କାମାକ୍ଷାନଗର,୨୭ା୧୨ (ଡି.ଏନ.ଏ.)-ଢେଙ୍କାନାଳ ଜିଲା କାମାକ୍ଷାନଗର ଉପଖଣ୍ଡ ଚିକିତ୍ସାଳୟରେ ରୋଗୀ ସେବା କିପରି ଚାଲିଛି ତାହାର ଉଦାହରଣ ଗୁରୁବାର ଦେଖିବାକୁ ମିଳିଛି। ଏହି ଚିକିତ୍ସାଳୟରେ ଜେନେରେଟର ଓ ଇନଭର୍ଟର ବ୍ୟବସ୍ଥା ରହିଥିଲେ ବି କର୍ତ୍ତୃପକ୍ଷଙ୍କ ଉଦାସୀନତା କାରଣରୁ ରାତିରେ ବିଦ୍ୟୁତ୍ ବିଚ୍ଛିନ୍ନ ବେଳେ ଜଣେ ରୋଗୀଙ୍କ ଦେହରେ ଅନ୍ଧାରରେ ରକ୍ତ ଲଗାଯାଇଥିବା ଅଭିଯୋଗ ହୋଇଛି। ଦିନତମାମ ବିଦ୍ୟୁତ୍ ନ ଥିବାରୁ ରୋଗୀ ହଇରାଣ ହୋଇଥିଲେ। ସନ୍ଧ୍ୟାରେ କାମାକ୍ଷାନଗର ବାଉଁଶପାଳ ଚୂଲିଆ ଗ୍ରାମର ରୋଗୀ ସୁକେଶ ଦେହୁରୀ (୬୦)ଙ୍କ ରକ୍ତ ଆବଶ୍ୟକତା ପଡ଼ିଥିଲା। ଫଳରେ ଅନ୍ଧାର ସତ୍ତ୍ୱେ ତାଙ୍କୁ ରକ୍ତ ଦିଆଯାଇଥିଲା। ଏହି ସମୟରେ ପରିବାର ଲୋକେ ଟର୍ଚ୍ଚ ମାରି ଜଗି ବସିଥିବା ଦେଖାଯାଇଥିଲା। ଏ ନେଇ କାମାକ୍ଷାନଗର ଉପଖଣ୍ଡ ଚିକିତ୍ସାଧିକାରୀ ଡା.ରତ୍ନାକର ସାମଲଙ୍କ ସହ ଯୋଗାଯୋଗ ସମ୍ଭବ ନ ହେବାରୁ ମତାମତ ମିଳିପାରି ନାହିଁ।