କଳିଙ୍ଗରେ ଜାତୀୟ ପୁରୁଷ ହକି କ୍ୟାମ୍ପ : ଦିଲପ୍ରୀତଙ୍କ ପ୍ରତ୍ୟାବର୍ତ୍ତନ, ଓଡ଼ିଶାରୁ ୫ ସାମିଲ
21 ନୂଆଦିଲ୍ଲୀ,୨୯।୧୨(ପି.ଟି.)- ଆସନ୍ତା ମାସରେ ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ହକି ପ୍ରୋ ଲିଗ୍ ଆୟୋଜନ ହେବାକୁ ଯାଉଥିବା ବେଳେ ହକି ଇଣ୍ଡିଆ ଶନିବାର ଏକ ୩୨ ଜଣିଆ ସମ୍ଭାବ୍ୟ ପୁରୁଷ ଦଳ ଘୋଷଣା କରିଛି। ଦୁଇ ସପ୍ତାହ ଧରି ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ଆୟୋଜନ ହେବାକୁ ଯାଉଥିବା ଜାତୀୟ କୋଚିଂ କ୍ୟାମ୍ପରେ ଏହି ଖେଳାଳିମାନେ ଯୋଗ ଦେବା ସହ ହେଡ କୋଚ୍ ଗ୍ରାହମ ରିଡଙ୍କୁ ରିପୋର୍ଟ କରିବେ। ଜାନୁୟାରୀ ୧୮ ଓ ୧୯ ତାରିଖରେ ନେଦରଲାଣ୍ଡ୍ସ ବିପକ୍ଷରେ ଭାରତ ମ୍ୟାଚ୍ ଖେଳିବା ସହ ହକି ପ୍ରୋ ଲିଗ୍ରେ ପଦାର୍ପଣ କରିବ।
ଯୁବ ଷ୍ଟ୍ରାଇକର ଦିଲପ୍ରୀତ୍ ସିଂ ପ୍ରତ୍ୟାବର୍ତ୍ତନ କରି ଏହି ସମ୍ଭାବ୍ୟ ଦଳରେ ସ୍ଥାନ ପାଇଛନ୍ତି। ୨୦୧୮ ବିଶ୍ୱକପ୍ରେ ସେ ଶେଷଥର ପାଇ ଦଳରେ ସ୍ଥାନ ପାଇଥିଲେ। ସୁଲତାନ ଜୋହର କପ୍ରେ ଦମ୍ଦାର ପ୍ରଦର୍ଶନ କରି ସେ ପ୍ରତ୍ୟାବର୍ତ୍ତନ କରିଛନ୍ତି। ଏହି ସମ୍ଭାବ୍ୟ ଦଳରେ ୫ଜଣ ଓଡ଼ିଆ ଖେଳାଳି ସ୍ଥାନ ପାଇଛନ୍ତି। ସେମାନେ ହେଲେ ଅଭିଜ୍ଞ ଡିଫେଣ୍ଡର ବୀରେନ୍ଦ୍ର ଲାକ୍ରା, ଡ୍ରାଗ ଫ୍ଲିକର ଅମିତ ରୋହିଦାସଙ୍କ ସମେତ ଦୀପାସନ ତିର୍କୀ, ନୀଲମ ସଞ୍ଜୀପ ଖେସ ଓ ଶିଳାନନ୍ଦ ଲାକ୍ରାଙ୍କ ଭଳି ଯୁବ ଖେଳାଳି ମଧ୍ୟ ସ୍ଥାନ ପାଇଛନ୍ତି। ଘୋଷିତ ହୋଇଥିବା ଏହି କୋର ଗ୍ରୁପ୍ରେ ଉଭୟ ଅଭିଜ୍ଞ ଓ ଯୁବ ଖେଳାଳିମାନେ ସ୍ଥାନ ପାଇଛନ୍ତି। ୧୦ ମାସର ଇଞ୍ଜୁରୀ ବ୍ରେକ୍ ପରେ ଅଭିଜ୍ଞ ମିଡ୍ଫିଲ୍ଡର ଚିଙ୍ଗ୍ଲେନସାନା ସିଂ ମଧ୍ୟ ଏହି କୋର ଗ୍ରୁପ୍କୁ ପ୍ରତ୍ୟାବର୍ତ୍ତନ କରିଛନ୍ତି। ଶେଷଥର ପାଇଁ ସେ ୨୦୧୮ ପୁରୁଷ ବିଶ୍ୱକପ୍ ଦଳରେ ସ୍ଥାନ ପାଇଥିଲେ। ସେହିପରି ଏଫ୍ଆଇଏଚ୍ ଅଲିମ୍ପିକ କ୍ୱାଲିଫାୟର୍ସରେ ପ୍ଲେୟାର ଅଫ୍ ଦି ଟୁର୍ନାମେଣ୍ଟ ବିବେଚିତ ହୋଇଥିବା ଏସ୍ଭି ସୁନୀଲଙ୍କ ସମେତ ଆକାଶଦୀପ ସିଂ, ରମନଦୀପ ସିଂ, ସିମରନଜିତ ସିଂ, ମନଦୀପ ସିଂ, ଲଲିତ କୁମାର ଉପାଧ୍ୟାୟ, ଗୁରସାହିବଜିତ ସିଂ, ଶମଶେର ସିଂ ଓ ଅନ୍ୟମାନେ ମଧ୍ୟ ଏହି ଦଳରେ ସାମିଲ ହୋଇଛନ୍ତି। ଦୀର୍ଘଦିନର ବିଶ୍ରାମ ପରେ ଖେଳାଳିମାନେ ପୁଣି ନୂଆ କ୍ୟାମ୍ପରେ ଯୋଗ ଦେବେ ଓ ଦଳର ଯୋଜନା ଓ ରଣନୀତି କାର୍ଯ୍ୟକାରୀ କରିବାକୁ ଭଭୟ ମାନସିକ ଓ ଶାରୀରିକ ଫିଟ୍ନେସର ପ୍ରମାଣ ଦେବେ ବୋଲି କୋଚ୍ ରିଡ୍ କହିଛନ୍ତି। ଆସନ୍ତା ଦୁଇ ସପ୍ତାହରେ ଆମେ ନେଦରଲାଣ୍ଡ୍ସ ବିପକ୍ଷ ମ୍ୟାଚ୍ ପାଇଁ ପ୍ରସ୍ତୁତି ଉପରେ ଫୋକସ କରିବୁ ବୋଲି ସେ କହିଛନ୍ତି।
ଖେଳାଳି ତାଲିକା:
ପି.ଆର. ଶ୍ରୀଜେସ୍, କ୍ରିଷନ ବାହଦୂର ପାଠକ, ହରମନପ୍ରୀତ ସିଂ, ଦିଲପ୍ରୀତ ସିଂ, ସୁରେନ୍ଦ୍ର କୁମାର, ବୀରେନ୍ଦ୍ର ଲାକ୍ରା, ରୁପିନ୍ଦର ପାଲ ସିଂ, ଗୁରିନ୍ଦର ସିଂ, ଅମିତ ରୋହିଦାସ, କୋଥାଜିତ୍ ସିଂ ଖଡଙ୍ଗବାମ, ମନପ୍ରୀତ ସିଂ, ହାର୍ଦ୍ଦିକ ସିଂ, ନୀଲକାନ୍ତ ଶର୍ମା, ବିବେକ ସାଗର ପ୍ରସାଦ, ସିମରନଜିତ୍ ସିଂ, ଆକାଶଦୀପ ସିଂ, ରମନଦୀପ ସିଂ, ଏସ୍ଭି ସୁନୀଲ, ମନଦୀପ ସିଂ, ଲଲିତ କୁମାର ଉପାଧ୍ୟାୟ, ଗୁରସାହିବଜିତ ସିଂ, ଶମଶେର ସିଂ, ସୁରଜ କାରକେରା, ଜରମନପ୍ରୀତ ସିଂ, ଦୀପସାନ ତିର୍କୀ, ନୀଲମ ସଞ୍ଜୀପ୍ ଖେସ, ଜସରକରନ ସିଂ, ରାଜକୁମାର ପାଲ, ଗୁର୍ଜନ୍ତ ସିଂ, ସୁମିତ, ଶିଳାନନ୍ଦ ଲାକ୍ରା ଓ ଚିଙ୍ଗଲେନସାନା ସିଂ ।