ଭୁବନେଶ୍ୱର, ୧୯।୧୧(କ୍ରୀଡ଼ା ପ୍ରତିନିଧି)- ଏଫ୍ଆଇଏଚ୍ ପ୍ରୋ ଲିଗ୍ ଏବଂ ୨୦୨୦ ଟୋକିଓ ଅଲିମ୍ପିକ୍ସ ପରି ଗୁରୁତ୍ୱପୂର୍ଣ୍ଣ ପ୍ରତିଯୋଗିତାକୁ ଦୃଷ୍ଟିରେ ରଖି ଭାରତୀୟ ସିନିୟର ପୁରୁଷ ହକି ଦଳର ପ୍ରଶିକ୍ଷଣ ଶିବିର ସୋମବାର କଳିଙ୍ଗ ଷ୍ଟାଡିୟମରେ ଆରମ୍ଭ ହୋଇଛି। ଏହି ଶିବିରରେ ଭାରତର ସମ୍ଭାବ୍ୟ ୩୩ କୋର୍ ଖେଳାଳି ଯୋଗଦେଇଛନ୍ତି। ସେମାନଙ୍କ ମଧ୍ୟରେ ଓଡ଼ିଶାର ୬ ଖେଳାଳି ବୀରେନ୍ଦ୍ର ଲାକ୍ରା, ଅମିତ ରୋହିଦାସ, ନୀଲମ ସଞ୍ଜୀପ ଖେସ୍, ଦୀପ୍ସାନ ତିର୍କୀ, ଆଶିଷ କୁମାର ଟପ୍ନୋ ଓ ଶୀଳାନନ୍ଦ ଲାକ୍ରା ସାମିଲ ଅଛନ୍ତି। କୋର୍ ଗ୍ରୁପ୍ରେ ଥିବା ଖେଳାଳିମାନେ ମୁଖ୍ୟ କୋଚ୍ ଗ୍ରାହମ୍ ରିଡ୍ଙ୍କ ନିକଟରେ ରିପୋର୍ଟ କରିଥିବା ହକି ଇଣ୍ଡିଆ ପକ୍ଷରୁ ପ୍ରକାଶ କରାଯାଇଛି। କଳିଙ୍ଗରେ ୩ ସପ୍ତାହବିଶିଷ୍ଟ ଶିବିର ଡିସେମ୍ବର ୮ ପର୍ଯ୍ୟନ୍ତ ଚାଲିବ।
ଭାରତୀୟ ଦଳ ନିକଟରେ କଳିଙ୍ଗ ଷ୍ଟାଡିୟମରେ ଏଫଆଇଏଚ୍ ଅଲିମ୍ପିକ୍ କ୍ୱାଲିଫାୟର୍ସ ଖେଳିଥିଲା। ରୁଷିଆକୁ ୨ ମ୍ୟାଚବିଶିଷ୍ଟ ମୁକାବିଲାରେ ୧୧-୩ ଗୋଲ ବ୍ୟବଧାନରେ ହରାଇ ଟୋକିଓ ଅଲିମ୍ପିକ୍ସ ପାଇଁ ଟିକେଟ ପାଇଥିଲା। ୨୦୨୦ ଜାନୁୟାରୀରେ ଏଫ୍ଆଇଏଚ୍ ପ୍ରୋ ଲିଗ୍ ଆରମ୍ଭ ହେଉଥିବାରୁ ଏବେ ଭାରତୀୟ ଦଳର ଫୋକସ୍ ଏହି ପ୍ରତିଯୋଗିତା ଉପରେ ରହିଛି। ୩ ସପ୍ତାହବିଶିଷ୍ଟ କ୍ୟାମ୍ପ୍ରେ ମୁଖ୍ୟତଃ ପ୍ରଦର୍ଶନର ସ୍ତର ଏବଂ ରିଦମ୍ ବଜାୟ ରଖିବା ଉପରେ ଗୁରୁତ୍ୱ ଦିଆଯିବ। ପରେ ଆଉ ଏକ ଟ୍ରେନିଂ କ୍ୟାମ୍ପ୍ ଡିସେମ୍ବର ୨୯ରୁ ଆରମ୍ଭ ହେବାର କାର୍ଯ୍ୟକ୍ରମ ରହିଛି। ଏଫ୍ଆଇଏଚ୍ ଅଲିମ୍ପିକ୍ କ୍ୱାଲିଫାୟର୍ସରେ ଓଡ଼ିଶାର ବୀରେନ୍ଦ୍ର ଓ ଅମିତ ଖେଳିଥିଲେ। ଏହି ୨ ଜଣଙ୍କୁ ବାଦ୍ ଦେଲେ ନୀଲମ ସଞ୍ଜୀପ ଖେସ୍, ଦୀପ୍ସାନ ତିର୍କୀ, ଆଶିଷ କୁମାର ଟପ୍ନୋ ଓ ଶୀଳାନନ୍ଦ ଲାକ୍ରାଙ୍କୁ ଡାକରା ମିଳିଛି। କଳିଙ୍ଗରେ ଟ୍ରେନିଂ କ୍ୟାମ୍ପ୍ ପରେ ତତ୍କ୍ଷଣାତ କୌଣସି ଟୁର୍ନାମେଣ୍ଟ ନାହିଁ। ତେଣୁ ବ୍ୟକ୍ତିଗତ ଭାବେ ଖେଳାଳିଙ୍କ ପ୍ରଦର୍ଶନରେ ଉନ୍ନତି ଆଣିବା ଉପରେ ଫୋକସ କରିବା ପାଇଁ ଏହା ହିଁ ପ୍ରକୃଷ୍ଟ ସମୟ ବୋଲି ରିଡ୍ କହିଛନ୍ତି। ଏଫ୍ଆଇଏଚ୍ ଅଲିମ୍ପିକ୍ କ୍ୱାଲିଫାୟର୍ସ ସମେତ ଗତ ସିଜନର ପ୍ରଦର୍ଶନକୁ ଆମେ ବିଶ୍ଳେଷଣ କରିବୁ। ଏଥିରୁ ପ୍ରତି ଖେଳାଳିଙ୍କ ପ୍ରଦର୍ଶନରେ ଉନ୍ନତି ଆଣିବା ପାଇଁ ଉପାୟ ବାହାରିବ ବୋଲି ରିଡ୍ ପ୍ରକାଶ କରିଛନ୍ତି।