କଟକ ଅଫିସ,୧୩ା୨:କଟକ ଉପର ବାଲିଯାତ୍ରା ପଡ଼ିଆରେ ୨୨ତମ ବାରବାଟୀ ଫେଷ୍ଟିଭାଲ ରବିବାର ଉଦ୍ଘାଟିତ ହୋଇଯାଇଛି। ବାରବାଟୀ-କଟକ ବିଧାୟକ ମହମ୍ମଦ ମୋକିମ ଏହାକୁ ଉଦ୍ଘାଟନ କରି କଟକର ଇତିହାସରେ ଏହି ଉତ୍ସବର ଆୟୋଜନ ସମ୍ପର୍କରେ ଆଲୋକପାତ କରିଥିଲେ। ମୁଖ୍ୟ ଅତିଥି ଭାବେ କଟକ ମହାନଗର ନିଗମ (ସିଏମ୍ସି) ମେୟର ସୁବାସ ସିଂ ଯୋଗଦେଇ କହିଥିଲେ, କଟକ କଳା, ସଂସ୍କୃତିର ସହର। ଏଭଳି କାର୍ଯ୍ୟକ୍ରମ ଦ୍ୱାରା ଏଠାକାର ପରମ୍ପରା, କଳା, ସଂସ୍କୃତି ଆହୁରି ସମୃଦ୍ଧ ହୋଇଛି ବୋଲି ସେ କହିଥିଲେ। ସେହିପରି ସମ୍ମାନିତ ଅତିଥି ଭାବରେ ସାରଳା ସାହିତ୍ୟ ସଂସଦର ସଭାପତି ଇଂ. ପ୍ରଭାକର ସ୍ବାଇଁ ଯୋଗଦେଇ ଉକ୍ତ ଫେଷ୍ଟିଭାଲର ଯଥାର୍ଥତା ସମ୍ପର୍କରେ କହିଥିଲେ। ସାମ୍ବାଦିକ ଅରୁଣ କୁମାର ପଣ୍ଡାଙ୍କ ସଭାପତିତ୍ୱରେ ଅନୁଷ୍ଠିତ କାର୍ଯ୍ୟକ୍ରମରେ ଅଭ୍ୟର୍ଥନା କମିଟି ସଦସ୍ୟ ପ୍ରିୟରଞ୍ଜନ ଦାସ ସ୍ବାଗତ ଭାଷଣ, ବ୍ରଜ କିଶୋର ନନ୍ଦ ଅତିଥି ପରିଚୟ ଓ ଗୁରୁ ଆଶିଷ କୁମାର ଦାସ ବିବରଣୀ ପାଠ କରିଥିଲେ। ଶିଳ୍ପୀ ରବିନାରାୟଣ ରଥ ଧନ୍ୟବାଦ ଦେଇଥିଲେ। ଏହି ଅବସରରେ ଲେଖକ ତଥା ଚିତ୍ରଶିଳ୍ପୀ ପ୍ରଫୁଲ୍ଲ ମହାନ୍ତିଙ୍କୁ ଜୀବନବ୍ୟାପୀ ସାଧନା ପାଇଁ ବାରବାଟୀ ସମ୍ମାନ ପ୍ରଦାନ କରାଯାଇଥିଲା। ୭ ଦିନ ବ୍ୟାପୀ ହେବାକୁ ଥିବା ଚିତ୍ରକଳା ଉତ୍ସବକୁ ପ୍ରଫୁଲ୍ଲ ଉଦ୍ଘାଟନ କରିଥିଲେ। ସାଂସ୍କୃତିକ କାର୍ଯ୍ୟକ୍ରମର ପ୍ରଥମ ବିଭବ ଥିଲା ନୃତ୍ୟବ୍ୟାଲେ ବର୍ଷାର ଅଭିସାର। ଏହାକୁ ପ୍ରସ୍ତୁତ କରିଥିଲେ ଓଡ଼ିଶୀ ନୃତ୍ୟମଣ୍ଡଳର ଶିଳ୍ପୀମାନେ। ଗୁରୁ ଆଶିଷ କୁମାର ଦାସଙ୍କ ସଂଯୋଜନା, ଗୁରୁ ସସ୍ମିତା ପଣ୍ଡାଙ୍କ ନିର୍ଦ୍ଦେଶନା ଏବଂ ଗୁରୁ ନିମକାନ୍ତ ରାଉତରାୟଙ୍କ ସ୍ବର ସଂଯୋଜନାରେ ବର୍ଷାର ସୁନ୍ଦରତାକୁ ଶିଳ୍ପୀମାନେ ନୃତ୍ୟ ମାଧ୍ୟମରେ ପରିବେଷଣ କରିଥିଲେ। ପରେ ସଙ୍ଗୀତ କଥକ ଏକାଡେମୀ ପକ୍ଷରୁ ଦଳଗତ କଥକ ନୃତ୍ୟ ପରିବେଷିତ ହୋଇଥିଲା। ଏହାପରେ ତରାନ୍ନା, ଠୁମୁରୀ, ଅଭିନୟ ଏବଂ ଶେଷରେ ରିଦମ ପରିବେଷଣ କରିଥିଲେ କଥକ ନୃତ୍ୟଶିଳ୍ପୀ ସଙ୍ଗୀତା ସାହୁ। ଗୁରୁ ନାରାୟଣ ପାଣ୍ଡେଙ୍କ ନିର୍ଦ୍ଦେଶନାରେ ପୁରୀ ଡ୍ୟାନ୍ସ ଏକାଡେମୀର ଶିଳ୍ପୀମାନେ ଓଡ଼ିଶୀ ନୃତ୍ୟ ପରିବେଷଣ କରିଥିଲେ। ଏଥିରେ ଓଡ଼ିଆ ଘରର ପର୍ବପର୍ବାଣି ଉପସ୍ଥାପନ କରାଯାଇଥିଲା।