ନୂଆଦିଲ୍ଲୀ,୩୦।୭: ଆମ ଆଦମୀ ପାର୍ଟି(ଆପ୍)ର ମୁଖ୍ୟ ତଥା ଦିଲ୍ଲୀର ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ସୋମବାର ଦିଲ୍ଲୀରେ ଶିବଭକ୍ତଙ୍କ ପାଇଁ ଆୟୋଜିତ ହୋଇଥିବା ଶିବିରର ତଦାରଖ କରିଥିଲେ। ସେହି ସମୟରେ ମୁଖ୍ୟମନ୍ତ୍ରୀଙ୍କ ସହ ସିଲମପୁରର ବିଧାୟକ ହାଜି ଇଶରାକ ଖାନ ମଧ୍ୟ ଶିବିରରେ ପହଞ୍ଚିଥିଲେ। ସେଠାରେ ବିଧାୟକ ଶିବଭକ୍ତ କାଉଡିଆଙ୍କ ସେବା କରିଥିବା ଦେଖିବାକୁ ମିଳିଛି। ଏଥିସହ ହାଜି ଇଶରାକ ବମ୍ ବମ୍ ଭୋଲେ ଭୋଲେ ଓ ଜୟ ଶ୍ରୀରାମ କହିବା ସହ କାଉଡିଆମାନେ ତାଙ୍କ ସହିତ ସେଲ୍ଫି ନେଇଥିଲେ। ଏହାପରେ କେଜ୍ରିଓ୍ବାଲ ଓ ଇଶରାକ କାଉଡିଆଙ୍କ ସହିତ ମିଶି ଭୋଜନ କରିଥିଲେ। ଏନେଇ ଇଶରାକ କହିଛନ୍ତି, ଶିବ ଭକ୍ତଙ୍କ ସେବା କରିବା ଏକ ମୁସଲମାନର ସଚ୍ଚୋଟ ଶ୍ରଦ୍ଧା। ଭାରତର ପରିଚୟ ହେଉଛି ଏକତା, ଏଠାରେ ବିଭିନ୍ନ ଧର୍ମ ଓ ଜାତିର ଲୋକ ବାସ କରନ୍ତି। ଯେଉଁ ଧର୍ମର ହୁଅ ନା କାହିଁକି ସବୁ ଧର୍ମକୁ ସମ୍ମାନ ଦେବା ଉଚିତ୍ ବୋଲି ହାଜି ଇଶରାକ ଖାନ କହିଛନ୍ତି।