ନାଉଗାଁ,୧୮।୭(ସ୍ବ.ପ୍ର.): ଜଗତସିଂହପୁର ଜିଲା ନାଉଗାଁ ବ୍ଲକରେ ଚଳିତବର୍ଷ ସ୍ବଳ୍ପ ବୃଷ୍ଟିପାତ ଯୋଗୁ ଚାଷକାର୍ଯ୍ୟରେ ବାଧା ଉପୁଜିଛି। ବ୍ଲକର ୧୬ଟି ପଞ୍ଚାୟତ ମଧ୍ୟରୁ ତିରୁଣା, ଡାବର ପଞ୍ଚାୟତରେ ଜୁନ୍ ପ୍ରଥମ ସପ୍ତାହରେ ଖରୁଡ଼ି ବୁଣାକାର୍ଯ୍ୟ ସରିଥିବାବେଳେ କୋରୁଅ, ଶିଖର, ଓଷକଣା, ଡେରିକି ପଞ୍ଚାୟତରେ ଲଘୁଜାତୀୟ ଧାନ ଓ ଘୋଡ଼ାଂଶ, ଜାମୁଗାଁ, ରୋହିଆ, ବଛାଳୋ, ନୂଆଗାଁ, ଅଲଣା, ଗଜରାଜପୁର ଆଦି ପଞ୍ଚାୟତରେ ରୁଆଧାନ କରାଯାଇଥାଏ। ବର୍ତ୍ତମାନ ବର୍ଷା ଅଭାବରୁ ତଳିଘେରା ଓ ବୁଣା ଧାନ ପ୍ରଭାବିତ ହୋଇଛି। କୃଷି ବିଭାଗର ତଥ୍ୟ ଅନୁସାରେ ଏହି ବ୍ଲକରେ ୭ ହଜାର ହେକ୍ଟର ଜମିରେ ଧାନଚାଷ ହୋଇଥିବାବେଳେ ୨ ହଜାର ହେକ୍ଟର ଜମିରେ ଲଘୁଜାତୀୟ ଓ ୫ ହଜାର ହେକ୍ଟର ଜମିରେ ଶାରଦ ଜାତୀୟ ଧାନଚାଷ କରାଯାଇଛି। ସେହିପରି ଉକ୍ତ ବ୍ଲକରେ ୨୦୧୭ ମସିହା ସୁଦ୍ଧା ୮୬ଟି ଉଠା ଜଳସେଚନ ପ୍ରକଳ୍ପ ଥିବାବେଳେ ଅନେକ ପ୍ରକଳ୍ପ କାଗଜକଲମରେ ଚାଲୁଥିବା ଜଣାପଡ଼ିଛି। ବର୍ଷା ଅଭାବରୁ ତଳିଘେରା ଫାଟିଥିବାବେଳେ ଚାଷକାର୍ଯ୍ୟ ଆଗେଇ ପାରୁନାହିଁ। ତେଣୁ ଉଠାଜଳସେଚନ ପ୍ରକଳ୍ପଗୁଡ଼ିକୁ ଠିକ୍ ଭାବେ କାର୍ଯ୍ୟ କରିବା ପାଇଁ ସ୍ଥାନୀୟ ଚାଷୀ ପ୍ରଶାସନ ନିକଟରେ ଦାବି କରିଛନ୍ତି।