କାମାକ୍ଷାନଗର, ୧୮।୭(ଡି.ଏନ୍.ଏ.)-ଢେଙ୍କାନାଳ ଜିଲା କାମାକ୍ଷାନଗର ବ୍ଲକ ଅଞ୍ଚଳକୁ ଗୁରୁବାର ପରିଦର୍ଶନରେ ଆସିଥିଲେ ନୀତି ଆୟୋଗ ସଦସ୍ୟା ମାନ୍ସୀ ସିଂ। ଏହି ଅବସରରେ ସେ ବିଭିନ୍ନ ପ୍ରକଳ୍ପ, ରାସ୍ତା ଏବଂ ଶିକ୍ଷା ବ୍ୟବସ୍ଥା ଭିତ୍ତିଭୂମି ବୁଲି ଦେଖିଥିଲେ।
ମାନ୍ସୀ ସିଂ ପ୍ରଥମେ କାନପୁରା ପଞ୍ଚାୟତିରାଜ ଉଚ୍ଚ ବିଦ୍ୟାଳୟରେ ପହଞ୍ଚତ୍ ସ୍କୁଲର ସଫଳତା, ଅଭାବ ଅସୁବିଧା ସମ୍ପର୍କରେ ପଚାରି ବୁଝିଥିଲେ। ଏଥିସହ ନବନିର୍ମିତ ଅଟଳ ଟିଙ୍କରିଙ୍ଗ୍ ଲ୍ୟାବ ବୁଲି ଦେଖିଥିଲେ। ଲବୋରେଟୋରିରେ ଛାତ୍ରୀଛାତ୍ରଙ୍କ ବ୍ୟବହାରିକ ଜ୍ଞାନକୁ ଅନୁଧ୍ୟାନ କରିଥିଲେ। ପିଲାଙ୍କ ସହ ସ୍ବଳ୍ପ ସମୟ ଭାବ ବିନିମୟ କରି ସେ ସନ୍ତୋଷ ବ୍ୟକ୍ତ କରିଛନ୍ତି। ଏହାପରେ ଜିରିଡ଼ାମାଳି ଗସ୍ତ କରି ବିଦ୍ୟୁତ୍ ବିଭାଗ ଦ୍ବାରା ନବନିର୍ମିତ ପାଓ୍ବାର ଗ୍ରୀଡ୍ ଦେଖିଥିଲେ। ଏହାର ଉପଯୋଗିତା ସମ୍ପର୍କରେ ବିଭାଗୀୟ ଯନ୍ତ୍ରୀଙ୍କୁ ପୁଙ୍ଖାନୁପୁଙ୍ଖ ପଚାରି ବୁଝିଥିଲେ। ଶେଷରେ କଙ୍କଡ଼ାହାଡ଼ ବ୍ଲକ ମହାବିରୋଡ଼ ଗସ୍ତ କରି ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା ଅନୁଦାନରେ ନିର୍ମିତ ରାସ୍ତା ଦେଖିଥିଲେ।
ଅଧିକାରୀଙ୍କ ଏହି ଗସ୍ତ ସମୟରେ ଜିଲା ପ୍ରକଳ୍ପ ନିର୍ଦେଶକଙ୍କ କାର୍ଯ୍ୟକ୍ରମ ଅଧିକାରୀ ବି. ମୋହନ ରାଓ, ଜିଲା ସର୍ବଶିକ୍ଷା ଅଭିଯାନର ପ୍ରକଳ୍ପ ଅଧିକାରୀ ପ୍ରଜ୍ଞାପାରମିତା ଦାସ, ବିଦ୍ୟୁତ୍ ବିଭାଗ ଯନ୍ତ୍ରୀ ନଳିନୀଶଙ୍କର ରଥ, ସରପଞ୍ଚ ଚିତ୍ତରଞ୍ଜନ ସେଠୀ, ହାଇସ୍କୁଲ ପରିଚାଳନା କମିଟି ସଭାପତି ସତ୍ୟଜିତ୍ ରାଉତ, ପ୍ରଧାନ ଶିକ୍ଷକ ଶ୍ରୀରାମ ରାଉତଙ୍କ ସମେତ ବହୁ ବିଭାଗୀୟ ଅଧିକାରୀ ଉପସ୍ଥିତ ଥିଲେ।