ନୂଆଦିଲ୍ଲୀ, ୭।୮: ଶୋକାକୁଳ ପରିବେଶ ମଧ୍ୟରେ ଦିଲ୍ଲୀର ଲୋଧି ରୋଡ ଶ୍ମଶାନ ଘାଟଠାରେ ପୂର୍ବତନ କେନ୍ଦ୍ରମନ୍ତ୍ରୀ ତଥା ବରିଷ୍ଠ ଭାଜପା ନେତ୍ରୀ ସୁଷମା ସ୍ବରାଜଙ୍କ ଶେଷକୃତ୍ୟ ସମ୍ପନ୍ନ ହୋଇଛି। ୨୧ଟି ତୋପ ସଲାମୀର ରାଷ୍ଟ୍ରୀୟ ମର୍ଯ୍ୟାଦା ସହିତ ତାଙ୍କର ଶେଷକୃତ୍ୟ କରାଯାଇଛି। ତେବେ ସୁଷମାଙ୍କ ଅନ୍ତିମଯାତ୍ରାରେ ଭାଜପାର ବହୁ ବରିଷ୍ଠ ମନ୍ତ୍ରୀ ତଥା ନେତା ଉପସ୍ଥିତ ଥିଲେ। ରାଜ୍ୟ ସଭା ସଭାପତି ତଥା ଉପରାଷ୍ଟ୍ରପତି ଭେଙ୍କାୟା ନାଇଡୁ ସୁଷମାଙ୍କ ଅନ୍ତିମ ବିଦାୟ ପରେ କାନ୍ଦିପକାଇଥିଲେ। ଲୁହ ଛଳଛଳ ଆଖିରେ ସେ କହିଥିଲେ, ସୁଷମା ମୋର ଛୋଟ ଭଉଣୀ ପରି ଥିଲେ। ପ୍ରତିବର୍ଷ ରାଖୀ ପୂର୍ଣ୍ଣମୀରେ ସେ ମୋ ହାତରେ ରାଖୀ ବାନ୍ଧିବାକୁ ଆସୁଥିଲେ। ତାଙ୍କ ମୃତ୍ୟୁ ଦେଶ ପାଇଁ ଅପୂରଣୀୟ କ୍ଷତି ବୋଲି ସେ କହିଛନ୍ତି।