କାଲଗାରି,୮।୭- ପୂର୍ବତନ ରାଜ୍ୟଗୋଷ୍ଠୀ ଚାମ୍ପିୟନ ପାରୁପଲ୍ଲୀ କାଶ୍ୟପ ଚଳିତ କାନାଡା ଓପନ ୧୦୦ ବ୍ୟାଡ୍ମିଣ୍ଟନ ଟୁର୍ନାମେଣ୍ଟରେ ଉପବିଜେତା ଭାବେ ଅଭିଯାନ ଶେଷ କରିଛନ୍ତି। ୩ ଗେମ୍ ବିଶିଷ୍ଟ ଫାଇନାଲରେ କାଶ୍ୟପଙ୍କୁ ଚାଇନାର ଅଣ ସିଡ୍ ଲି ଶି ଫେଙ୍ଗ୍ ହରାଇ ପୁରୁଷ ସିଙ୍ଗଲ୍ସ ବର୍ଗର ଟାଇଟଲ ହାତେଇଛନ୍ତି। ୬ଷ୍ଠ ସିଡ୍ କାଶ୍ୟପ ପ୍ରଥମ ଗେମ୍କୁ ୨୨-୨୦ ବ୍ୟବଧାନରେ ଜିତିଥିଲେ। କିନ୍ତୁ ପରବର୍ତ୍ତୀ ଦୁଇ ଗେମ୍ରେ ୧୪-୨୧, ୧୭-୨୧ରେ ପରାଜୟବରଣ କରିଥିଲେ। ଫାଇନାଲରେ ଦୁଇ ଖେଳାଳିଙ୍କ ମଧ୍ୟରେ ଏକଘଣ୍ଟା ୧୬ ମିନିଟ୍ ଧରି ଲଢ଼େଇ ହୋଇଥିଲା। ପରାଜୟ ପରେ ୩୨ ବର୍ଷୀୟ କାଶ୍ୟପ କହିଛନ୍ତି, ଫାଇନାଲରେ କଡ଼ା ସଂଘର୍ଷ ସତ୍ତ୍ୱେ ରୌପ୍ୟ ପଦକ ପାଇଛି। ଏହା ମୋ ଶ୍ରେଷ୍ଠ ପ୍ରଦର୍ଶନ ନୁହେଁ। କିନ୍ତୁ ଚଳିତ ସପ୍ତାହରେ ମୁଁ ଭଲ ଖେଳିଛି। ସମର୍ଥନ ପାଇଁ ପ୍ରଶଂସକଙ୍କୁ ଧନ୍ୟବାଦ। ସାଥୀ ଖେଳାଳି ଏଚ୍.ଏସ୍. ପ୍ରଣୟ ଟୁର୍ନାମେଣ୍ଟରେ କ୍ୱାର୍ଟର ଫାଇନାଲରେ ହାରିଯାଇଥିଲେ ମଧ୍ୟ ସ୍ବଦେଶ ଫେରି ନ ଥିଲେ। ସେଠାରେ ସେ ଜଣେ କୋଚ୍ ଭାବେ କୋର୍ଟରେ କାଶ୍ୟପଙ୍କୁ ସାହାଯ୍ୟ କରିଥିଲେ।