ରାଞ୍ଚି,୧୨।୮: ଜେଲ୍ରେ ବନ୍ଦୀ ଥିବା ବିହାରର ପୂର୍ବତନ ମୁଖ୍ୟମନ୍ତ୍ରୀ ତଥା ଆରଜେଡ଼ି ମୁଖ୍ୟ ଲାଲୁ ପ୍ରସାଦ ଯାଦବ ବର୍ତ୍ତମାନ ନିଜ ପସନ୍ଦର କଶ୍ମୀର ସେଓକୁ ଝୁରୁଥିବା ଜଣାପଡ଼ିଛି। କାରଣ କଶ୍ମୀର ସେଓ ବହୁ ମିଠା ସହ ଭରପୂର ସ୍ବାଦ ରହିଥିବାରୁ ଲାଲୁଙ୍କୁ ଅନ୍ୟ ସେଓ ପସନ୍ଦ ଆସି ନ ଥାଏ। ତେବେ ଜମ୍ମୁ-କଶ୍ମୀରରେ ଅନୁଚ୍ଛେଦ ୩୭୦ ହଟାଇ ଦିଆଯିବା ପୂର୍ବରୁ ଘାଟିରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ନ ହେବା ପାଇଁ ୧୪୪ ଧାରା ଲାଗୁ କରାଯାଇଛି। ଫଳରେ ସ୍ଥାନୀୟ ଲୋକେ ଘରୁ ବାହାରିପାରୁ ନ ଥିବା ବେଳେ ଦୋକାନ ବଜାର ମଧ୍ୟ ବନ୍ଦ ରହିଛି। ଅନ୍ୟ ରାଜ୍ୟକୁ କଶ୍ମୀର ସେଓ ରତ୍ପାନୀ ହେବା କମ୍ ହୋଇଯିବାରୁ ରାଞ୍ଚିରେ ପର୍ଯ୍ୟାପ୍ତ ପରିମାଣର ସେଓ ମିଳିପାରୁନାହିଁ। ଏଥିଯୋଗୁ ଲାଲୁ ନିଜ ପସନ୍ଦର ସେଓକୁ ଝୁରୁଥିବା ନେଇ ତାଙ୍କ ନିକଟତର ବନ୍ଧୁଙ୍କଠାରୁ ଜଣାପଡ଼ିଛି। ସୂଚନାଯୋଗ୍ୟ, ଲାଲୁ ଯାଦବ ବର୍ତ୍ତମାନ ରାଞ୍ଚିର ରିମ୍ସ ହସ୍ପିଟାଲରେ ନିଜର ଚିକିତ୍ସା କରାଉଛନ୍ତି। ଚିକିତ୍ସା କରୁଥିବା ଡାକ୍ତର ତାଙ୍କୁ ପ୍ରତିଦିନ ବ୍ରେକ୍ଫାଷ୍ଟରେ ୨ଟି ସେଓ, ଗୋଟିଏ ଆମ୍ବ, ୪ଟି ଅଣ୍ଡା, ବାଦାମ ଓ ଅଖରୋଟ ଖାଇବାକୁ ପରାମର୍ଶ ଦେଇଛନ୍ତି।