ଭୁବନେଶ୍ୱର,୨୨ା୧୧(ବ୍ୟୁରୋ): ଓଡ଼ିଶା କାଜୁ ଉନ୍ନୟନ ନିଗମ ପକ୍ଷରୁ ୨୦୧୭-୧୮ ଆର୍ଥିକ ବର୍ଷ ପାଇଁ ବାର୍ଷିକ ରିପୋର୍ଟ ନିକଟରେ ବିଧାନସଭାରେ ଉପସ୍ଥାପନ କରାଯାଇଛି। ୨୦୧୭-୧୮ ଆର୍ଥିକ ବର୍ଷରେ ନିଗମର ୧୪୦୧.୮୯ ଲକ୍ଷ ଟଙ୍କା ନଗଦ ଆୟ ହୋଇଛି। ପୂର୍ବବର୍ଷ ଏହି ଆୟ ୪୦୫.୭୪ ଲକ୍ଷ ଟଙ୍କା ରହିଥିଲା। ତେଣୁ ଗୋଟିଏ ଆର୍ଥିକ ବର୍ଷ ମଧ୍ୟରେ ନିଗମକୁ ପ୍ରାୟ (୧୪୦୧.୮୯-୪୦୫.୭୪) ୯୯୬.୧୫ ଲକ୍ଷ ଟଙ୍କାର ନଗଦ ଲାଭ ହୋଇଥିବା ଜଣାପଡ଼ିଛି। ହେଲେ ବାର୍ଷିକ ରିପୋର୍ଟର ୫ ପୃଷ୍ଠା ସମସ୍ତ ମୂଲ୍ୟକୁ କେବଳ ସଂଖ୍ୟାରେ ଉଲ୍ଲେଖ କରାଯାଇଥିଲା। ଏହି ମୂଲ୍ୟ ଲକ୍ଷ କିମ୍ବା କୋଟି ଟଙ୍କାରେ ବୋଲି ନିର୍ଦ୍ଦିଷ୍ଟ ଭାବେ ଉଲ୍ଲେଖ କରାଯାଇ ନାହିଁ। ତେଣୁ ବୁଧବାର ପ୍ରକାଶ ପାଇଥିବା ଖବରରେ ନିଗମ ଲାଭାଂଶ କୋଟିରେ ଉଲ୍ଲେଖ କରାଯାଇଥିଲା। ଏହି ଅନିଚ୍ଛାକୃତ ତ୍ରୁଟି ନେଇ ନିଗମ ଗୁରୁବାର ଗଣମାଧ୍ୟମକୁ ଅବଗତ କରାଇଥିଲେ। ଏଥିସହିତ ଲାଭାଂଶ ମୂଲ୍ୟକୁ କୋଟି ପରିବର୍ତ୍ତେ ଲକ୍ଷ ବୋଲି ଧରିବାକୁ ପରାମର୍ଶ ଦେଇଥିଲେ।