାଧନାକୁ ଆଦରି ନେବା ପରଠାରୁ ସେ ଛୋଟବଡ ଥିଏଟର ଓ ଅପେରା ଗଢିବା ସହ କଳାର ପ୍ରଚାର ପ୍ରସାର ଲାଗି କାର୍ଯ୍ୟ କରି ଆସୁଛନ୍ତି। ଭାରତ ସରକାରଙ୍କ ସଙ୍ଗୀତ ନାଟକ ବିଭାଗ ଦ୍ୱାରା ଯୋଗ୍ୟ ବିବେଚିତ ହୋଇ ‘ଲୋକଶକ୍ତି’ ସଂସ୍ଥା ଜରିଆରେ ଓଡିଶାର ବିଭିନ୍ନ ସ୍ଥାନ ବୁଲି ସଚେତନତା କାର୍ଯ୍ୟକ୍ରମ ପରିବେଷଣ କରି ସେ ଯଥେଷ୍ଟ ଆନନ୍ଦ ଅନୁଭବ କରିଛନ୍ତି। ସମ୍ପ୍ରତି ଆଗରପଡା ଅଞ୍ଚଳରେ ଛାତ୍ରୀଛାତ୍ରଙ୍କୁ ସଙ୍ଗୀତ ଶିକ୍ଷା ଦେଉଛନ୍ତି। ବିଭିନ୍ନ ଅନୁଷ୍ଠାନ ପକ୍ଷରୁ ଆୟୋଜିତ ଉତ୍ସବରେ ସଙ୍ଗୀତ ପରିବେଷଣ କରି ସେ ସମବେତ ଜନତାଙ୍କୁ ମନ୍ତ୍ରମୁଗ୍ଧ କରିଥାନ୍ତି। ଶେଷ ଜୀବନ ପର୍ଯ୍ୟନ୍ତ ସେ କଳା ସଙ୍ଗୀତକୁ ନେଇ ଜିଇବେ ବୋଲି କହିଛନ୍ତି।