ଭୁବନେଶ୍ୱର, ୩୦ା୧୨(ସୁନିତ୍ ମିଶ୍ର):କଳିଙ୍ଗ ଷ୍ଟାଡିୟମର ରନିଂ ଟ୍ରାକ୍ରେ ସରକାରୀ ଗାଡ଼ି ବୁଲିବା ଘଟଣାକୁ ନେଇ ରାଜନୀତି ଜୋର୍ ଧରିଛି। ଏ ସମ୍ପର୍କରେ ପୂର୍ବତନ କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା ନିଜ ‘ଏକ୍ସ’ ହ୍ୟାଣ୍ଡେଲରେ ଉଦ୍ବେଗ ପ୍ରକାଶ କରିବା ପରେ ଏହାକୁ ନେଇ ବର୍ତ୍ତମାନର କ୍ରୀଡ଼ାମନ୍ତ୍ରୀ ସୂର୍ଯ୍ୟବଂଶୀ ସୁରଜ ପ୍ରତିକ୍ରିୟା ରଖିଛନ୍ତି। କିଛି ଜରୁରୀ ପରିସ୍ଥିତି ପାଇଁ ଏଭଳି ଘଟିଥିବା ମନ୍ତ୍ରୀ କହିଛନ୍ତି।
ଷ୍ଟାଡିୟମର ରନିଂ ଟ୍ରାକ୍ରେ ସରକାରୀ ଗାଡ଼ି ବୁଲେଇବାର ଭିଡିଓ ସାମ୍ନାକୁ ଆସିବା ପରେ ଏନେଇ ଭାଜପା ସରକାରଙ୍କୁ ବିରୋଧୀଙ୍କ ପକ୍ଷରୁ ଟାର୍ଗେଟ କରାଯାଇଛି। ପୂର୍ବତନ କ୍ରୀଡ଼ାମନ୍ତ୍ରୀ ବେହେରା ଏ ସମ୍ପର୍କରେ ଉଦ୍ବେଗ ପ୍ରକାଶ କରି ଶନିବାର ନିଜ ଏକ୍ସ ହ୍ୟାଣ୍ଡେଲରେ ଲେଖିଥିଲେ, ନବୀନଙ୍କ ଶାସନକାଳରେ ଏହା ଅନ୍ତର୍ଜାତୀୟ ଆଥ୍ଲେଟଙ୍କ ଦୌଡ଼ିବା ଟ୍ରାକ୍ ଥିଲା। ହେଲେ ଏବେ ଏହା ଶାସକ ଦଳ ନେତାଙ୍କ ଗାଡ଼ି ବୁଲିବା ଟ୍ରାକ୍ରେ ପରିଣତ ହୋଇଛି। ଏହା ସମସ୍ତ କ୍ରୀଡ଼ାବିତ୍ଙ୍କ ପାଇଁ ଅତ୍ୟନ୍ତ ନିରାଶାଜନକ ଏବଂ ଓଡ଼ିଶା ଲାଗି ନିନ୍ଦନୀୟ କଥା ବୋଲି ବେହେରା କହିଛନ୍ତି।
କ୍ରୀଡ଼ାମନ୍ତ୍ରୀଙ୍କ ସମାଲୋଚନା ପରେ ଏହି ପ୍ରସଙ୍ଗରେ ପ୍ରତିକ୍ରିୟା ରଖି କ୍ରୀଡ଼ାମନ୍ତ୍ରୀ ସୂର୍ଯ୍ୟବଂଶୀ କହିଛନ୍ତି, ପୂର୍ବତନ କ୍ରୀଡ଼ାମନ୍ତ୍ରୀ ତାଙ୍କର ଦାୟିତ୍ୱ ଅପସାରଣ ପରେ ଟିକେ ଅଧିକ ସକ୍ରିୟ ହୋଇଥିବା ଭଳି ଲାଗୁଛନ୍ତି। ସେଥିପାଇଁ ତାଙ୍କୁ ଧନ୍ୟବାଦ। କିଛି ଜରୁରୀ ଓ ଅସ୍ବାଭାବିକ ସ୍ଥିତି ଥିଲା, ସେଥିପାଇଁ ଟ୍ରାକ୍ରେ ଗାଡ଼ି ଛିଡ଼ା ହୋଇଥିଲା। ଖେଳାଳି ଓ କର୍ମଚାରୀଙ୍କ ଗୋପନୀୟତା ଦୃଷ୍ଟିରୁ ଏହା କୁହାଯିବ ନାହିଁ। ପୂର୍ବରୁ ଅନେକ ଶୀର୍ଷନେତୃତ୍ୱ କଳିଙ୍ଗ ଷ୍ଟାଡିୟମ୍ ଆସିଛନ୍ତି, ଗାଡ଼ି ବାହାରେ ରଖି ଭିତରକୁ ଆସନ୍ତି। ତେଣୁ କିଛି ଜରୁରୀ ପରିସ୍ଥିତି ନିମନ୍ତେ ଏପରି ଘଟିଛି ବୋଲି ମନ୍ତ୍ରୀ କହିଛନ୍ତି।
