କଟକ ଅଫିସ୍,୨୮ା୩: ଦେଶରେ କରୋନା ଭୂତାଣୁ ସଂକ୍ରମଣ ରୋକିବା ପାଇଁ ୨୪ତାରିଖ ମଧ୍ୟରାତ୍ରିରୁ ଲକ୍ଡାଉନ୍ ଘୋଷଣା କରାଯାଇଛି। ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ଏହି ଲକ୍ଡାଉନ୍ ନିର୍ଦ୍ଦେଶନାମା ଜାରି ହୋଇଛି। ହେଲେ ଓଡ଼ିଶାରେ ବହୁ ଲୋକ ନିୟମିତ ଲକ୍ଡାଉନ୍କୁ ଉଲ୍ଲଂଘନ କରୁଛନ୍ତି। ପୋଲିସ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରୁଥିଲେ ମଧ୍ୟ ଲୋକେ କଟକଣା ମାନୁନାହାନ୍ତି। ମାତ୍ର ୩ଦିନରେ ରାଜ୍ୟର ବିଭିନ୍ନ ଥାନାରେ ଲକ୍ଡାଉନ୍ ଉଲ୍ଲଂଘନ ନେଇ ୭୪୮ଟି ମାମଲା ରୁଜୁ ହୋଇଛି।
ରାଜ୍ୟ ପୋଲିସ ମୁଖ୍ୟାଳୟରୁ ମିଳିଥିବା ସୂଚନା ଅନୁଯାୟୀ, ୨୪ତାରିଖ ସକାଳଠାରୁ ୨୫ତାରିଖ ସକାଳ ପର୍ଯ୍ୟନ୍ତ ସାରା ରାଜ୍ୟରେ କରୋନା କଟକଣା ଜନିତ ମୋଟ ୧୪୯ଟି ମାମଲା ରୁଜୁ ହୋଇଥିଲା। ସେଥିରୁ କେବଳ ୧୩୭ଟି ମାମଲା ଥିଲା ଲକ୍ଡାଉନ୍ ଉଲ୍ଲଂଘନ ଜନିତ। ଏହା ପରଠୁ ନିୟମିତ ଏହି ମାମଲା ବଢ଼ିବାରେ ଲାଗିଛି। ୨୫ତାରିଖ ସକାଳଠାରୁ ୨୬ତାରିଖ ସକାଳ ପର୍ଯ୍ୟନ୍ତ ଉଲ୍ଲଂଘନ ସମ୍ପର୍କିତ ମାମଲା ବୃଦ୍ଧି ହୋଇଥିଲା। ଏହି ସମୟରେ ମୋଟ ୨୫୫ଟି ମାମଲା ରୁଜୁ ହୋଇଥିଲା। ସେଥିରୁ କେବଳ ଲକ୍ଡାଉନ୍ ଉଲ୍ଲଂଘନ ଜନିତ ମାମଲା ଥିଲା ୨୪୩। ସେହିଭଳି ୨୬ତାରିଖ ସକାଳ ଠାରୁ ୨୭ ତାରିଖ ସକାଳ ପର୍ଯ୍ୟନ୍ତ କରୋନା ସମ୍ପର୍କିତ ୩୯୩ଟି ମାମଲା ରୁଜୁ ହୋଇଛି। କେବଳ ଲକ୍ଡାଉନ୍ ଉଲ୍ଲଂଘନ ସଂକ୍ରାନ୍ତ ମାମଲା ରହିଛି ୩୬୮। ଲୋକେ ବାରମ୍ବାର କଟକଣା ଉଲ୍ଲଂଘନ କରୁଥିବା ନେଇ ବରିଷ୍ଠ ପୋଲିସ ଅଧିକାରୀମାନେ ମଧ୍ୟ ଚିନ୍ତାରେ ପଡ଼ିଛନ୍ତି। ଗାଁଠୁ ସହର ପର୍ଯ୍ୟନ୍ତ ସବୁ ପ୍ରମୁଖ ଛକ, ବଜାର ଓ ରାସ୍ତାରେ ପୋଲିସ ପକ୍ଷରୁ କଡ଼ା ପ୍ରହରା ଦିଆଯାଉଛି। ଜାଗା ଜାଗାରେ ବ୍ୟାରିକେଡ୍ ପକାଇ ଅଧିକାରୀମାନେ ଲୋକଙ୍କୁ ଯାଞ୍ଚ କରୁଛନ୍ତି। ଏପରି କି ଉଲ୍ଲଂଘନକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଯାନବାହନ ଜବତ କରାଯିବା ସହ ଜରିମାନା ଆଦାୟ ହେଉଛି। ତଥାପି ଲୋକଙ୍କ ମାନସିକତାରେ ପରିବର୍ତ୍ତନ ହେଉନାହିଁ। ଅତ୍ୟାବଶ୍ୟକ କାମ ନ ଥିଲେ ଘରୁ ନ ବାହାରିବା ପାଇଁ ସରକାର ବାରମ୍ବାର କହୁଥିଲେ ମଧ୍ୟ ଅନେକ ଲୋକ ମାନୁ ନାହାନ୍ତି।
ଅପରପକ୍ଷେ ଶୁକ୍ରବାର ରାଜ୍ୟ ପୋଲିସ ମହାନିର୍ଦ୍ଦେଶକ ଅଭୟ ଏକ ଭିଡିିଓ ବାର୍ତ୍ତା ଜରିଆରେ କାର୍ଯ୍ୟରେ ନିୟୋଜିତ ପୋଲିସ କର୍ମଚାରୀମାନଙ୍କୁ ପ୍ରଶଂସା କରିଛନ୍ତି। ସେ କହିଛନ୍ତି, ଲକ୍ଡାଉନ୍ ପାଳନରେ ରାଜ୍ୟ ପୋଲିସ ଭଲ କାମ କରିଛି। ପୋଲିସ କର୍ମଚାରୀଙ୍କ କଠିନ ପରିଶ୍ରମ, ନିଷ୍ଠା ଏବଂ ସମର୍ପଣ ପାଇଁ ସେମାନେ ଆଜି ରାଜ୍ୟବାସୀଙ୍କ ସ୍ନେହ ଓ ସମ୍ମାନ ହାସଲ କରିପାରିଛନ୍ତି। ସେଥିପାଇଁ ଅଭିନନ୍ଦନ। ଲକ୍ଡାଉନ୍ ତିନି ସପ୍ତାହ ଚାଲିବ। କିନ୍ତୁ କରୋନା ବିରୋଧରେ ଲଢ଼େଇ କିଛି ମାସ ପର୍ଯ୍ୟନ୍ତ ଚାଲିବ। ଓଡ଼ିଶାବାସୀଙ୍କ ସ୍ବାସ୍ଥ୍ୟ ଓ ଜୀବନ ରକ୍ଷା ନିମନ୍ତେ ଈଶ୍ୱର ଆମକୁ ଗୁରୁଦାୟିତ୍ୱ ଦେଇଛନ୍ତି। ଏହି ପବିତ୍ର କାମ ପାଇଁ ଆମକୁ ପୂର୍ଣ୍ଣ ସମର୍ପିତ ରହିବାକୁ ପଡ଼ିବ ବୋଲି ସେ ପ୍ରକାଶ କରିଛନ୍ତି।