ଶ୍ରୀନଗର,୩ା୮(ପି.ଟି./ ଆଇଏଏନ୍ଏସ୍): ପାକିସ୍ତାନ ଅଧିକୃତ କଶ୍ମୀର (ପିଓକେ)ରୁ ଜୈଶ୍-ଇ-ମହମ୍ମଦ (ଜେଇଏମ୍) ସମେତ ଆଉ କେତେକ ସଙ୍ଗଠନର ଆତଙ୍କବାଦୀମାନେ ଉପତ୍ୟକାରେ ଅନୁପ୍ରବେଶ କରିଛନ୍ତି। ଜୁଲାଇ ଶେଷ ସପ୍ତାହରେ ୫ ସଶସ୍ତ୍ର ଆତଙ୍କବାଦୀ ନିୟନ୍ତ୍ରଣରେଖା (ଏଲ୍ଓସି) ଅତିକ୍ରମ କରି ଜମ୍ମୁ-କଶ୍ମୀରରେ ବୁଲୁଛନ୍ତି। ପାକିସ୍ତାନରେ ଉଚ୍ଚ ତାଲିମ୍ପ୍ରାପ୍ତ ଏହି ଆତଙ୍କବାଦୀମାନେ ଅମରନାଥ ଯାତ୍ରୀ ଓ ସୁରକ୍ଷା ଦାୟିତ୍ୱରେ ଥିବା ଯବାନମାନଙ୍କୁ ଆକ୍ରମଣ କରିପାରନ୍ତି ବୋଲି ଗୋଇନ୍ଦା ସୂଚନା ମିଳିବା ପରେ ଉପତ୍ୟକାରେ ହାଇଆଲର୍ଟ ଜାରି କରାଯାଇଛି। ସେହିପରି ଅମରନାଥ ରାସ୍ତାରେ ପାକିସ୍ତାନ ନିର୍ମିତ ମାଇନ୍ ଓ ଅସ୍ତ୍ରଶସ୍ତ୍ର ମିଳିବା ପରେ ଶୁକ୍ରବାର ତୁରନ୍ତ ଫେରିଆସିବା ପାଇଁ ଯାତ୍ରୀମାନଙ୍କୁ ନିର୍ଦ୍ଦେଶ ଦିଆଯାଇଛି।
୧୪ ପୁଲଓ୍ବାମା ଆକ୍ରମଣରେ ୫୦ ସିଆର୍ପିଏଫ୍ ଯବାନଙ୍କ ଜୀବନ ନେଇଥିବା ଜେଇଏମ୍ ଜମ୍ମୁ-କଶ୍ମୀରରେ ପୁଣି ଏକ ବଡ଼ଧରଣର ଆତଙ୍କବାଦୀ ଆକ୍ରମଣ ଘଟାଇବା ପାଇଁ ପ୍ରସ୍ତୁତ ହେଉଛି। ଏହିକ୍ରମରେ ଶୁକ୍ରବାର ସକାଳେ ପୁଲଓ୍ବାମାର ଜାହିଦ୍ବାଗ୍ରେ ୫୫ ରାଷ୍ଟ୍ରୀୟ ରାଇଫଲ୍ସର ଏକ ଗାଡ଼ିକୁ ଆତଙ୍କବାଦୀ ଟାର୍ଗେଟ କରିଥିଲେ। ସେମାନେ ବିକଶିତ ବିସ୍ଫୋରକ ଉପକରଣ (ଆଇଇଡି) ବିସ୍ଫୋରଣ କରିଥିଲେ। ହେଲେ ଏଥିରେ କେହି ମୃତାହତ ହୋଇନାହାନ୍ତି। ସେପଟେ ଅମରନାଥର ପବିତ୍ର ଗୁମ୍ଫାକୁ ଯାଇଥିବା ବାଟାଲ ଓ ପହଲଗାମ୍ ରାସ୍ତାରେ ତଲାସି ବେଳେ ପାକିସ୍ତାନ ନିର୍ମିତ ମାଇନ୍ ଓ ବିପୁଳ ଅସ୍ତ୍ରଶସ୍ତ୍ର ଠାବ ହୋଇଛି। ପାକିସ୍ତାନୀ ସେନା ସହାୟତାରେ ଆତଙ୍କବାଦୀମାନେ ଯାତ୍ରୀଙ୍କୁ ଆକ୍ରମଣ ପାଇଁ ପ୍ରସ୍ତୁତ ହୋଇ ରହିଥିବା ନେଇ ବିଗତ ୩ରୁ ୪ ଦିନ ମଧ୍ୟରେ ନିର୍ଦ୍ଦିଷ୍ଟ ଭାବେ ସୂଚନା ମିଳିଛି। କେତେକ ଆଇଇଡିକୁ ନିଷ୍କ୍ରିୟ କରାଯାଇଛି। ସେହିପରି ଗୋଟିଏ ଆମେରିକୀୟ ଏମ୍-୨୪ ସ୍ନାଇପର ରାଇଫଲ ଓ ପାକିସ୍ତାନ ଗୋଳାବରୁଦ କାରଖାନାରେ ନିର୍ମିତ ମାଇନ୍ ମଧ୍ୟ ମିଳିଥିବା ସେନାର ୧୫ କର୍ପ ଲ୍ୟୁଟ୍ନାଣ୍ଟ ଜେନେରାଲ କେ.ଜେ.ଏସ୍. ଢିଲୋଁ ଏକ ଖବରଦାତା ସମ୍ମିଳନୀରେ କହିଛନ୍ତି। ଯାତ୍ରୀ ଓ ପର୍ଯ୍ୟଟକମାନଙ୍କ ଉପରେ କୌଣସି ପ୍ରକାର ଆକ୍ରମଣକୁ ଏଡ଼ାଇବା ଲାଗି ସେମାନଙ୍କୁ ତୁରନ୍ତ ଫେରିଆସିବା ପାଇଁ ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯାଇଛି। ଯାତ୍ରୀମାନେ ଯଥାଶୀଘ୍ର ସମ୍ଭବ ଫେରିଆସନ୍ତୁ ବୋଲି ପ୍ରଧାନ ସଚିବ (ଗୃହ) ଏକ ସୁରକ୍ଷା ନିର୍ଦ୍ଦେଶନାମା ଜାରି କରିଛନ୍ତି।