ଦାରିଙ୍ଗବାଡ଼ି/ବ୍ରାହ୍ମଣୀଗାଁ,୨୨।୭(ଡି.ଏନ୍.ଏ.): ଗତ କିଛିଦିନ ହେଲା କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ବ୍ରାହ୍ମଣୀଗାଁ ଥାନା ଅଞ୍ଚଳ କାଟିଙ୍ଗିଆ ପଞ୍ଚାୟତର କାଟିଙ୍ଗିଆ ସମେତ ମହାଗୁଡ଼ା, ମୁଣ୍ଡିଗାଁ, ତିଆରିଗାଁ ଆଦି ଗ୍ରାମରେ ମଦ ବିରୋଧୀ ଅଭିଯାନ ଜୋର୍ଦାର କରାଯାଇଛି। ଏଥିରେ ପଞ୍ଚାୟତର ସରପଞ୍ଚ କପିଳାସ ମଲ୍ଲିକଙ୍କ ସହଯୋଗରେ ନାରୀନେତ୍ରୀ ମୀରା ମନ୍ତ୍ରୀ, ଅରୁଣ ଦଣ୍ଡସେନା, ରମ୍ଭା ସେନାପତିଙ୍କ ନେତୃତ୍ୱରେ ଶତାଧିକ ମହିଳା ବିଭିନ୍ନ ମଦଭାଟି ସମେତ ଜଙ୍ଗଲରେ ଚୋରାରେ ରନ୍ଧାଯାଉଥିବା ମଦଭାଟି ଉପରେ ଚଢ଼ାଉ କରିଛନ୍ତି। ସେମାନେ ଦେଶୀମଦକୁ ନଷ୍ଟକରିବା ସହ ରନ୍ଧା ସାମଗ୍ରୀ, ମହୁଲ ପୋଚକୁ ନଷ୍ଟ କରିଥିବା ଜଣାପଡ଼ିଛି। ଏହି ପ୍ରକ୍ରିୟା ଆଗକୁ ଜାରିରହିବ ବୋଲି ମହିଳାମାନେ କହିଛନ୍ତି। ଫଳରେ ଚୋରାମଦ ବ୍ୟବସାୟୀମାନେ ତାଙ୍କ ଚୋରାମଦ ସାମ୍ରାଜ୍ୟକୁ ବନ୍ଦ କରିବା ପାଇଁ ଏକ ପ୍ରକାର ବାଧ୍ୟ ହୋଇଛନ୍ତି। କେତେଜଣ ବ୍ୟବସାୟୀ ଆଗକୁ ଏହି ବେପାର କରିବେ ନାହିଁ ବୋଲି ଥାନାରେ ଲିଖିତ ପ୍ରତିଶ୍ରୁତି ଦେଇଥିବା ମହିଳା ସଂଘ ପକ୍ଷରୁ କୁହାଯାଇଛି।
ମହିଳାମାନେ ଅଭିଯୋଗ କରିଛନ୍ତି ଯେ, ଦୁର୍ଗମ ଅଞ୍ଚଳରେ କାଟିଙ୍ଗିଆ ରହିଥିବା ବେଳେ ୨୦୦୮ ଏବଂ ୨୦୦୯ ମସିହାରେ ମାଓବାଦୀଙ୍କ ଦୁଇ ଦୁଇ ଥର ଆକ୍ରମଣରେ କାଟିଙ୍ଗିଆ ଫାଣ୍ଡି ବନ୍ଦ ହୋଇପଡ଼ିରହିଛି। ଏବେ ମାଓବାଦୀଙ୍କ ନାମ ନେଇ ଉକ୍ତ ଅଞ୍ଚଳକୁ ପୋଲିସ ଯାତାୟାତ କରୁନାହିଁ। ଫଳରେ ଏହାର ଫାଇଦା ନେଇ ଚୋରା ମଦ କାରବାର ବୃଦ୍ଧି ପାଇଛି। ଏଥିପ୍ରତି ଜିଲା ପୋଲିସ ପକ୍ଷରୁ ଦୃଢ଼ ପଦକ୍ଷେପ ନେବା ପାଇଁ ଦାବି ହୋଇଛି।
