ବଅଁରପାଳ, ୧ା୪(ଉପେନ୍ଦ୍ର ରାଉତ) – ଦୈନିକ କିଛି ରୋଜଗାର କଲେ ଚୁଲି ଜଳୁଥିଲା। ଛୁଆପିଲାଙ୍କ ପେଟକୁ ଦାନା ଯାଉଥିଲା। ହେଲେ ଏବେ କରୋନା କଟକଣା ଜୀବନକୁ କଷ୍ଟକର କରିଦେଇଛି। ଦୁଇ ଓଳି ଦୁଇ ମୁଠା ଖାଇବା ଯୋଗାଡ଼ ପାଇଁ ସଂଘର୍ଷ କରିବାକୁ ପଡ଼ୁଛି। ହାଟ, ବଜାର ବନ୍ଦ ଥିବାରୁ ହାତ ବାନ୍ଧି ବସିବାକୁ ପଡୁଛି। ଏମିତି ଭୋକ ଦୁଃଖରେ ଆମ ଦିନ କଟୁଥିବା କହିଛନ୍ତି ବଅଁରପାଳ ବ୍ଲକ ବଳରାମପ୍ରସାଦ ପଞ୍ଚାୟତ ସିତୁରାସାହି ବାସିନ୍ଦା।
ସାହିର ପ୍ରାୟ ୫୦ ପରିବାର ପନିକି, ଚଟୁ, କଡେଇ, ବାକ୍ସ ଆଦି ବିଭିନ୍ନ ସାମଗ୍ରୀ ତିଆରି କରି ବଜାରରେ ବିକ୍ରି କରିଥାନ୍ତି। ସେଥିରୁ ଯାହା ରୋଜଗାର ହୁଏ ସେଥିରେ ପରିବାର ଚଳାନ୍ତି। କିନ୍ତୁ ଲକ୍ଡାଉନ୍ ଯୋଗୁ ସପ୍ତାହେ ହେଲା ସେମାନେ ଅସହାୟ ହୋଇପଡ଼ିଛନ୍ତି। ବଜାର ବନ୍ଦ ରହିଥିବାରୁ ସେମାନଙ୍କ ହାତ ତିଆରି ସାମଗ୍ରୀ ବିକ୍ରି ହୋଇପାରୁ ନାହିଁ। ରୋଜଗାରର ବାଟ ବନ୍ଦ ହୋଇଯାଇଥିବାରୁ କେମିତି ଖାଇବା ଯୋଗାଡ଼ କରିବେ ତାହାକୁ ନେଇ ଚିନ୍ତାର ପଡ଼ିଛନ୍ତି। ଏପରି କି ରାଶନ କିଣିବାକୁ କାହା ପାଖରେ ଟଙ୍କା ନାହିଁ। କିଏ ଗଣ୍ଡେ ଖାଇବାକୁ ଦେଲେ ପିଲାଙ୍କ ପେଟ ପୂରୁଛି ନ ହେଲେ ନାହିଁ। ଏମିତି ଅବସ୍ଥାରେ ସରକାର କିଛି ସାହାଯ୍ୟ କରିବାକୁ ସାହିର ମାଧବ ପ୍ରଧାନ, କୁମର ଦେହୁରୀ, ପ୍ରମିଳା ପୂର୍ତ୍ତି ପ୍ରମୁଖ ନିବେଦନ କରିଛନ୍ତି। ଏ ସମ୍ପର୍କରେ ବିଡିଓ ଏଲିଜା ମିଶ୍ର କହିଛନ୍ତି, ସେମାନଙ୍କ ପରିସ୍ଥିତି ନେଇ ଖବର ନ ଥିଲା। ପଞ୍ଚାୟତ ନିର୍ବାହୀ ଅଧିକାରୀଙ୍କୁ ଯୋଗାଯୋଗ କରି ସବୁ ସୁବିଧା ଯୋଗାଇ ଦିଆଯିବ।