ବାରିପଦା ଅଫିସ, ୨୯ା୨- ମୟୂରଭଞ୍ଜ ଜିଲା ବାରିପଦା ରେଞ୍ଜ ଅଧୀନ ମହୁଲିଆଠାରେ କାଠମାଫିଆଙ୍କ ଆକ୍ରମଣରେ ଜଣେ ଫରେଷ୍ଟ ଗାର୍ଡ ଓ ବନ ବିଭାଗର ଅନ୍ୟ ଜଣେ କର୍ମଚାରୀ ଆହତ ହୋଇଛନ୍ତି। ଆହତ ଫରେଷ୍ଟଗାର୍ଡ ହେଲେ ଛତିଶ ଚନ୍ଦ୍ର ମହାନ୍ତ ଓ ବନ କର୍ମଚାରୀ ଜଣଙ୍କ ହେଲେ ଶତ୍ରୁଘନ ମହାନ୍ତ। ସୂଚନା ଅନୁଯାୟୀ, ଗୁରୁବାର ରାତିରେ ହାତୀ ଘଉଡ଼ାଇବା ପାଇଁ ବନ କର୍ମଚାରୀମାନେ ମହୁଲିଆ ରେଞ୍ଜକୁ ଯାଇଥିଲେ। ଶୁକ୍ରବାର ଭୋର ସମୟରେ ଫେରୁଥିବା ବେଳେ ମହୁଲିଆ ଛକ ନିକଟରେ ଏକ କାଠ ବୋଝେଇ ପିକଅପ ଭ୍ୟାନ ଦେଖିବାକୁ ପାଇଥିଲେ। ପରେ ଫରେଷ୍ଟ ଗାର୍ଡ ଓ ବନ କର୍ମଚାରୀ ଜଣଙ୍କ ଗାଡ଼ି ନିକଟକୁ ଗଲାବେଳକୁ ଗାଡ଼ିର ଚାଳକ ଓ ହେଲ୍ପର ଗାଡ଼ି ଛାଡ଼ି ଦୌଡି ପଳାଇ ଯାଇଥିଲେ। ଗାଡ଼ିରେ ବିପୁଳ ପରିମାଣର କାଠ ଥିବା ନେଇ ବାରିପଦା ବନ ବିଭାଗ କାର୍ଯ୍ୟାଳୟକୁ ଖବର ଦିଆଯାଇଥିଲା। ଏହାର କିଛି ସମୟ ପରେ କିଛି ବାଇକ୍ରେ ୧୦ରୁ ଊର୍ଦ୍ଧ୍ୱ ଯୁବକ ଆସି ଫରେଷ୍ଟ ଗାର୍ଡ ଛତିଶ ଓ ଶତ୍ରୁଘନଙ୍କୁ ବିଭିନ୍ନ ମାରଣାସ୍ତ୍ରରେ ଆକ୍ରମଣ କରି ଲହୁଲୁହାଣ କରି ଦେଇଥିଲେ। ପରେ କାଠ ବୋଝେଇ ଗାଡିକୁ ନେଇ ପଳାଇ ଯାଇଥିଲେ। ବନ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଉଭୟଙ୍କୁ ଉଦ୍ଧାର କରି ପିଆରଏମ୍ ମେଡିକାଲ୍ରେ ଭର୍ତ୍ତି କରାଇଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ଉଭୟସୁସ୍ଥ ଥିବା ଜଣାପଡ଼ିଛି। ଏନେଇ ବାରିପଦା ରେଞ୍ଜର ଟାଉନ ଥାନାରେ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ଟାଉନ ପୋଲିସ ଘଟଣାର ତଦନ୍ତ ଜାରି ରଖିଛି।