କାକଟପୁର,୭ା୩(ଡି.ଏନ.ଏ.): କାକଟପୁର ବ୍ଲକ ବିଡିଓ ଓ କର୍ମଚାରୀମାନଙ୍କ ପାଇଁ ଉଦ୍ଦିଷ୍ଟ ଥିବା କ୍ୱାର୍ଟର୍ସଗୁଡିକ ଭୂତକୋଠି ପାଲଟିଯାଇଛି। ଦୀର୍ଘବର୍ଷ ଧରି ଏହି କ୍ୱାର୍ଟର୍ସଗୁଡିକ ଅବହେଳିତ ଅବସ୍ଥାରେ ପଡ଼ିରହିଛି। ମରାମତି ଓ ରକ୍ଷଣାବେକ୍ଷଣ ଅଭାବରୁ କ୍ୱାର୍ଟର୍ସଗୁଡିକ ନଷ୍ଟ ହେବାକୁ ବସିଥିବା ବେଳେ ଏଥିପ୍ରତି ପ୍ରଶାସନିକ ଅଧିକାରୀମାନେ ଦୃଷ୍ଟି ଦେଉ ନ ଥିବା ଅଭିଯୋଗ ହୋଇଛି। କ୍ୱାର୍ଟରର ଆଜବେଷ୍ଟସ ଭାଙ୍ଗି ପଡିଥିବା ବେଳେ ଚତୁଃପାର୍ଶ୍ୱ ଗଛଲତାରେ ପରିପୂର୍ଣ୍ଣ ହୋଇରହିଛି। ବ୍ଲକ ଅଧିକାରୀମାନେ କ୍ୱାର୍ଟର୍ସରେ ନ ରହିବାରୁ ଅଧିକ ନଷ୍ଟ ହେବାରେ ଲାଗିଛି। ଉକ୍ତ କ୍ୱାର୍ଟରଗୁଡିକରେ ବିଷଧର ସାପଙ୍କ ବୃଦ୍ଧି ପାଇବାରେ ଲାଗିଛି। କ୍ୱାର୍ଟରଗୁଡିକର ମରାମତି କିମ୍ବା ସାନି ନିର୍ମାଣ ଲାଗି ପ୍ରଶାସନିକ ସ୍ତରରେ ଉଦ୍ୟମ କରା ନ ଯିବା ଯୋଗୁ କ୍ୱାର୍ଟରର ବିଭିନ୍ନ ସ୍ଥାନ ଭାଙ୍ଗିପଡିଥିବା ସହ ଭୂତକୋଠିରେ ପରିଣତ ହୋଇଥିବା ଅଭିଯୋଗ ହେଉଛି। ଏ ସମ୍ପର୍କରେ ବିଡିଓ ସୁଧୀର କୁମାର ନାୟକ କୁହନ୍ତି, କ୍ୱାର୍ଟର ମରାମତି ଲାଗି ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରାଯାଇଛି, ଜିଲା ପ୍ରକଳ୍ପ ନିର୍ଦ୍ଦେଶକଙ୍କ ନିର୍ଦ୍ଦେଶ ଆସିଲେ କ୍ୱାର୍ଟର୍ସ ମରାମତି କରାଯିବ।