???????
ଭୁବନେଶ୍ୱର, ୨୫।୭(କ୍ରୀଡ଼ା ପ୍ରତିନିଧି)- ଭାରତୀୟ ମାଉଣ୍ଟେନରିଂ ଫେଡେରେଶନ(ଆଇଏମଏଫ) ଏବଂ ରାଜ୍ୟ ସରକାରଙ୍କ କ୍ରୀଡ଼ା ଓ ଯୁବସେବା ବିଭାଗ ମିଳିତ ଆନୁକୂଲ୍ୟରେ କଳିଙ୍ଗ ଷ୍ଟାଡିୟମରେ ସ୍ପୋଟର୍ସ କ୍ଲାଇମ୍ବିଂର ଏକ ହାଇପରଫରମାନ୍ସ ସେଣ୍ଟର ନିର୍ମାଣ କରାଯାଇଛି। ଭାରତୀୟ ସ୍ପୋଟର୍ସ କ୍ଲାଇମ୍ବିଂକୁ ଅନ୍ତର୍ଜାତୀୟ ମାନର କରିବା ଏହାର ଲକ୍ଷ୍ୟ। ଏହାକୁ ଦୃଷ୍ଟିରେ ରଖି ଆଇଏମଏଫ ପକ୍ଷରୁ ଚଳିତମାସ ୧୬ ତାରିଖରୁ ୧୦ରୁ ୧୬ ବର୍ଷ ବୟସବର୍ଗର ବାଳିକା ବାଳକଙ୍କୁ ନେଇ ଟ୍ରେନିଂ ଆରମ୍ଭ କରାଯିବାକୁ ଯୋଜନା ହୋଇଛି। ଜାତୀୟ ଓ ଅନ୍ତର୍ଜାତୀୟ ସ୍ତରର ପେସାଦାର ଟ୍ରେନରଙ୍କୁ ଅଣାଯାଇ ଏଠାରେ ଟ୍ରେନିଂ ଦିଆଯିବ। ସ୍ପୋଟର୍ସ କ୍ଲାଇମ୍ବିଂ ଏବେ ଏକ ଅଲିମ୍ପିକ କ୍ରୀଡ଼ା। ଏହା ୨୦୨୦ ଟୋକିଓ ଅଲିମ୍ପିକ୍ସରେ ପ୍ରଥମ ପଦାର୍ପଣ କରିବାକୁ ଯାଉଛି ଏବଂ ୨୦୨୪ ପ୍ୟାରିସ ଅଲିମ୍ପିକ୍ସରେ ମଧ୍ୟ ସ୍ଥାନ ପାଇଛି। ଏହାକୁ ନଜରରେ ରଖି ଆଇଏମଏଫ ଏକ ରୋଡ୍ମ୍ୟାପ ପ୍ରସ୍ତୁତ କରିବା ଯୋଜନାରେ ଅଛି। ଏହି କ୍ରୀଡ଼ାପ୍ରତି ସଚେତନତା ସୃଷ୍ଟି କରିବା ସହିତ ଛୋଟ ବେଳରୁ ଆଥଲେଟ୍ଙ୍କୁ ଚିହ୍ନଟ କରିବା ଏହାର ଲକ୍ଷ୍ୟ। କଳିଙ୍ଗ ଷ୍ଟାଡିୟମ ପରିସରରେ ଥିବା ହକି କମ୍ପ୍ଲେକ୍ସ ନର୍ଥ ଷ୍ଟାଣ୍ଡ ନିକଟସ୍ଥ କ୍ଲାଇମ୍ବିଂ ଓ୍ବାଲ୍ ନିକଟରେ ନାମ ପଞ୍ଜୀକରଣ ଚଳିତ ମାସ ୧୮ ତାରିଖରୁ ଆରମ୍ଭ ହେବ। ମାଗଣାରେ ଆଥଲେଟ୍ମାନେ ନିଜ ନାମ ପଞ୍ଜୀକରଣ କରିପାରିବେ। ଆଗାମୀ ଦିନରେ ଅନ୍ତର୍ଜାତୀୟ ସ୍ତରର ପ୍ରତିଯୋଗିତା ପାଇଁ ଏକ ଭାରତୀୟ ଦଳ ଗଠନ କରିବା ଆଇଏମଏଫର ଲକ୍ଷ୍ୟ। ତେଣୁ ଅଧିକରୁ ଅଧିକ ବାଳିକା ବାଳକ ଏହି ସୁଯୋଗର ସଦ୍ବ୍ୟବହାର କରିବାକୁ ପରାମର୍ଶ ଦିଆ ଯାଇଛି।